Adamu na Eva mubatowa oMungu

Kiro kighuma Eva iniane iyuwene, enzoka muyakania naye. Muyabugha yiti: ‘Nina kwenene oMungu abiribugha ati isimwalya oko matunda w’emiti yosi?’ Eva mwabugha ati: ‘Twanganalya oko matunda w’emiti yosi erilusyako omughuma musa. Twamalya oko matunda w’omuti oyo, itukendihola.’ Enzoka muyabugha yiti: ‘Simwendihola. Kandi nibya, mwamalya kugho, imukendibya ng’oMungu.’ Eyo yanabya kwenene? Iyehe, abya mabehi. Aliwe Eva mwalighagho. Eva abere asamalira amatunda ayo wo kutsibu, mwanzagho. Mwalya kugho, amaha na Adamu. Adamu abya inianasi ngoko bamatendiowa oMungu ibakendihola. Aliwe Adamu mwalya.

Enyuma w’aho omo kiro ekyo kisa-kisa, Yehova mwakania na Adamu na Eva. Mwababulya ekiryaleka ibatamowa nga niki. Eva mwabugha ati enzoka yo yiryaleka, na Adamu mwabugha ati Eva yulyaleka. Kundi Adamu na Eva mubatamwowa, Yehova mwabalusya omw’irima lye Edeni. Yehova mwahira oko bwingiriro bw’eririma eryo kw’abamalaika n’omuyali ow’akaka busana n’erikakirya Adamu na Eva erisyasuba mulyo.

Yehova mwabugha ati n’oyo wateba Eva naye akendisuyirwa. Si bugha ambu enzoka y’eyakanaya na Eva. Yehova mwatahangyika esyonzoka esikabugha. Omumalaika mubi yo wabughira omo nzoka. Mwakola atya atoke eritebya Eva. Omumalaika oyo akahulawa mo Sitani Diabolo. Omo biro ebikasa, Yehova akendisyatoghotya Sitani isyasyalola embere eritebya abandu erikola ebindu bibi.