Usombole abira baghu n’amenge

Abira abuwene bakakanyaya obutseme bwetu omo mighulu eyuwene n’eritusubya mutima omo nda twamahikirwa n’omughulu owakalire. Aliwe, eBiblia ikatubwira yiti isitwalengekanaya tuti abandu bosi ni bira babuya. Neryo wangasombola wuti abira abuwene? Tulebaye amabulyo awakwamire.

1. Abira abo ukasombola banganahindula engebe yaghu yo bati?

Kangyi-kangyi, omundu akabya n’emibere eyisosire ey’abandu abo akalabaya nabo endambi. Emibere yiwe yanganuwana kutse iyatsanda​—kandi okw’ibugha ekwenene, bikabya bitya nomo twangabya itukalabaya nabo endambi busu oko busu, kutse itukakanaya nabo oko enternete. EBiblia ikabugha yiti: “Ulendere n’abandu b’amenge nawu wasyabya n’amenge; nikwa omwira w’abakiru [abatanzire Yehova] asyakwa.” (Emisyo 13:20) Abandu abanzire Yehova kandi abakamuramaya bamabya bira baghu, banganakuwatikya eribya mwira wiwe n’eribya ukayisogha omo nzira eyuwene. Aliwe eribya mwira w’abandu abateramaya Yehova lyanganaleka obwira bwaghu naye ibwatsanda. Kyo kikaleka eBiblia iyatubwira yiti tusombole abira betu n’amenge! Omughulu tukasombola abira abanzire Yehova, tukabya bira babo abuwene nabo ibabya bira betu abuwene. Tukatoka “erisikania n’erihimbana.”​—1 Abanya Tesalonike 5:11.

2. Abira abo ukasombola bakaleka Yehova inyayowa ati?

Yehova syalisombola abira biwe bo kitya-kitya. “Obwira bwiwe buli haghuma n’abatunganene.” (Emisyo 3:32) Yehova angayowa ati twamabisombola abira abatamwanzire? Ekyo sikyangamutsemesya! (Soma Yakobo 4:4.) Aliwe, twamabiyighighula oko bira abatuwene, Yehova iniakenditsema n’eritusombola mo bira biwe, kandi itukendiyitunda hakuhi naye na hakuhi n’abandu abamwanzire​—Esyonyimbo 15:1-4.

WIGHE BINGYI

3. Uyiteghaye okwisombola abira abatuwene

Abandu abatanzire oMungu n’esyokanuni siwe ni bira abatuwene. Mulebaye EVIDEO, neryo musubiraye oko ribulyo erikwamire.

EVIDEO: Wighe eriyighighula oko bira abatuwene (6:17)

• Twanganatsuka eribya n’obwira n’abandu abatuwene butsira eriminya tuti?

Musome 1 Abanya Korinto 15:33, neryo musubiraye oko mabulyo ano::

• Ni bandu ba muhanda wahi bo wangalangira mo bira abatuwene? Busanaki?

Musome Esyonyimbo 119:63, neryo musubiraye oko ribulyo rino:

• Niki kyo kyangakangania ngoko omundu ni mwira oyuwene?

4. Abandu abate n’emibere eyiri ng’eyetu banganabya bira abuwene

EBiblia ikakanaya oko balume babiri, Dawidi na Yonatani, ababya omo Israeli ya kera. Yonatani abya mukulu oko Dawidi kandi abya mughala w’omwami; aliwe, mobabya n’obwira obunokire. Musome 1 Samweli 18:1, neryo musubiraye oko ribulyo rino:

• Busanaki siritolere obuli mughulu eribya n’abira abo lubu lwetu kutse abali omo mibere eyo tulimo?

Musome Abanya Roma 1:11, 12, neryo musubiraye oko ribulyo rino:

• Abira abanzire Yehova banganawatikania bati?

Omo video eno, langira ngoko mughala wetu mughuma mulwana amasunga abira omo mwanya owatalwe alengekenie. Mulebaye EVIDEO, neryo musubiraye oko mabulyo awakwamire.

EVIDEO: Ubane abira omo mwanya owo utalengekenia (5:06)

• Omo video, busanaki ababuti ba Akil babya bakahangya-hangya busana n’abira abo aby’awite ekalasi?

• Oko mwanzo, busanaki Akil mwatsemera abira biwe abo?

• Mwatoka ati erikinda embwéra y’eribula bira?

5. Ngoko wangayira abira abuwene n’eribya mwira oyuwene

EVIDEO: Omwira w’ekwenene nindi? (4:14)

Musome Emisyo 18:24 na 27:17, neryo musubiraye oko mabulyo ano:

• Abira b’ekwenene bakakolerana bati?

• Mukanakolerana mutya n’abira abo uwite? Byamabya iko bite bitya, mwangakolaki mutoke eryuwania obwira bwenyu?

Musome Abanya Filipi 2:4, neryo musubiraye oko ribulyo rino:

• Wamanza uti ubane abira abuwene, utolere iwuwene-wene iwabya mwira oyuwene oko bandi. Wangakola utya wuti?

MUKIGHA MYATSI YAHI?

Omughulu tukasombola abira betu n’amenge tukatsemesaya Yehova kandi ekyo kikatuletera endundi.

Eriyibukya

• Busanaki Yehova akalangira mo ky’omughaso erisombola lyetu abira?

• Tutolere itwasombola abandu ba muhanda wahi mo bira betu?

• Twangakulya tuti obwira obuwene haghuma n’abandu abuwene?

EBINDI EBY’ERIMINYA

Ulangire ngoko abira abuwene banganatuwatikya omughulu twamahikirwa n’amaligho.

“Ukulaye obwira obuwatire enduli yite ya hika” (Munara wa Mulinzi, Mwezi wa 11, 2019)

Lengekanganaya oko ekyo wangakola utoke eribana abira abuwene.

“Nangabana Nyiti Abira Abuwene?” (Maswali Ambayo Vijana Huuliza​—Majibu Yafanyayo Kazi, Buku 1, sura ya 8)

Utolere iwaminya ki oko mwatsi w’eriyira abira b’oko enternete?

Kolesaya n’amenge ebindu bye enternete eby’erikaniraniako (4:12)

Omo mwatsi owakabugha ati “Monayitsutsa eribya na tata,” langira ekyawatikaya omulume oyu eritasyalebya ngoko angasombola abira.

“EBiblia ikabindula esyongebe” (Munara wa Mulinzi, Tarehe 1 Mwezi wa 4, 2012)