Omwisi 4

Netu twamanza eribana engebe y’erikota, litolere itwabya n’obwikirirya omo mbanulo. Ekyo kikendisyatokekana oko bandu bangyi. (Efe. 1:7) Abandu abo Yesu ahula mo “sindi mbuli” sibalirya kandi sibangalya omukati n’erinywa edivai omughulu w’Akalyo k’Erigholo-gholo k’Omukama. (Yoh. 10:16) Nomo bine bitya, nabo bakabana endundi omo mubiri n’omusasi wa Yesu Kristo. Bakakola batya omw’ibya n’obwikirirya omo mbanulo ya Yesu. (Yoh. 6:53) Aliwe, abandu abakalya omukati n’erinywa edivai bakakanganaya ngoko babiringira omo ndaghane nyihya-nyihya kandi ngoko bali n’amaha w’eritabala elubula omo Bwami bw’oMungu. Nomo twangabya oko abahirirweko amaghuta kutse oko esindi mbuli, ni ky’omughaso munene kutsibu okw’itwe itwabya n’obwikirirya obuwatire omo mbanulo tutoke erisyabana engebe y’erikota. w24.12 13 enu. 14, 16

Akalya Akalyo k’erigholo-gholo k’Omukama, Yesu mwaha abigha biwe omukati owatemo elevire n’eribabwira ati omukati oyo akasosekanaya omubiri wiwe. Neryo mwahabo n’ekikombe ky’edivai ati banywekyo n’eribwirabo ati, eki kikasosekanaya “omusasi waghe w’endaghane.” (Mar. 14:22-25; Luka 22:20; 1 Kor. 11:24) Ekyo abugha oko ndaghane eyo ni ky’omughaso munene. Endaghane nyihya-nyihya eyo muyitakolwa n’abandu bosi, aliwe muyakolwa “n’enyumba ye Israeli [y’obunya kirimu]” abakendisyabya “omo Bwami bw’oMungu.” (Ebr. 8:6, 10; 9:15) Ebyo Yesu abugha omughulu w’Akalyo k’erigholo-gholo k’Omukama bilebirye “ekihyo kike.” Abigha biwe bataleghula ababya kughuma naye bo babya b’erimbere eringira omo kikuto kike ekyo. w24.12 11 enu. 9-10

Yesu mwahoterwa n’omughuma w’oko bira biwe b’oko ndungu. Neryo esyonzighu musyamuhamba, syamamutsumanga n’erimulegha oko myatsi eyo atakola. Neryo mubamutswera oluholo n’erimwaghalya. Oko ndulya abasuda mubahira Yesu y’oko muti batoke erimwita. Akayiyinia butaleghula oko malighe ghosi ayo, habya ihane omundu oyunemwaghalwa kutsibu kulenga. Omundu oyo ni Yehova. Abya anzire Mughala wiwe yo kutsibu. Neryo busanaki mwatakakirya eryaghalwa n’erihola liwe? Omo kikuhi ni kundi atwanzire. Eriyiherera lya Yesu w’omwatsi mukulu owakakanganaya ngoko Yehova akwanzire kutsibu. Mwaherera Mughala wiwe mwanzwa n’eriyiyinia oko bulumi bunene kutsibu atoke erikusabula oko rilolo n’oko luholo. (1 Yoh. 4:9, 10) Anzire eriwatikya obuli mughuma w’okw’itwe erimukolera lino nomo tuli bakola-nabi. w24.08 6 enu. 13-14

Tukabya twabilengekania ngoko mukyakala kutsibu oko Yehova akalangira Mughala wiwe akaghalibwa, tukayilangirira ndeke-ndeke ngoko atwanzire. Sitani mwabugha ati sihali omughombe w’oMungu n’omughuma oyukendisyasighala mutaleghula amabyaghalibwa kutsibu. Erikangania ngoko Sitani mwabiha, Yehova mwalighira Yesu aghalawe embere ahole. (Yobu 2:1-5) Yehova mwalangira abandu bakasekererya Yesu, abasuda bakamuhunza, n’erimukongomerera oko muti. Yehova mwalangira Mughala wiwe mwanzwa akahola oluholo olukaluma. (Mat. 27:28-31, 39) Yehova abya n’akaghala ak’erikakirya emyatsi eyo. (Mat. 27:42, 43) Aliwe, oMungu ng’akola atya, embanulo siyenditoka erilihwa, netu sitwendibya n’amaha. Neryo, Yehova mwaligha Mughala wiwe aghalibawe erihika okw’ihola. w25.01 22 enu. 7

Tuli ekiro 16, Omwisi we Nisani, 33 M.W. Abigha ba Yesu ni bandu b’obulighe kandi bakwire obuba bunene. Ababiri ba kubo banemulua e Yerusalema bakaya e Emau. Omulume mughuma amaluira enyuma syabo n’eritsuka erighenda kughuma nabo. Abigha abo bamatsuka erimukanirya oko myatsi mibi eyilyahikira Yesu. Aliwe omulume oyo amatsuka erikaniryabo emyatsi eyo sibendisy’ibirirwa n’ahake. “Eritsuka oko Musa n’omo Makangirirya wosi w’Abaminyereri,” omulume oyo mwakanganiabo busanaki Masiya abya atolere eryaghalwa n’erihola. Babere babihika e Emau, omulume oyo wabya akaghenda nabo mwababisulira ngoko iye yo Yesu, oyo wabirilubuka! (Luka 24:13-35) N’omo biro 40 ebyo mwayikangania kangyi-kangyi oko bigha biwe. Omo biro byosi ebyo, Yesu mwasikya mutima abigha biwe ababya bandu b’obulighe, kandi abakwire obuba. Neryo mubatasyabya n’obutseme, bamabana n’akaghala ak’eriyatulira n’erikangirirya engulu mbuya y’Obwami. w24.10 12 enu. 1-3

Ebiro bikalaba, omwana akahikira erikula butsira eriyikasa. Aliwe, omundu syangahikira erikula bunya-kirimu butsira eriyikasa. Ng’eky’erileberyako, abaghala n’abali betu abe Korinto mubaligha engulu mbuya, bamabatisibwa, bamabana ekirimu kibuyirire, kandi bamigha n’emyatsi mingyi oko ebyo Paulo akangirirayabo. (Emib. 18:8-11) Aliwe, emyaka milebe enyuma w’eribatisibwa, abangyi babya isibali bakula bunya-kirimu. (1 Kor. 3:2) Litolere itwanza eribya bandu abakulire bunya-kirimu imo twatoka erikula bunya-kirimu. Abandu “abanzire obukiru,” kandi banzire erisighala ngoko bali sibendisyakula bunya-kirimu. (Misyo 1:22) Sitwanzire eribya ng’abandu ababirikula kinya-mubiri aliwe ibakinalindirira ababuti babo eriyisogha omo mwanya wabo. Aliwe, itwe twanzire eriyisogha itw’ibene-bene erikangania ngoko tunemukula bunya-kirimu. Wamabya ighukinayikasa erihikira erikula bunya-kirimu, usabe Yehova akuhe ‘omuhwa n’obutoki bw’erikola utya.’​—Filip. 2:13. w24.04 4 enu. 9-10

Yehova akatubwira ngoko akayowa oko mwatsi w’eritswera abandu. (Ezek. 33:11) Yehova syangatoghotya omundu kera na kera isihali ekikaleka inyakola atya. Ni mughanyiri kutsibu kandi akaghanyira omughulu kyamatolera. Ni myatsi yahi eyo twasi oko bandu abatendisyalubukibwa? EBiblia yikakanaya oko bandu balebe abatendisyalubuka. Yesu mwakangania ngoko Yuda Iskariote syendisyalubukibwa. (Mar. 14:21; ulebaye na Yohana 17:12; n’ebinywa by’eyikwa.) Yuda abya asi ngoko emyatsi eyo akakola siyiritsemesaya Yehova na Mughala wiwe, aliwe mwayiririra. (Ulebaye Mariko 3:29; n’ebinywa by’eyikwa.) Kandi Yesu mwabugha ati abakulu balebe b’ebisomo ababya bakaghana erimuhulikirira bendihola isibawite amaha w’erisyalubukibwa. (Mat. 23:33) Paulo naye mwakangania ngoko abandu abatesuba oko mitima yabo sibendisyalubukibwa.​—Ebr. 6:4-8; 10:29. w24.05 4 enu. 10-11

Omughulu tukasighala hakuhi na Yehova, Sitani syangatukolako omwatsi owangatuhutalya kera na kera. (1 Yoh. 3:8) Omo kihugho kihya-kihya ekikasa, Yehova akendisyalola embere eriteya abira biwe bataleghula okw’ebyosi ebyangabahutalya bunya-kirimu, aliwe kandi n’oko luholo. (Erib. 21:4) Ni lusunzo lunene eribya mugheni omo hema ya Yehova, kundi twanganabya n’obwira obuwene haghuma naye. (Ezek. 37:27) Neryo twamanza erilola embere eribya bagheni biwe, litolere itwayighendya tuti? Omughulu ukabirikirawa omo nyumba y’omundu mulebe, ukanza uti ngambe iwakola emyatsi eyangatsemesya omwinye-nyumba eyo. Ko bine bitya n’oko banzire erilola embere eribya bagheni omo hema ya Yehova. Ngambe ibaminya ebyo Yehova akabasaba. Olwanzo lwetu oko Yehova lukatukuna erikola ngoko twangatoka “erimutsemesya ndeke-ndeke.” (Kol. 1:10) Silitolere tukabirirwa omwatsi oyo n’ahake kandi mughulu wosi ngambe itwabya tukamusikya kutsibu. Erimusikya kutsibu lyanganatuwatikya eritendikola emyatsi eyo syanzire. Mughulu wosi twanzire “erirendera [n’oMungu] n’eriyikehya.”​—Mika 6:8. w24.06 4 enu. 8-9

Yehova mwasaba Abrahamu, omulume w’obwikirirya omwatsi owakalire kutsibu. Mwamubwira ati aherere mughala wiwe ye Isaka. Eribugha ekwenene, alinga omwatsi oyo mwakala kutsibu oko Abrahamu. Nomo bine bitya, Abrahamu mwakola ekyo Yehova amusaba. Abrahamu abere akasonda eriita omwana wiwe, oMungu mwamukakirya. Yehova mwaminya ngoko Abrahamu endyaghalwa kutsibu amabikera omwana wiwe. Omwatsi oyo abya akakangania ekyo Yehova endikola omo biro ebikasa. Endiherera Mughala wiwe mwanzwa mo buhere. Yehova anzire abandu bo kutsibu erihika oko kika ekyo. (Enz. 22:1-18) Abere abiha Abaisraeli b’emighambo, Yehova mwasababo eribya bakaherera esyonyama amalolo wabo atoke erighanyirwa. (Law. 4:27-29; 17:11) Obuhere obo ibukakanganaya ngoko Yehova enditeka obuhere bunene kutsibu obw’endilusyaho erilolo olosi. OMungu mwabwira abaminyereri biwe ati bahandike omwatsi w’olubuto olo abirilagha. Mubabugha bati Omughala w’oMungu endyaghalibwa n’eriitwa. Neryo, Yehova mwalagha ati akendisyaherera Mughala wiwe mwanzwa mo buhere, abandu batoke erisabulwa erilua omo rilolo n’oluholo. Kandi mwakolagho busana naghu kutya.​—Isa. 53:1-12. w24.08 4 enu. 7-8

Omughulu ukasoma eBiblia ubye ukalengekania nga wangakolesya ghuti ebyo ukasoma. Wabisoma omwatsi mulebe w’omo Kinywa ky’oMungu, yibulaye uti: ‘Nangakolesya niti omwatsi ono lino, kutse omo biro ebikasa?’ Ng’eky’erileberyako, tubughe tuti unemusoma 1 Abanya Tesalonika 5:17, 18. Enyuma sy’erisoma emilondo ibiri eyo wanganimana hake, neryo iwayibulya nga ukanasaba kangyi-kangyi, kandi nga ukanasaba ebikalua oko mutima. Kandi wanganalengekania oko myatsi eyo utolere iwakanganiryamo erisima lyaghu. Kwamuhwa ukendiyisogha erisima Yehova busana n’emyatsi isatu. Nomo wanganalabya akatambi kake ukalengekania oko myatsi eyo ukasoma omo Kinywa ky’oMungu, ekyo kikendikuwatikya eryowa emyatsi yo ndeke, n’erikolesya ebyo kikabugha. Ulengekanaye oko ndundi eyo ukabana wamabya ukalengekania oko myatsi eyo ulyasoma omo Biblia n’eyo wabirisoma. Ekyo ikikendikuwatikya eribya mughombe mubuya wa Yehova. w24.09 4-5 enu. 9-10

Yehova mwatubumba n’obutoki bw’embaghane. Mwatuhangyika n’obutoki bw’eribya n’obutseme bungyi omughulu tukahitaya kwilaba omughulu tukahabawa. Tukayowa ndeke omughulu tukawatikaya Abakristo bali kyetu. Kandi tukatsema omughulu abo tulyawatikaya bamatusima. Nomo abo tulyawatikaya banganatenditusima, twanganabya n’obutseme kundi itwabirikola ekyuwene. Ngambe isitwanatabirirawa ngoko Yehova awite obutoki obw’erituha ebingyi. (2 Emya. 25:9) Kwesi, obuli kiro, Yehova akendisyakuha ebingyi kwilaba ebyo ukahitaya. Kandi sihali obutseme obulengire erihembwa na Yehova. Kwesi, muleke tuyisoghe kundu erilola embere erihitya nga Tata wetu w’elubula. w24.09 31 enu. 20-21

Yehova ni mughanyiri kandi akakwira abandu b’obulighe. (Esy. 103:13; Isa. 49:15) Omughulu tukaghalawa, naye akaghalawa. (Zek. 2:8) Akatuwatikaya erimuminya n’eribya bira biwe. (Esy. 25:14; Emib. 17:27) Kandi akayikehaya; “Akunama akalebya olubula n’ekihugho. N’erisumba omundu w’ahisi erilua omo lututu.” (Esy. 113:6, 7) Emyatsi yosi eyo yikaleka itwanza eriha oMungu wetu mukulu y’olukengerwa. Tukaha Yehova y’olukengerwa kundi twanzire abandi nabo ibamuminya. Abandu bangyi sibasi ekwenene oko Yehova. Busanaki? Ni kundi Sitani abiriliba obwenge bwabo omw’ilalaghania amabehi awakalire oko Mungu. (2 Kor. 4:4) Sitani abirilighisya abandu ngoko Yehova ni mutsibu, syatutsomene, kandi yukaleka itwaghalwa oko kihugho kino. Aliwe, tunasi ekwenene oko Mungu wetu! Tuwite akanya ak’eribwira abandu oMungu nga nindi kwenene-kwenene n’eriwatikyabo erimupipa.​—Isa. 43:10. w25.01 3 enu. 6-7

Oko karne k’erimbere, Omughala w’oMungu oyuhika-hikene ye Yesu, mwakola ebitiko-tiko ebikaswekaya. Nomo byanabya bitya, Sitani mwakuna abandu ababya oko luhande lwiwe eribugha amabehi oko Yesu. Ng’eky’erileberyako, abasondoli b’ebisomo ibakabwira abandu bati “omutabali w’esyombinga” yo wabya akaha Yesu y’obutoki bw’erihigha esyombinga. (Mar. 3:22) Yesu abere akatondesibwa, abasondoli b’ebisomo mubamutsongera ambu mwakatsuma oMungu kandi mubatsotsya abandu erimwitisya. (Mat. 27:20) Enyuma, abigha ba Yesu ibanemutula engulu mbuya, esyonzighu syabo musyatsotsya “abandu b’ebihanda n’eribahiramo amalengakania awatuwene” w’eryendererya Abakristo abo. (Emib. 14:2, 19) Kakakania oko risako ly’Emibiiri 14:2, Akaleberyo k’Omuteya k’ekiro 1 Omwisi 12, 1998, mukabugha kati abandu ababya oko luhande lwa Sitani mubaghana omwatsi ogho Abakristo babya bakatula kandi ibakababughako emyatsi eyituwene kusudi abandu baponebo kandi sibabye bakahulikirirabo. Na munabwire, Sitani “[anemutebya] ekihugho kyosi.” w24.04 11 enu. 15; 13 enu. 16

Endambi eyo omundu asyaholerako yo yitendisyaleka omundu iniabana engebe y’erikota. Yehova ni Mutsweri oyutunganene, ni bugha ambu akatswera ndeke kandi omo ritunganene. (Esy. 33:4, 5) Twanganikirirya ngoko “Omutsweri wʼekihugo kyosi” akendisyakola ebitunganene. Kandi twanganabugha tuti aho omundu alyaholera kyo kite kyangaleka iniabana engebe y’erikota. Yehova syendisyatswera amamilioni w’abandu abatabana akanya k’eryowa oko ngulu mbuya y’Obwami busana n’eyo bikere mo “syombene.” (Mat. 25:46) Omutsweri w’ekihugho kyosi oyutunganene atsomene abandu abo kulenga ngoko itwe twangatsomanabo. Sitwasi Yehova ng’akendisyatswera abandu abo ati omughulu w’eryaghalwa rinene. Alinga, abaghuma ba kubo bakendisyabana akanya k’erigha oko Yehova, erimwikirirya, n’erisombola eribya oko luhande lwiwe omughulu ak’endisyaminyikalya erina liwe oko bandu bosi.​—Ezek. 38:16. w24.05 12 enu. 14-15

Abandu ba Yehova banzire eriwatikania. (2 Kor. 8:4) Aliwe hakanabya endambi ekyo ikyasaba obutubaha. Ng’eky’erileberyako, omughulu w’evita, abasyakulu banganalangira ngoko abaghala n’abali betu balaghire okw’isikibwa mutima, kwamuhwa obuwatikya b’obunya-kirimu kutse obw’ekinya-mubiri. Abasyakulu b’endeko banzire abaghala n’abali babo, n’ekyo kikaleka ibahabo ebyo balaghireko nomo engebe yabo yanganabya omo bwiko bakasulubirirabo. Omo mighulu eyikalire ng’eyo litolere itwabya bowa tutoke eribya omo bughuma. Litolere iwakwama obusondoli bw’Ebeteli y’ewenyu. (Ebr. 13:17) Abasyakulu batolere ibabya bakayibukya kangyi-kangyi obusondoli obw’erikwama omughulu hamabya ekitsinduli. (1 Kor. 14:33, 40) Ubye mutubaha aliwe ighunemuyiteya. (Misyo 22:3) Ukolesaye amenge. Ngambe iwayilandako. Uyiketere Yehova. Anganakutokesya eriwatikya abaghala n’abali benyu ighune mbolere. w24.07 4 enu. 8; 5 enu. 11

Omwami Daudi mwaminya Yehova n’eriyiketera iye. Omughulu Omwami Sauli n’abandi, basonda eriita Daudi, Daudi mwasaba Yehova y’obuwatikya. OMungu abere abisubirya oko misabe yiwe n’erimusabula, Daudi mwabugha ati: “[Yehova] aneho!” (Esy. 18:46) Daudi abya akasonda eribugha ngoko Yehova ni Mungu w’ekwenene kandi oyo akawatikaya abaghombe biwe mughulu wosi. Daudi mwaminya ngoko Yehova anasi ebyo anemulabamo kandi anayiteghekire erimuwatikya. Ekyo mukyahira omo Daudi mo muhwa w’erilola embere erikolera Yehova n’erimupipa. (Esy. 18:28, 29, 49) Erikirirya ngoko Yehova ni Mungu oyuliho kyanganatuwatikya erimukolera n’omuhwa. Itukendibya n’akaghala ak’eriyiyinia omo maligho n’ekyo ikyatuhiramo omuhwa w’erilola embere erikolera Yehova yo kutsibu omo mubiiri wiwe. Kandi itwanganayitsinga kundu erisighala bira ba Yehova. w24.06 20-21 enu. 3-4

Ebinywa ebyo omukwenda Paulo ahandikira Abanya Tesalonika byanganatwighisyaki? Twamabyowa omwatsi mulebe owatahambene n’ebyo twabirigha omo Biblia kutse twamabyowa omwatsi w’esyoambu owakaswekaya, ngambe isitwalighalo luba-luba. Omo Burusi bwa kera, esyonzighu syetu musyaha abaghala betu b’ebaruha sikatebabo siti yikasira oko bwikalo bwetu bukulu. Ebaruha eyo muyahamulira abaghala betu balebe eritsukisya eyindi ndondeka yabo. Ebaruha eyo yabya yilangirikire nga ni y’ekwenene. Aliwe abaghala betu bataleghula mubatatebibwa. Mubalangira ngoko ebiri omo baruha eyo sibihambene n’ebyo babirikangiriribwa. Munabwire, ndambi silebe esyonzighu syetu sikakolesaya e Enternete sikasonda erituteba n’eritughabula. Omo mwanya ‘w’eritebibwa luba’ twanganayiteya oko myatsi eyo tukowa n’eyo tukasoma omw’iyibulya nga yinahambene n’ekwenene eyo twabirigha.​—2 Tes. 2:2; 1 Yoh. 4:1. w24.07 12 enu. 14-15

Eriyisogha ry’omughaso munene eryo tukakola ry’eriyiherera oko Yehova n’eringira omo kihanda ky’abaramya biwe. Yehova anzire obuli mundu inyakola ekyo. Busanaki? Anzire ibabya n’obwira obuwene kughuma naye n’erisyabyaho kera na kera. (Ebih. 30:19, 20; Gal. 6:7, 8) Aliwe, Yehova syalikasa omundu erimukolera. Akalekera obuli mundu obwiranda bw’eriyisombolera ekyo akendikola. Neryo, abasyakulu banganakolaki Omukristo oyubatisibwe amabikola erilolo erikalire? Amatendibindula omutima, litolere inyalusibwa omo ndeko. (1 Kor. 5:13) Aliwe, nomo bine bitya, Yehova anzire omundu oyo inyabindula omutima n’eritasyabya n’obwira obuwene haghuma naye. Oko kwenene, oyo wo mwatsi mukulu owaleka Yehova inyateka embanulo: atoke erighanyira abakola-nabi abakabindula emitima. OMungu wetu w’olwanzo akalemba-lemba abakakola amalolo awakalire ati babindule emitima.​—Zek. 1:3; Rom. 2:4; Yak. 4:8. w24.08 14 enu. 1-2

Omughulu omukwenda Yohana ahandika ebaruha yiwe y’akasatu, abandu balebe babya ibanemulalaghania amakangirirya w’amabehi n’erighaba endeko. Aliwe abandi babya ibanemulola embere ‘erikwama ekwenene. Babya bakakwama ebyo Mungu akatusaba kandi ‘babya bakakwama ebyalayiro biwe.’ (2 Yoh. 4, 6) Abakristo bataleghula abo mubaleka Yohana inyatsema, na Yehova kutya. (Misyo 27:11) Ebinywa bya Yohana byamatwighisyaki? Byamatwighisya ngoko twamabibya bataleghula oko Yehova, itukendibya n’obutseme n’erileka abandi ibatsema. (1 Yoh. 5:3) Eky’erileberyako, tukabya n’obutseme kundi itunasi ngoko tunemutsemesya Yehova. Naye akatsema akalangira ngoko tunemughana emyatsi y’ekihugho n’eriligha ekwenene. Abamalaika abali elubula nabo bakatsema. (Luka 15:10) Netu tukatsema omughulu tukalangira abandi bakasighala bataleghula. (2 Tes. 1:4) Ekihugho kino kikendisyabya kyabilaba, tukendisyatsema kundi mutwasighala bataleghula oko Yehova nomo twanabya omo kihugho ekikasondolawa na Sitani. w24.11 12 enu. 17-18

Litolere iwayiteghererya omundu oko mughulu mungahi embere sy’erimubwira ngoko umwanzire? Wamabikania n’omundu mulebe luba inyanganalangira nga sighulilengekanaya ndeke embere sy’eriyisogha. (Misyo 29:20) Aliwe kandi wamabihiraho omughulu muli embere sy’eribwira omundu oyo ngoko wabiri mwanza, inyangalangira nga ukatika-tika kutsibu embere sy’eriyisogha. (Omug. 11:4) Wibuke ngoko embere sy’eriyakania n’omundu mulebe ngambe isiwalw’iwayibwira uti omundu oyo, yo ukendisyalunga naye. Aliwe litolere iwabya iwabiriyiteghekania ndeke oko ndwa, kandi iwalebya ndeke omundu oyo wamasombola ng’anakutolere. Wangakolaki wamabiminya ngoko omundu mulebe akwanzire? Wamabya isighumwanzire, isiwayiwata ng’umwanzire. Sikyuwene erileka omundu inyalengekania ati alinga ukenditsukisya obwira naye aliwe iko bite bitya.​—Efe. 4:25. w24.05 22-23 enu. 9-10

Abahirirweko amaghuta oko kwenene, kandi abakendisyasighala bataleghula bo bakendisyaghenda haghuma na Yesu omo Bwami bw’elubula. Omukristo wosi-wosi oyuhirirweko amaghuta amatendilola embere eriteya isyendisyahindanibwa kughuma “n’abasombolwa.” (Mat. 24:31) Kandi n’abosi abawite amaha w’erisyabyaho kera na kera oko kihugho, nabo batolere erilola embere eriteya n’erisighala bataleghula. Kundi twabiriminya Yehova yo ndeke, tulighire kundu ngoko ebyosi ebyo akakola bitunganene. Situlihanga-hangaya Yehova amabisombola erihira oko bandu balebe kw’amaghuta oko mughulu wetu. Tukibuka ngoko, omo musyo wiwe w’eririma ry’emizabibu, Yesu mwakania oko bahingyi ababirikirawa erisyakola omo ririma ry’emizabibu oko saa kumi na moya. (Mat. 20:1-16) Ababirikirawa erisyakola oko saa kumi na moya mubahabwa obuhingyi bughumerera n’abatsinduka omwirima. Ko bine bitya n’oko abahirirweko amaghuta. Nomo bangasombolwa oko ndambi yahi, bakendisyahembwa ekihembo kyabo ky’elubula bamabisighala bataleghula. w24.09 24 enu. 15-17

Yesu mwatukangania ekyo litolere itwabya tukakola omughulu bamatukolera muhanda. Naye, abandu bangyi mubamukolera muhanda, nibya n’abatunga biwe. Abatunga biwe ababya isibalibamwikirirya mubabugha bati abiribya musire, abakulu b’ebisomo mubabugha bati akakanaya n’esyombinga, n’abasuda be Roma mubamusekererya, mubamwaghalya, n’erimwita. (Mar. 3:21, 22; 14:55; 15:16-20, 35-37) Aliwe, Yesu mwayiyinia omo byosi ebyo, kandi mwatakola ekituwene. Ekyo kyamatwighisyaki? (1 Pet. 2:21-23) Yesu mwatukangania ekyo litolere itwabya tukakola omughulu bamatukolera muhanda. Abya asi endambi y’eribugha n’ey’eribya bukutu. (Mat. 26:62-64) Isyalisubiraya oko buli katsi akatuwene ako babya bakamubughako. (Mat. 11:19) Iniakabya abisala abugha, isyalitsamba esyonzighu siwe kutse erisaghisyasyo. w24.11 4-5 enu. 9-10

Tubughe tuti wamaha omundu mulebe oyo wasi ekindu kilebe ky’embaghane, ekyuwene, kandi ekyangamuwatikya. Omundu oyo amabibika ekihembo ekyo omo kasandu n’eribirirwakyo, ighukendiyowa muhanda! Aliwe, wanganatsema omundu oyo amabikolesya ekihembo ekyo n’erikusima busana nakyo. Eky’erileberyako ekyo kyamatwighisyaki? Yehova mwatuha Mughala wiwe ahole busana netu. Yehova akatsema kutsibu tukamukangania erisima lyetu oko kihembo ky’obughuli ekyo n’oko lwanzo lwiwe olwamukuna erituha ekihembo ekyo, ni bugha ambu embanulo! (Yoh. 3:16; Rom. 5:7, 8) Ebiro bikalaba, twanganatsuka eribirirwa eribya tukasima busana n’embanulo. Twamatendibya tukasima busana n’embanulo, kyanganabya nga twamabika ekihembo ekyo omo kasanduku, eyo sitwendibya tukalangirakyo, neryo itwabirirwakyo. Erikakirya omwatsi oyo, tutolere eribya tukasima oMungu na Kristo oko ebyo babiritukolera. w25.01 26 enu. 1-2

Omughala wetu oyutolere eribya musyakulu syabye mundu oyulikiriraya Kristo yo lino-lino. Ekyo si bugha ambu abye iniabiribugha emyaka mingyi iniabiribatisibwa, aliwe litolere iniabya iniabiribya Mukristo oyukulire, n’ekyo kikasaba endambi. Nga Yesu, litolere iniabya n’omubere w’eriyikehya n’erilindirira inyanatulere omughulu Yehova akendisyalangira ikyamatolera erimuha amadaraka omo ndeko. (Mat. 20:23; Filip. 2:5-8) Litolere iniakangania ngoko ni “mutaleghula” omw’ibya oko luhande lwa Yehova n’erikwama esyokanuni siwe esitunganene, n’erikwama obusondoli obukalua oko ndondeka yiwe. Amasako akakanganaya ndeke-ndeke ngoko abasyakulu b’endeko batolere ibabya ibasi erikangirirya. Ekyo kinasondire eribugha kiti wamabya ighukalabaya emikania eyuwene kutsibu, aho imowamatolera eribya musyakulu? Iyehe. Si b’abasyakulu bosi bo basi erikangirirya. Aliwe litolere ibabya ibanganatoka erikolesya ndeke eBiblia omughulu bakahubiraya, erikangirirya, n’erisikya abaghala n’abali babo bo mutima. w24.11 23-24 enu. 14-15

Omughulu wamasoma omwatsi mulebe w’omo Biblia, neryo sighutowagho ndeke, kwesa-kwesa emyatsi. Neryo, omo musibo wosi, ubye ukalengekania oko myatsi yosi eyo uligha n’eyo wabirigha oko Yehova, oko Mughala wiwe, n’oko lwanzo lwabo okw’iwe. (Esy. 119:97, ebinywa by’eyikwa) Isiwabunika mutima wamatendibana omwatsi mulebe muhya kutse owakakutsemesaya omughulu ukasoma eBiblia kutse ukakwesa-kwesa emyatsi. Oko kwenene, uli ng’omundu oyukasonda ehoro. Kangyi-kangyi, omundu oyukasonda ehoro, akalabaya esyosaha nibya n’ebiro isyalyatabana n’akayikoto. Aliwe, syalibunika mutima. Omw’iyiyinia, akalola embere erironda, kundi obuli katsanga k’ehoro, nomo ni kake okw’iye ni k’obughuli bunene. Kutya, n’obuli mwatsi muhya ogho tukigha omo Biblia ni w’obughuli bunene kwilaba ehoro! (Misyo 8:10) Kwesi, ulole embere erisoma eBiblia, kandi ulole embere erikwesa-kwesa emyatsi mihya eyo wangigha.​—Esy. 1:2. w25.01 24-25 enu. 14-15

Yehova anzire itwabya itunayiteghekire erighanyira abakatukosera. (Esy. 86:5; Luka 17:4; Efe. 4:32) Twanganahitana kutsibu busana b’ebinywa ebyo omundu alyabugha kutse emyatsi eyo alyakola, kutsibu-tsibu amabibya ini mwira wetu kutsibu kutse ini w’omo kihanda kyetu. (Esy. 55:12-14) Ndambi silebe twanganahitana kutsibu ikyabya nga twamatsimitwa omo litumo. (Misyo 12:18) Twanganayowa muhanda oko ndambi eyo, aliwe itwayisogha eriliba-libania eriyowa lyetu kutse itutatsomanalyo. Aliwe erikola ekyo kilingene n’eritsimitwa omo muhamba neryo iwasigha omuhamba oyo omo kironda kyaghu. Kutya netu, twamabiliba-libania eriyowa lyetu isitwangalama. Omughulu omundu mulebe amatukolera muhanda, kangyi-kangyi tukalw’itwahitana. N’eBiblia ikanabugha yiti erihitana si lubanza. Aliwe ikatuhana yiti ngambe isitwasighala mughulu muli itunahitene. (Esy. 4:4; Efe. 4:26) Busanaki? Kundi erihitana kangyi-kangyi rikaluiramo ebighuma ebituwene. (Yak. 1:20) Mwibuke ngoko erihitana likayasira, aliwe omundu yukayisogha ng’akendisighala inyanahitene kutse iyehe. w25.02 15 enu. 4-6

Yesu mwakangania ngoko ni bukiru omundu eriyilundikira esyofranga, aliwe “isimuteke embere sy’oMungu.” (Luka 12:16-21) Sihali omundu oyo wasi ekikendisyamuhikira omungya. (Misyo 23:4, 5; Yak. 4:13-15) Itwe bigha ba Yesu tukahikirawa n’amaligho mangyi. Yesu mwabugha ati omundu syangabya mwigha wiwe “amatendilolya oko bindu biwe byosi k’omughongo.” (Luka 14:33) Ekyo kyo kyahikira Abakristo be Yudea omo mughulu w’abakwenda. Mubaligha eriherya ebyosi ebyo babya nabyo. (Ebr. 10:34) Munabwire abaghala betu bangyi babiriherya emibiiri yabo kundi mubaghana eritsakura omundu mulebe w’epolitike. (Erib. 13:16, 17) Niki kyo kyawatikayabo? Mubayiketera kundu omulaghe wa Yehova ono: “Sinendisyakuleka n’ahake, kandi sinendisyakusighania n’ahake.” (Ebr. 13:5) Neryo tukakola ngoko twangatoka tutoke erisyabana ebyo tukendisyalaghako twabikekeluha, kandi tuyiketere kundu ngoko Yehova akendisyatuha ebyo tulaghireko, nibya twamabihikirwa n’ekindu kilebe ekyo tutayilindirireko. w25.03 29-30 enu. 13-14

Yehova syalilindirira ati tukule bunya-kirimu omo butoki bwetu. Akatuha abalisya n’abakangirirya omo ndeko abakatuwatikaya erikula bunya-kirimu, “n’erihika okw’ibya mundu oyukulire nga Kristo.” (Efe. 4:11-13) Kandi Yehova akatuha ekirimu kiwe kibuyirire erituwatikya tutoke eribya “n’amalengekania wa Kristo.” (1 Kor. 2:14-16) Kandi, oMungu akatuha esyo Enjili ini eritukangania ngoko Yesu abya akalengekania, ngoko abya akabugha, kandi n’ebyo akola omughulu abya oko kihugho. Naghu wamabya ukalengekania n’erikola nga Yesu ighukendihikira omuradi waghu ow’erikula bunya-kirimu. Aliwe twamanza erilola embere erikula bunya-kirimu, silitolere itwatwirirya oko “makangirirya w’erimbere awalebirye Kristo.” Ayo w’amakangirirya w’Ekikristo aw’eritsukirako. w24.04 4-5 enu. 11-12

Obuli kiro tukayisogha oko emyatsi mbiriri-mbiriri. Ebindi bikoloba eriyisogha kubyo, ng’eriyisogha ebyo tukendirya omo tututu n’endambi y’eriyaghotsera. Ebindi bikalire eriyisogha kubyo. Byanganatula oko mubiri wetu, oko butseme bwetu, oko bandu abo twanzire, n’oko ebyo tukakolera Yehova. Twanzire tuti kumbe ebyo tukayisogha ibyatuletera endundi itwe, n’ekihanda kyetu. N’ekikulu oko byosi, twanzire eriyisogha lyetu iryatsemesya Yehova. (Rom. 12:1, 2) Omwatsi w’omughaso owangatuwatikya eriyisogha ndeke ry’eriminya emyatsi yo ndeke. Busanaki ni ky’omughaso? Tubughe tuti omukoni mulebe amayasungana n’omunganga kundi akwire obukoni obukalire. Omunganga oyo anganalw’inyatsuka erimuhandikira edawa nyilebe isyalyamupima n’erimubulya amabulyo malebe? Ko bite bitya. Naghu wanganayisogha ndeke wamabitsuka eriminya ndeke emyatsi eyilebirye ebyo ukasonda eriyisoghako. w25.01 14 enu. 1-3

Ni myatsi yahi yo twasi okw’ighanyira lya Yehova? Mwakangania ati ngoko “syanzire n’omundu n’omughuma akatsandibwa”? (2 Pet. 3:9) Tulebaye ngoko aghanyira abandu balebe abakola amalolo awakala-kalire. Omwami Daudi mwakola amalolo mangyi awakalire, ng’obusingiri n’obwiti. Aliwe Daudi mwasuba oko mutima wiwe, na Yehova mwamughanyira. (2 Sam. 12:1-12) Omwami Manase mwakola emyatsi mingyi mibi eyikubahisaya. Aliwe nomo Manase anakola emyatsi mibi kutsibu, Yehova mwamughanyira kundi mwasuba oko mutima wiwe. (2 Emya. 33:9-16) Eby’erileberyako ebi byamatwibukya ngoko Yehova akaghanira omughulu amalangira ikyamatolera erighanyira. Akendisyalubukya abandu abali ng’abo kundi mubaminya ngoko babirikola amakosa awakala-kalire neryo bamasuba oko mitima yabo. w24.05 4 enu. 12