Yobu abya ndi?

Omo kihugho kye Uzi, yabya yikere omulume oyo wabya akaramya Yehova. Erina liwe lyabya Yobu. Abya awite ebindu bingyi n’ekihanda kinene. Inianzire abandu, kandi iniakawatikaya abera, abakwakali, n’esyongubi. Neryo kundi Yobu iniakakola ebyuwene, ekyo ni bugha ambu abya isyangahikirwa n’ebitsibu?

Yobu abya isyasi, aliwe Sitani Diabolo abya inianamutungerere. Yehova mwabulya Sitani ati: ‘Mughukanalola oko mughombe waghe ye Yobu? Oko kihugho sikuli omundu oyuli nga ye. Akaniowa kandi akakola ebibuya.’ Sitani mwasubirya ati: ‘Ni kwenene Yobu akakowa. Ukamuteghaya n’erimutsumula. Wabirimuha ekitaka n’esyonyama. Aliwe wamamulusyako ebyosi ebyo, iniakendileka erikuramya.’ Yehova mwabugha ati: ‘Wanganalenga oko Yobu. Aliwe isiwamwita.’ Busanaki Yehova mwalighira Sitani erilenga oko Yobu? Abya inianayiketere ngoko Yobu syenditaluka.

Sitani mwatsuka erilenga oko Yobu omw’imuhikya kw’obuhanya bungyi. Eky’erimbere, mwatuma abandu abakahulawamo Abasabea eriiba esyonde n’esyopunda sya Yobu. Enyuma w’aho, omuliro mwahisya esyombuli sya Yobu syosi. N’abandi bandu, Abakaldayo, mubasa bamiba esyongamiya siwe. Abaghombe ababya bakateya esyonyama siwe nabo mubitibwa. Muhasa ibwa obuhanya obukalire kutsibu. Abana ba Yobu bosi mubahola omughulu enyumba eyo babyamo ibane oko fete yabatererako. Eki mukita Yobu yo bulighe bunene, aliwe mwataleka eriramya Yehova.

Sitani abya anzire Yobu iniaghalwa kwilaba n’aho, neryo mwamuleta kw’ebimata oko mubiri wiwe wosi. Yobu mwabya omo bulumi bunene. Abya isyasi ekikaleka emyatsi yosi eyi iyamuhikira. Nomo byanabya bitya, Yobu mwataleka eriramya Yehova. OMungu mwalangira ebyosi ebi, kandi mwatsemera Yobu yo kutsibu.

Neryo Sitani mwatumira Yobu y’abalume basatu erimulengako. Mubamubwira bati: ‘Wanganabya iwabirikola ebibi, neryo iwabiribisabyo. OMungu akakusuyira.’ Yobu mwabugha ati: ‘Sihali n’ekibi n’ekighuma ekyo niryakola.’ Aliwe mwatsuka erilengekania ati Yehova yukamuletera amaligho ayo, neryo amatsuka eribugha ati oMungu syatamukolera ndeke.

Omulwana oyukahulawamo Elihu abya inianemuhulikirira bukutu bakakania. Neryo naye mwasala abugha ati: ‘Inywe bosi ebyo mukabugha si by’ekwenene. Yehova syalilangira emyatsi ng’itwe. Syangakola n’ahake ekindu kibi. Akalangira obuli kindu kandi akawatikaya abandu omo maligho wabo.’

Neryo Yehova mwakania na Yobu. Mwabugha ati: ‘Wabya hayi omughulu nahangyika olubula n’ekihugho? Ekikaleka iwabugha uti sinitakukolera ndeke niki? Ukakanaya, aliwe isiwasi ekikaleka emyatsi eyi iyabya.’ Yobu mwaligha ekosa yiwe, neryo mwabugha ati: ‘Mungayiteba. Ing’owa engulu yaghu, nikwa lino namakuminya ndeke. Sihali ekite kyangatokekana okw’iwe. Unganyire busana n’ebyo nabugha.’

Erilengwako lyabere lyahwa, Yehova mwalamya Yobu, amamuyiramo muteke kandi n’erimuha ebindu bingyi kwilaba ebyo abya nabyo embere. Yobu mwayira oko ngebe nyiri n’eyirimo obutseme. Yehova mwatsumula Yobu busana n’erimwowa n’omughulu kyabya kikalire. Naghu unemwendisyabya nga Yobu omw’ilola embere eriramya Yehova nomo hangabyaki?