Abakristo batolere ibabya n’amalengekania wahi oko bwabu?

Omo kihugho, abandu bangyi bali n’amalengekania mbiriri-mbiriri oko bwabu. Hane abakasombola erinywa obwabu omughulu bali haghuma n’abira babo. N’abandi ibasombola eritendinywa n’ahake. Nikwa hane n’abandi abakanywa obwabu erihika oko kika ky’eritamira. EBiblia yiri n’amalengekania wahi oko bwabu?

1. Nina kibi erinywa oko bwabu?

EBiblia siyiribugha yiti ni kibi erinywa obwabu. Nibya n’omughulu ikakanaya oko bihembo bingyi ebyo oMungu abirituha, eBiblia ikahirako ‘n’ebinyu ebikatsemesaya omutima w’omundu.’ (Esyonyimbo 104:14, 15) Omo Biblia mune abalume n’abakali ababya n’obwikirirya kandi ibakananywa oko bwabu.​—1 Timoteo 5:23.

2. Ni mahano wahi awo eBiblia ikaleta busana n’abandu abakasombola erinywa oko bwabu?

Yehova akabugha ati ni kibi erinywa obwabu bungyi n’eritamira. (Abanya Galatia 5:21) Ekinywa kiwe kikabugha kiti: “Subye omo kati k’abandu abakalumba obwabu.” (Emisyo 23:20) Twamasombola erinywa​—nomo twangabya n’abandi kutse itune itwibene​—isitwanywa obwabu bunene erihika oko kika ky’eritendilengekania ndeke, eritendiminya ebyo tukabugha n’erikola, kutse eky’eritsandya omubiri wetu. Twamabya isitwangatoka eripima olulengo lw’obwabu obo tutolere erinywa, litolere itwaleka erinywabo.

3. Twangakangania tuti ngoko tusikirye amalengekania w’abandi oko bwabu

Obuli mundu ali n’obwiranda bw’eriyisombolera ng’angananywa obwabu kutse iyehe. Sitwangatswera omundu oyukanywa obwabu omo lulengo olutolere kutse sitwangakasa omundu oyutanzire erinywa obwabu tuti anywebo. (Abanya Roma 14:10) Tukasombola eritendinywa obwabu lyamabya iryanganatwikalya abandi. (Soma Abanya Roma 14:21.) Situlisondaya “endundi busana [netu itwe] bene-bene, tukasondaya endundi busana n’omulikyetu.”​—Soma 1 Abanya Korinto 10:23, 24.

WIGHE BINGYI

4. Uyisoghe nga ukendibya ukanywa kutse iyehe

Yesu abya n’amalengekania wahi okwinywa obwabu? Eritoka erisubirya, lengekanaya oko kitikotiko ky’erimbere eky’akola. Musome Yoane 2:1-11, neryo musubiraye oko mabulyo ano:

• Omo kitikotiko kino, twangigha moki oko malengekania awo Yesu abya nagho oko bwabu n’abandu abakanywabo?

• Kundi Yesu mwataghania erinywa oko bwabu, oMukristo atolere inialangira omundu oyukasombola erinywa oko bwabu yw’ati?

Aliwe, oMukristo nomo ane n’obwiranda bw’erinywa obwabu, ekyo sibughambu okwiye erikola atya n’iyira amenge mughulu wosi. Musome Emisyo 22:3, neryo mulebaye emyatsi eyikwamire nga yanganawatikya eriminya omundu ng’angananywa obwabu kutse iyehe:

• Ukasonda erighendya omutoka kutse ukasonda erikola omubírí n’amasini malebe.

• Omughulu uli mukule.

• Omunganga abirikughania erinywa obwabu.

• Wabiritaluka eripima olulengo lw’obwabu obo utolere erinywa.

• Emighambo y’ekihugho kyenyu yikaghanaya erinywa obwabu bulebe.

• Wamabya n’omundu oyo wabirisombola erileka obwabu kundi kera abya iniabiritaluka eriminya olulengo l’obwabu olo atolere inianywa.

Wanganaha abandu b’obwabu omughulu w’endwa yaghu kutse oko yindi mihindano y’abandu banene? Eriminya ekyangakuwatikya erisombola ndeke, mulebaye EVIDEO.

EVIDEO: Nanganatengera abandi bw’obwabu? (2:41)

Musome Abanya Roma 13:13 na 1 Abanya Korinto 10:31, 32. Enyuma sy’erisoma obuli risako, musubiraye oko ribulyo rino:

• Erikolesya akanuni kano lyanganakuwatikya liti erikola obusomboli obuwene obukenditsemesya Yehova?

5. Uyisoghe olulengo lw’obwabu obo wanganywa

Wamasombola erinywa, w’ibuke kino: Nomo Yehova ataghanirye erinywa obwabu, akaghanaya eritamira. Busanaki? Musome Hosea 4:11, 18, neryo musubiraye oko ribulyo rino:

• Niki kyo kyangahikira omundu amanywa obwabu bunene?

Wangakolaki utoke eritendibya ukanywa obwabu bungyi? Tutolere itwabya n’obulingirirania n’eriminya olulengo lwetu. Musome Emisyo 11:2, neryo musubiraye oko ribulyo rino:

• Busanaki n’iyira amenge eriyihiriraho olulengo lulebe lw’obwabu obo wangabya ukanywa?

6. Ekyangakuwatikya erileka erinywa obwabu bo kutsibu

EVIDEO: ‘Engebe eyo nabyamo moyanyiluhya’ (6:32)

• Omo video, erinywa obwabu molyaleka Dmitry iniabya akakolera abandu bw’ati?

• Mwanatoka erilua inialeka obwabu bw’aho naho?

• Oko nduli mwatoka ati erileka erinywa obwabu bo kutsibu?

Musome 1 Abanya Korinto 6:10, 11, neryo musubiraye oko mabulyo ano:

• Eritamira ni mwatsi mulito oko lulengoki?

• Niki kyo kikakanganaya ngoko omutamiri anganabinduka?

Musome Matayo 5:30, neryo musubiraye oko ribulyo rino:

• Eritwa ebyala n’erighusa byo likakanganaya eriyiherera erileka omwatsi mulebe busana n’eritsemesya Yehova. Wangakolaki wamabya iwabiritaluka okwileka erinywa obwabu bo kutsibu?a

Musome 1 Abanya Korinto 15:33, neryo musubiraye oko ribulyo rino:

• Olulengo lw’obwabu obo ukanywa lwanganabya n’ebighuma byahi oko bira baghu?

MUKIGHA MYATSI YAHI?

Yehova mwateghekania obwabu tutoke eriyitsemesya, aliwe aghanirye erinywa obwabu bungyi n’eritamira.

Eriyibukya

• EBiblia ikabugha yitiki oko bwabu?

• Erinywa obwabu bo kutsibu liri mo hatari syahi?

• Twangakangania tuti ngoko tusikirye amalengekania w’abandi okwinywa obwabu?

EBINDI EBY’ERIMINYA

Niki kyo kyangawatikya abalwana n’abambesa eriminya nga bangananywa oko obwabu?

Lengekanaya oko bighuma ebyangasira omwinywa obwabu (2:31)

Ubane emyatsi eyo wangakola utoke erilwa n’ekitegho ky’erinywa obwabu bungyi.

“Uleke obwabu bw’omo mwanya wabo” (Mnara wa Mlinzi, Januari 1, 2010)

Abakristo banganasumba n’erihindangania ebiraghuli?

“Amabulyo erilua oko basomi betu” (Mnara wa Mlinzi, Februari 15, 2007)

Omo mwatsi “Nabya ng’ekisya ky’obwabu ekityusula,” ulangire ngoko omulume mughuma aleka emibere y’erinywa obwabu kulenga kateho.

“EBiblia ikabindula esyongebe Sy’abandu” (Munara wa Mulinzi, Tarehe 1 Mwezi wa 5, 2012)