Yesu iniakine mulere

Yesu abya ikere e Nazareti haghuma n’ababuti biwe, Yozefu na Maria, n’abaghala babo n’abali babo. Yozefu iniakaranda esyombagho atoke eribana eky’eriha ekihanda kiwe. Iniakabakaniraya oko Yehova n’oko mighambo yiwe. Kangyi-kangyi ibakaghenda oko sinagogi busana n’eriyaramya oMungu. N’obuli mwaka, ibakaya e Yerusalema oko fete ye Pasaka.

Omughulu Yesu ayira emyaka 12, kandi mubaya e Yerusalema ngoko babya babeghere erikola. Omuyi we Yerusalema musulamo abandu bangyi abasa oko fete ye Pasaka. Enyuma sy’aho, Yozefu na Maria mubatsuka olughendo lw’erisuba eka, ibanasi bati Yesu ane n’abandi. Aliwe, babere bamurondya omo batunga babo, mubatamubana.

Mubasuba e Yerusalema, mubabugha ebiro bisatu ibanemurondya omwana wabo. Oko nduli, mubaya omo hekalu. Yesu abya inianikere omo kati-kati k’abakangirirya, inianemuhulikirira ndeke n’eribabulya amabulyo aghuwene. Abakangirirya mubatsemera Yesu neryo mubatsuka erimubulya amabulyo. Nabo mubaswekera ebisubiryo biwe. Mubalangira ngoko asi ndeke Emighambo ya Yehova.

Yozefu na Maria babya ibabirikwa obuba. Maria mwabugha ati: ‘Mwana waghe, twabirikurondya ehosi-hosi! Ulue hayi?’ Yesu mwabugha ati: ‘Simwasi ngoko nitolere eribya hano, omo nyumba ya Tata waghe?’

Yesu mwasuba e Nazareti n’ababuti biwe. Yozefu mwakangirirya Yesu omubiiri w’eriranda esyombagho. Ukalengekanaya uti Yesu abya mundu oyuli ati iniakine mulwana mulere? Akakula, Yesu mwabya n’amenge kandi mwasimwa n’oMungu n’abandu.