Yesu amalubukya Lazaro

Yesu abya awite abira biwe basatu ababya bikere e Betania. Babya Lazaro n’abali babo babiri, ye Maria na Marta. Kiro kighuma, Yesu iniane eyisirya we Yordani, Maria na Marta mubamutumira omulaghe wa luba-luba bati: ‘Lazaro alwere kutsibu. Kisi wase luba!’ Aliwe Yesu mwatalw’iniaghenda. Mwalinda ebindi biro bibiri neryo mwabwira abakwenda biwe ati: ‘Muyire tughende e Betania. Lazaro abirighotsere, ngaya mubukaya.’ Abakwenda mubabugha bati: ‘Lazaro amabya iniaghotsere, ekyo kikendileka inialama.’ Neryo Yesu mwababwira ndeke-ndeke ati: ‘Lazaro abirihola.’

Yesu abere ahika e Betania, mweya Lazaro inyamabibugha omw’isinda mw’ebiro bini. Abandu bangyi babya ibabirisyawa oko Marta na Maria. Marta abere abyowa ngoko Yesu anemwasa, mwanguha eriyahindana naye. Marta mwabugha ati: “Mukama, ko ulue hano mughala wetu syangaholire.” Yesu mwabwira Marta ati: ‘Mughala wenyu akendisuba. Unikirirye ekyo, Marta?’ Marta mwabugha ati: ‘Ninasi ngoko akendisyalubuka okw’ilubuka ly’omo mughulu owakasa.’ Yesu mwabwira Marta ati: “Ingye indi erilubuka n’engebe.”

Neryo Marta mwaghenda eyiri Maria n’erimubwira ati: ‘Yesu amabihika.’ Maria mwatibita eyiri Yesu, n’abandu mubamukwama. Maria mwawa ahisi oko bisando bya Yesu, inianemulira. Maria mwabugha ati: ‘Mukama, ko ulue hano, mughala wetu ng’akineho!’ Yesu mwalangira ngoko Maria akaghalawa kutsibu neryo naye mwatsuka erilira. Abandu babere babilangira emisonia ya Yesu, mubabugha bati: ‘Yesu abya anzire Lazaro yo kutsibu.’ Aliwe abandi mubayibulya bati: ‘Busanaki mwatitalamya omwira wiwe?’ Yesu endikolaki?

Yesu mwaghenda ahali eyisinda. Kundi babya ibabirihira eribwe rinene oko bwingiriro bw’eyisinda, Yesu mwabugha ati: ‘Mulusayeho eribwe.’ Marta mwabugha ati: “Lino alimukumba kusangwa hamabikya ebiro bini.” Aliwe mubalusya h’eribwe, na Yesu mwasaba ati: ‘Tata, wasingya erinyowa. Ninasi ngoko ukanyowa ebiro byosi, aliwe ngabugha omo mulenge munene abandu batoke eriminya ngoko n’iwe wanituma.’ Neryo Yesu mwabirikira n’omulenge munene ati: “Lazaro, huluka!” Omwatsi owakaswekaya mwabya: Lazaro mwalua omw’isinda, inianasenga-sengire omo lukimba. Yesu mwabugha ati: “Mumusengule aghende.”

Abangyi abalangira eki kikabya mubikirirya Yesu. Aliwe abandi mubaghenda bamayakanirya Abafarisayo b’ebyosi. Eritsuka aho, Abafarisayo mubasonda eriita Lazaro na Yesu. Omughuma w’oko bakwenda 12, ye Yuda Iskariote, mwaghenda bubiso-biso eyiri Abafarisayo n’eribabwira ati: ‘Mwangamba singahi namabibawatikya eribana Yesu?’ Mubalighirana erimuha ebihande 30 by’efeza, neryo Yuda mwatsuka erisondekania ngoko angawatikya Abafarisayo erihamba Yesu.