Danieli amaghuswa omo kyuna ky’esyosimba

Oghundi mwami we Babiloni abya ini Dario Omumedi. Dario mwalangira Danieli ini w’embaghane. Mwayira Danieli mo mukulu w’abakulu-kulu ab’omo Babiloni. Abalume aba mubahitana oko Danieli, neryo mubasonda erimwita. Babya ibanasi ngoko Danieli abeghere erisaba Yehova ngendo isatu obuli kiro. Neryo mubabwira Dario bati: ‘Mwami, hatolere ihabya omughambo owakabugha ati obuli mundu atolere iniasaba okw’iwe musa. Owosi-wosi oyukaghana erikwama omughambo oyo atolere iniaghuswa omo kyuna ky’esyosimba.’ Dario mwatsemera amalengekania ayo, neryo mwahira ekikumo oko mughambo oyo.

Danieli abere abiowa ngoko habiribya omughambo muhya, mwaghenda omo nyumba yiwe. Mwayakukama n’erisaba oko Yehova, eridirisa riwe irinakingulire. Abalume ab’eritsuro abo mubingira omo nyumba yiwe bamamweya inianemusaba. Mubatibita eyiri Dario n’erimubwira bati: ‘Danieli syatakenga omughambo waghu. Akasaba oMungu wiwe ngendo isatu obuli kiro.’ Dario abya anzire Danieli, syabya anzire inyakwa. Obuli kiro iniakalebaya ekyo angakola erisabula Danieli. Aliwe nomo anabya mwami, syabya ahamulirwe eribindula omughambo ogho iyuwene-wene ahira kw’ekikumo. Neryo mwabugha ati Danieli aghusawe omo kyuna ky’esyosimba esitsurumire.

Omo kiro ky’ekiro ekyo, Dario mwakwira Danieli y’obulighe kandi nibya mwataghotsera. Omo tututu, mwatibita eyiri ekyuna n’eribirikira Danieli ati: ‘OMungu waghu mwakanakusabula?’

Dario mwowa omulenge. Abya mulenge wa Danieli! Mwabirikira Dario ati: ‘Omumalaika wa Yehova mwakakinga amuno w’esyosimba. Sisitanyirya.’ Dario mwatsema kutsibu! Mwabugha ati balusaye Danieli y’omo kyuna. Danieli syabyako n’ekironda n’ekighuma. Neryo omwami mwahamula ati: ‘Mughuse omo kyuna abalume abyalyatsongera Danieli.’ Abalume abo babere babighuswa omo kyuna, esyosimba musyalyabo.

Dario mwabwira abandu biwe bosi eyo bali ati: ‘Obuli mundu atolere iniubaha oMungu wa Danieli. Mwakasabula Danieli oko syosimba.’

Naghu nga Danieli, ukanasaba Yehova y’obuli kiro?