Ebyo wangakola omughulu iwe kutse abandi mwamakolerwa muhanda

1-2. Abandu bangyi bakakola bati omughulu bamakolerwa muhanda, netu twanganayibulya tutiki?

MUNABWIRE abandu bangyi bakakolerawa muhanda. Bakakolerawa muhanda kundi ni bera, kutse busana n’eyo basira, kutse busana na ngoko bakalangirika, kutse busana n’eyindi myatsi. N’abandi bandu bangyi bakaghalawa kundi abateke n’abakulu balebe b’eleta banzire kutsibu esyofranga. Netu emyatsi eyi n’eyindi yanganabya iyinemutwaghalya kutse eryaghalya abandu abo twasi.

² Abandu bangyi bakahitana kundi bakakolerawa muhanda kutse erilangira abandi bakakolerwa muhanda. Ekyo sikirituswekaya kundi itwe bosi tukanza erikolerwa ndeke n’eriyowa omo buholo. Busana n’erikolerwa muhanda, abandu balebe bakayingiraya omo bitunga ebyanzire eribindula emyatsi. Bakanza eribindula emighambo, erikola amaandamano, n’erimira abakulu b’epolitike abakabalagha erikokotya emyatsi. Aliwe itwe Bakristo tukakangiriribawa ‘eritendibya b’ekihugho’ n’eriyiketera Obwami bw’oMungu obukendisyabughaho erikolerwa muhanda lyosi. (Yoh. 17:16) Aliwe nomo bine bitya, tukayowa muhanda, n’oko ndambi silebe tukahitana omughulu tukalangira abandi bakakolerwa muhanda. Twanganayibulya tuti: ‘Omughulu ekyo kyamanihikira nitolere inakolaki? Hane ekyo nangakola lino omughulu ingye kutse oghundi twamakolerwa muhanda?’ Erisubirya oko mabulyo ayo, tutsuke twalebya Yehova na Yesu nga bakayowa bati omughulu abandu bamakolerwa muhanda.

YEHOVA NA YESU BAKAPONA OMUGHULU TUKAKOLERAWA MUHANDA

3. Busanaki tukayowa muhanda omughulu twamakolerwa muhanda? (Isaya 5:7)

³ EBiblia ikakangananya ekikaleka itwayowa muhanda omughulu twamakolerwa muhanda. Ikakanganaya ngoko Yehova mwatuhangyika omo kisosekanio kiwe kandi ngoko “anzire eritunganene n’obulingirirania.” (Esy. 33:5; Enz. 1:26) Syalitukolera muhanda, kandi syanzire omundu wosi-wosi akakolera oghundi yo muhanda! (Ebih. 32:3, 4; Mika 6:8; Zek. 7:9) Ng’eky’erileberyako, omo mughulu w’omuminyereri Isaya, eBiblia yiti Yehova mwowa “emilake y’obulighe” y’Abaisraeli bangyi ababya bakakolerwa muhanda n’Abaisraeli balikyabo. (Soma Isaya 5:7.) Yehova mwasuyira abandu abatalola embere erikwama emighambo yiwe n’erikolera abandi bo muhanda.​—Isa. 5:5, 13.

4. Eky’erileberyako ekiri omo Syoenjili kikakanganaya kiti ngoko Yesu syalyanza abandu bakakolerwa muhanda? (Ulebaye n’epitsa.)

⁴ Nga Yehova, Yesu naye anzire obulingirania kandi akapona omughulu twamakolerwa muhanda. Kiro kighuma, Yesu mwalangira omulume mughuma oyo wabya n’ebyala ebilehemire. Yesu mwamukwira obulighe, amamulamya. Aliwe abasondoli b’ebisomo mubahitana. Omo mwanya w’eritsema bakalangira omulume oyo isyakighalawa, mubabugha bati Yesu amaketa omughambo we Sabato. Yesu mwayowa ati busana n’ekyo? Mwakwa “obulighe bunene busana n’emitima yabo eyikalire.”​—Mar. 3:1-6.

5. Ni kyahi ekyo tutolere itwibuka omughulu twamahitana busana n’erikolerwa muhanda?

⁵ Yehova na Yesu bakahitana omughulu tukakolerawa muhanda. Neryo si muhanda netu erihitana. (Efe. 4:26) Aliwe, litolere itwibuka ngoko nomo twangahitana tuti, sitwangatoka eribughaho erikolerwa muhanda. Twamabisighala itunahitene oko mughulu muli itwanganalwala. (Esy. 37:1, 8; Yak. 1:20) Neryo litolere itwakolaki omughulu twamakolerwa muhanda? Eky’erileberyako kya Yesu kyanganatuwatikya.

YESU MWAKOLAKI OMUGHULU ALANGIRA ABANDU BAKAKOLERWA MUHUANDA

6. Abandu ibakakolerawa bati omughulu Yesu abya oko kihugho? (Ulebaye n’epitsa.)

⁶ Yesu mwalangira abandu bangyi bakakolerwa muhanda omughulu abya oko kihugho. Mwayilangirira abasondoli b’ebisomo bakakalirya abandi b’engebe. (Mat. 23:2-4) Kutya mwayilangirira ngoko abatabali be Roma babya bakakolera abandi bo muhanda kutsibu. Neryo busana n’ekyo Abayahudi bangyi mubanza eribya bwiranda erilua omo byala by’Abanya Roma. Nibya abaghuma ba kubo mubatsukisya ebikuto by’erilwa n’Abanya Roma. Aliwe Yesu mwatatsukisya kutse eribya n’omo kikuto n’ekighuma eky’eribindula emyatsi. Nibya omughulu abandu basonda erimuyira mo mwami, mwalua aho bali amayighendera.​—Yoh. 6:15.

7-8. Busanaki Yesu mwatasonda eribughaho erikolerwa muhanda omughulu abya oko kihugho? (Yohana 18:36)

⁷ Omughulu Yesu abya oko kihugho mwatasondekania erikola haghuma n’abatabali b’oko mughulu oyo busana n’eribughaho erikolerwa muhanda. Busanaki? Kundi abya asi ngoko abandu sibawite ehamuli, nibya n’obutoki bw’eriyisondola. (Esy. 146:3; Yer. 10:23) Kandi abya asi ngoko abandu sibangatoka eribughaho ebikaleka ibaghalawa. Sitani yukatabala ekihugho. Ni mwiti, n’abandu bangyi bakakola ng’iye omw’ikolera abandu bo muhanda. (Yoh. 8:44; Efe. 2:2) Nibya n’abandu abuwene kutsibu sibangatoka eribya bakakola mughulu wosi ebyuwene kundi sibahika-hikene.​—Omug. 7:20.

⁸ Yesu abya asi ngoko Obwami bw’oMungu busa bo bukendisyabughaho ebyosi ebikaleka itwakolerwa muhanda. Busana n’ekyo mwakolesya endambi n’akaghala kiwe “akatulira n’eritulaghania engulu mbuya y’Obwami bw’oMungu.” (Luka 8:1) Omo nzira eyo mwakirania abandu ababya bakalindirira n’engumbu nene enduli y’amaligho n’obubi bosi. (Mat. 5:6; Luka 18:7, 8) Ebitunga by’abandu ebikanza eribindula emyatsi si byo bikendisyabughaho amaligho ayo, aliwe b’obutabali b’oMungu bw’elubula ‘obute bw’ekihugho kino.’​—Soma Yohana 18:36.

UKWAME EKY’ERILEBERYAKO KYA YESU OMUGHULU WAMALANGIRA ABANDU BAKAKOLERWA MUHANDA

9. Niki kyo kikaleka iwikirirya ngoko Obwami bw’oMungu busa bo bukendisyabughaho ebyosi ebikaleka itwakolerwa muhanda?

⁹ Munabwire abandu bakakolerawa muhanda kutsibu nibya kulenga omughulu Yesu abya oko kihugho. Aliwe Sitani n’abandu abatahika-hikene abakasondolawa naye bo bakinaleka abandu ibaghalawa omo “biro by’enduli” bino. (2 Tim. 3:1-5, 13; Erib. 12:12) Netu nga Yesu, tunasi ngoko Obwami bw’oMungu busa bo bukendisyabughaho emyatsi yosi eyikaleka itwakolerwa muhanda. Kundi tukatula Obwami bw’oMungu, situliyingiraya omo maandamano kutse eriyiketera obutabali bulebe tuti bo bukendisyabughaho erikolerwa muhanda. Tulebaye ekyahikira mwali wetu mughuma oyukahulawamo Stacy.a Embere aminye ekwenene, Stacy iniabeghere eriyingirya omo bikuto by’abandu abakanza eribindula emyatsi. Aliwe mwatsuka eritika-tikira ebyo abya akakola. Akabugha ati: “Omughulu twabya tukakola amaandamano, ingayibulaya oluhande olo niriko nga lunatolere. Aliwe lino nabiribya oko luhande oluwene kundi ngimira Obwami bw’oMungu. Ninasi ngoko Yehova yukendisyabughaho amaligho wosi, omwatsi ogho nitenangatoka erikola.”​—Esy. 72:1, 4.

10. Ebikuto ebikasonda eribindula emyatsi sibihambene biti n’erihano rya Yesu eliri omo Matayo 5:43-48? (Ulebaye n’epitsa.)

¹⁰ Abandu bangyi abakayingiraya omo bitunga ebikanza eribindula emyatsi bakahitana kutsibu, eriketa emighambo n’erihutalya abandi. Yesu kw’atatukangiriraya atya. (Efe. 4:31) Mughala wetu oyukahulawa mo Jeffrey akabugha ati: “Abakakola amaandamano banganatsuka omo buholo. Aliwe enyuma w’aho, banganabinduka n’eritsuka eritsandya n’eriiba ebindu, nibya n’erihutalania.” Aliwe, Yesu akatukangiriraya erikolera abandu bosi b’omo lwanzo, nibya n’abatelighirana netu kutse abakatwendereraya. (Soma Matayo 5:43-48.) Itwe Bakristo, situlikola ekyosi-kyosi ekitahambene n’eky’erileberyako kya Yesu.

11. Niki kyo kyangaleka ikyatukalako erikwama eky’erileberyako kya Yesu?

¹¹ Nomo tunasi ngoko Obwami bw’oMungu bo bukendisyabughaho losi erikolerwa muhanda, kyanganatukalako erikwama eky’erileberyako kya Yesu omughulu n’itwe bakakolera muhanda. Tulebaye ekyahikira Janiya, oyo wasololawa busana n’erangyi y’engobi yiwe. Akabugha ati: “Ebyo abandu babya bakanibughako mubyaleka inayowa muhanda kutsibu. Munahitana kutsibu, n’eribugha niti kumbe balyasuyirawa. Neryo munalengekania okw’iyighunga n’abandu ababya bakalwira okw’itendisolola abandi busana n’erangyi y’engobi yabo. Munalengekania niti erikola nitya ryanganakokotya emyatsi.” Aliwe endambi ikalaba, Janiya mwalangira ngoko atolere eribindula amalengekania wiwe. Akatasyabugha ati: “Munalangira ngoko omo mwanya w’eriyiketera Yehova munatsuka erikirirya ebyo abandu babya bakabugha n’eriyiketerabo. Neryo munayisogha erilua omo bikuto ebyo.” Nomo si muhanda erihitana omughulu twamakolerwa muhanda tutolere itwayiteya ekyo isikyaleka itwayingirya omo myatsi y’epolitike y’ekihugho kino.​—Yoh. 15:19.

12. Busanaki ni ky’amenge eribya tukasombola esyongulu esyo tukakwama?

¹² Niki kyo kyangatuwatikya erisighala itunatulere omughulu twamakolewa muhanda? Ekyabiriwatikya abandu banene ry’eribya bakasombola ndeke emyatsi eyo bakasoma, eyo bakahulikirira, n’eyo bakalebaya. Esyongulu silebe sikakolawa busana n’erihitania abandu kutse busana n’eribahiramo omutima w’eriyilungumula oko matabali. Kangyi-kangyi abakatula esyongulu sibalibugha emyatsi ngoko yilue. Nomo twanganowa omwatsi w’ekwenene owakakanganaya ngoko abandu balebe banemukolerwa muhanda, sitwangatoka erisoha olubanza olo omw’ilola embere erisoma omwatsi oyo. Twamabilabya endambi nene tukahulikirira kutse erisoma esyongulu esiri ng’esyo itwanganahangya-hangya n’erihitana. (Misyo 24:10) N’ekibi oko byosi, twanganaleka erihira Obwami bw’oMungu bw’embere omo ngebe yetu n’eribirirwa ngoko bo bukendisyabughaho amaligho wosi.

13. Eribya n’eprograme eyuwene y’erisoma eBiblia, lyanganatuwatikya liti omughulu twamakolerwa muhanda?

¹³ Eribya n’eprograme eyuwene y’erisoma eBiblia n’erilengekania oko ebyo tukasoma lyanganatuwatikya omughulu tukakolerawa muhanda. Mwali wetu oyukahulawa mo Alia mwayowa muhanda kutsibu akalangira abandu b’ewabo bakakolerwa muhanda. Mwahitana kundi ababya bakakola batya mubatasuyirwa. Ekyamuwatikaya niki? Akabugha ati: “Munalengekania n’eriyibulya niti, ‘Kwenene ninikirirye ngoko Yehova akendisyasoha esyombanza syosi esi?’ Neryo munasoma Yobu 34:22-29. Emilondo eyo muyanibukya ngoko sihali ekibiseme omo meso wa Yehova. Iye musa yo wasi ndeke obulingirirania nga niki, kandi iye musa yukendisyakokotya emyatsi y’olosi.” Tukalindirira Obwami bw’oMungu eribughaho esyombanza syosi, ni kyahi ekyo tutolere erikola lino?

EKYO TUTOLERE ERIKOLA LINO

14. Ni mwatsi mughuma wahi ogho twangakola lino? (Abanya Kolosai 3:10, 11)

¹⁴ Sitwangatoka eribindula ngoko abandu bakakolera abandi, aliwe twanganatoka eribya tukakolera abandi bo ndeke. Ngoko tulyalangira tukakwama eky’erileberyako kya Yesu omw’ikangania abandi b’olwanzo. Olwanzo lukatukuna erikolera abandu bosi bo ndeke, nibya n’abakatwaghalaya. (Mat. 7:12; Rom. 12:17) Yehova akatsema omughulu tukakolera abandu bosi bo ndeke.​—Soma Abanya Kolosai 3:10, 11.

15. Tukawatikaya tuti abandu omw’ibwirabo oko ebyo eBiblia ikakangiriraya?

¹⁵ Enzira ngulu y’eriwatikyamo abandu ry’eribwirabo oko myatsi eyuwene eyiri omo Biblia. Busanaki tukabugha tutya? Kundi omughulu abandu bakaminya Yehova n’eryanza erimutsemesya, bakakola esyombinduka n’eribya bandu babuya n’abakakanganaya olwanzo. (Isa. 11:6, 7, 9) Ng’eky’erileberyako, embere omulume mughuma oyukahulawa mo Jemal ighe ekwenene, mwayingirya omo kikuto ky’abandu ababya bakasonda eribindula obutabali b’omo kihugho kyabo. Akabugha ati: “Siwangakasa abandu eribinduka. Mundakaswa eribinduka. Aliwe ekwenene eyiri omo Biblia yo yanibindula.” Ebyo Jemal igha mubyamukuna erileka amalwa. Neryo omughulu tukakangiriraya abandi b’ekwenene eyiri omo Biblia, ekyo kyanganabawatikya erileka erikola emyatsi eyikahutalaya abandi.

16. Busanaki uyisoghire kundu eritula engulu mbuya y’Obwami?

¹⁶ Netu nga Yesu, tukabya n’engumbu nene ey’eribwira abandu ngoko Obwami bw’oMungu busa bo bukendisyabughaho losi erikolerwa muhanda. Amaha ayo akasikaya mutima abandu ababirikolerwa muhanda. (Yer. 29:11) Stacy, oyo twabikaniako akabugha ati: “Eriminya ekwenene lyabiriniwatikya eribya ngasighala ininatulere omughulu ingye kutse abandi twamakolerwa muhanda. Yehova akakolesaya ebiri omo Biblia eritukirania.” Eritoka erikirania abandi erilabira emyatsi eyo, tutolere itwatsuka eriminyayo ndeke. Twamabikirirya kundu emyatsi y’ekwenene eyiri omo Biblia eyo twamabigha omo mwatsi ono, itukenditoka eribwirayo abandi, ibye oko kalasi kutse oko mubiiri.b

17. Yehova akatuwatikaya ati omughulu twamakolerwa muhanda?

¹⁷ Tunasi ngoko tukendilola embere erikolerwa muhanda kundi Sitani, “omutabali w’ekihugho” kino akineho. Aliwe tukalindirira ‘aghusawe ehihya’, Yehova anemutuwatikya n’erituha amaha. (Yoh. 12:31) Erilabira Amasako, Yehova akatukanganaya ebikaleka abandu ibakolerwa muhanda kutsibu kandi ngoko akayowa busana n’ekyo. (Esy. 34:17-19) Erilabira Omughala wiwe, Yehova akatukangiriraya ngoko twangakola omughulu twamakolerwa muhanda n’eritukangania ngoko hakisiya biro bike Obwami bwiwe ibwabughaho losi erikolerwa muhanda ryosi. (2 Pet. 3:13) Neryo tulole embere eritula n’omuhwa engulu mbuya y’Obwami obo tukalindirira n’engumbu nene omughulu ogho ekihugho kyosi kikendisyusulamo “obulingirirania n’eritunganene.”​—Isa. 9:7.