Yehova mwaha Samsoni y’akaghala

Abaisraeli bangyi kandi mubatsuka eriramya esyosanamu, neryo Yehova mwalighira Abafilistini eritabala ekihugho kyabo. Aliwe habya ihane abandi Baisraeli abanzire Yehova. Omughuma w’okw’ibo abya Manoa. Iye na mukali wiwe sibabya bawite abana. Kiro kighuma Yehova mwatuma omumalaika oko mukali wa Manoa. Omumalaika mwamubwira ati: ‘Ukendibuta omwana w’obulume. Akendisyasabula Abaisraeli erilua omo byala by’Abafilistini. Akendisyabya Munaziri.’ Unasi Abanaziri nga babya bahi? Babya baghombe ba Yehova ab’embaghane. Abanaziri isibalitwa esyonzwiri.

Endambi muyahika, mughala wa Manoa amabutwa, amamwahula mo Samsoni. Samsoni abere anemukula, Yehova mwamuha akaghala. Mwaniita n’esimba omo byala biwe. Kiro kighuma, Samsoni mw’iita Abafilistini 30 iyuwene. Abafilistini mubamupona n’erisondya ngoko bangamwiita. Kiro kighuma Samsoni abya inianaghotsere e Gaza omo kiro, Abafilistini mubasa bamikala oko mulango w’omuyi oyo bakamulinda batoke erimwiita omo tututu. Aliwe oko medi y’ekiro, Samsoni mwabuka amaya eyiri omulango oyo n’erikulagho. Mwahekagho oko bitigho biwe amatwalagho oko singyi y’ekitwa ekiri hakuhi ne Hebroni!

Enyuma w’aho, Abafilistini mubaya eyiri omusika oyo Samsoni abya iniabirianza, ye Delila, n’erimubwira bati: ‘Tukendikuha esyofranga nene wamabitubwira ekikaleka Samsoni iniabya n’akaghala kanene. Twanzire erimuhamba n’erimuhira omo ngomo.’ Kundi Delila abya anzire esyofranga, mwaligha. Oko mwanzo, Samsoni mwaghana eribwira Delila ekikaleka iniabya n’akaghala kanene. Aliwe Delila mwamuhatikana erihika oko kika Samsoni amamubisulira ekumbo yiwe. Mwamubwira ati: ‘Sinirinatasiswa, kundi nabutawa iniri Munaziri. Namabisiswa, akaghala kaghe ikakendihwa.’ Samsoni mwakola ekosa eyikalire akabwira Delila y’ekyo, ko bite bitya?

Aho n’aho, Delila mwalw’iniabwira Abafilistini ati: ‘Nabiriminya ekumbo yiwe!’ Mwaghotserya Samsoni oko maru wiwe, neryo amabirikira oghundi mundu ase atwe esyonzwiri sya Samsoni. Delila mwabirikira ati: ‘Samsoni, Abafilistini si babano!’ Samsoni mwabuka, akaghala kiwe ikabirimuhwa mo. Abafilistini mubamuhamba, bamamutobolako ameso, n’erimuhira omo ngomo.

Kiro kighuma, Abafilistini banene kutsibu mubahindana haghuma omo hekalu y’omungu wabo Dagoni, n’eribugha omo mulenge muli bati: ‘Omungu wetu abirituha Samsoni! Muhulukaye Samsoni! Atutsemesaye.’ Mubamwimania omo kati-kati k’esyonduyi ibiri n’erimusekererya. Samsoni mwalaka ati: ‘Yehova, kisi umbe akaghala engendo nguma eno nyisa.’ Oko mughulu oyo, esyonzwiri sya Samsoni syabya isyamabilasa. Mwakuna esyonduyi sy’ehekalu n’akaghala kiwe kosi. Enyumba yosi muyaterera ahisi, yamiita abandu bosi ababya omo hekalu, na Samsoni mwaholeramo.