Omulondo wa bamalaika ba Yehova

Omwami we Siria ye Ben-hadadi, iniabeghere eribambira e Israeli. Aliwe omwami we Israeli iniakabala kundi omuminyereri Elisha iniakamubwira embere sy’endambi. Neryo Ben-hadadi mwayisogha eriheka Elisha. Ben-hadadi mwaminya ngoko Elisha ane omo muyi we Dotani, neryo mwatumayo abasuda be Siria eriyamuhamba.

Abasiria mubasa e Dotani omo kiro. Omo tututu, omughombe wa Elisha mwahulukira ehihya amalangira abasuda bangyi ibanatimbire oko muyi. Mwakwa obuba n’erilaka ati: ‘Elisha, tuyire tuti?’ Elisha mwamubwira ati: “Abali haghuma netu ni banene kutsibu kulenga abali haghuma nabo.” Oko ndambi eyo, Yehova mwawatikya omughombe wa Elisha erilangira ngoko ebitwa byosi ebitimbire oko muyi byoswireko esyosabayiri n’emitoka y’amalwa eyiri ng’omuliro.

Abasuda be Siria babere babugha bati bakahamba Elisha, mwasaba ati: ‘Yehova, kisi, yira abandu aba mo ndime-time.’ Aho n’aho, nomo abasuda abo babya ibanalangire, mubataminya aho bali. Elisha mwabwira abasuda abo ati: ‘Mwabirihera. Munyikwame, ngendibatwala eyiri omundu oyo mukarondaya.’ Mubamukwama erihika e Samaria, eyo omwami we Israeli abya.

Abasiria mubasala baminya aho bali endambi iyabirilaba. Omwami we Israeli mwabulya Elisha ati: “Niitebo?” Elisha mwanakolesya akanya ako erituhulya abandu ababya bakasonda erimukola nabi? Iyehe. Elisha mwabugha ati: ‘Isiwitabo. Ubahe akalyo n’eribabwira uti basube eyo balyalua.’ Neryo omwami mwabaha akalyo kanene n’eribugha ati basube ewabo.