Twangayira tuti imotwabya bandu aberire omo meso w’oMungu?

Terilengekania oko mumama oyukasogha-soghanaya omwana wiwe embere aye ekalasi. Atolere iniaminya omwana wiwe ng’abirinaba kutse ng’anambite esyongyimba esyuwene kandi esyerire. Eriyira atya likaleka omwana iniabya iniane n’omubiri owuwene kandi likakanganaya abandi ngoko ababuti biwe banemumusulubirira. Netu kutya, Tata wetu w’olwanzo, Yehova, anzire itwabya itunerire​—kinya-mubiri, omo ebyo tukabugha, omo malengekania, n’omo mighendere. Omughulu tukabya itunerire, tukabana endundi itwibene-bene kandi tukaletera Yehova y’olukengerwa.

1. Twangayira tuti imotwabya itunerire omo myatsi eyilebirye omubiri?

Yehova akatubwira ati: “Tubye babuyirire.” (1 Petero 1:16) Eribya babuyirire, litolere itwabya itunerire omo myatsi eyilebirye omubiri, ebinywa, amalengekania, n’emighendere. Twanganayikasa eribya itunerire omo myatsi eyilebirye omubiri omwibya tukanaba obuli kiro, kandi n’omwibya n’esyongyimba, enyumba, emitoka eby’erire. Ekindi kiriho, twanganawatikya eryerya eKisenge kyetu ky’oBwami. Eribya itunerire omo myatsi eyilebirye omubiri, likaletera Yehova y’olukengerwa.​—2 Abanya Korinto 6:3, 4.

2. Tutolere itwayihighula oko myatsi yahi tutoke eribya itunerire?

EBiblia ikatuhana yiti “tuyiteghaye oko ebitisirire byosi by’omubiri n’eby’ekirimu.” (2 Abanya Korinto 7:1) Busana nekyo, tukayikakiraya oko kyosi-kyosi ekyangatsandya omubiri wetu n’obwenge bwetu. Amalengekania wetu atolere iniatsemesya Yehova, neryo tukayikasa eriyihighula oko malengekania mabi. (Esyonyimbo 104:34) Kandi tukayikasa eriyihighula oko mikania mibi.​—Soma Abanya Kolosai 3:8.

Ni yindi myatsi yahi eyangaleka itwabya abaterire omo myatsi y’omubiri, amalengekania, ebyo tukabugha, nemighendere? Hane ebindu ebyangatsandya omubiri wetu. Neryo, litolere itwayihighula oko myatsi ng’etaba, eloho, esyodawa esikatamiraya, n’erikolesya amabalya wo nabi. Eriyikakirya oko myatsi eyo, tukabya n’omubiri owuwene, n’erikangania ko tusikirye ekihembo ky’engebe. Kandi tukayikasa eribya itunerire omo binywa, omo malengekania, n’omo mighendere, omwiyihighula oko mikolere mibi ng’erinyighitsa ebitsuko byolubuto n’erilebya epornografia. (Esyonyimbo 119:37; Abanya Efeso 5:5) Kyanganakala eriyihighula oko mibere eyo, aliwe Yehova anganatuwatikya erikindayo.​—Soma Isaya 41:13.

WIGHE BINGYI

3. Eribya itunerire omo myatsi eyilebirye omubiri likaletera Yehova y’olukengerwa

Twanganaminya amalengekania wa Yehova awalebirye eribya itunerire omwisoma ebyalayiro ebyo aha abana be Israeli oko mwatsi w’obuyonzo. Musome Eriluayo 19:10 ne 30:17-19, neryo musubiraye oko mabulyo ano:

• Amasako ayo amakangania ati amalengekania wa Yehova okwibya itunerire omo myatsi eyilebirye omubiri?

• Wangakolaki utoke eribya iwunerire omo myatsi eyilebirye omubiri?

Eribya itunerire omo myatsi eyilebirye omubiri likasaba endambi n’eriyikasa. Aliwe, twanganatoka erikola tutya nomo twangabya itwikere hayi kutse nomo twangabya bera kutse bateke. Mulebaye EVIDEO, neryo musubiraye oko ribulyo erikwamire.

EVIDEO: OMungu anzire abandu aberire (4:10)

• Ebindu byetu eribya ibineko obuyonzo busanaki rikaleka abandu abo tukahubiraya ibasikya Yehova?

4. Uleke emibere mibi

Wamabya iwukafuta etaba kutse iwukanywa esyodawa esikatamiraya esitahamulirwe, wanganaminya ko kikalire erisinga emibere eyo. Ekyangakuwatikya niki? Ulengekanaye emibere eyo nga yangabya n’ebighuma byahi okwiwe. Musome Matayo 22:37-39, neryo mulebaye ngoko etaba kutse erikolesya esyodawa esikatamiraya sy’omuhanda lyanganatsandya . . .

• obwira bwaghu haghuma na Yehova.

• obwira bwaghu haghuma n’ab’omo kihanda kyaghu n’abandi bandu.

Uteghekanaye emyatsi eyo wangakola utoke erileka emibere mibi.a Mulebaye EVIDEO.

EVIDEO: Ubye ukayikakirya (2:47)

Musome Abanya Filipi 4:13, neryo musubiraye oko ribulyo rino:

• Busanaki eribya tukasaba obuli kiro, erisoma eBiblia n’eribya tukahika oko mihindano y’endeko rikawatikaya omundu eribana akaghala k’erileka emibere mibi?

5. Ngoko wangakinda amalengekania n’emikolere mibi

Musome Abanya Kolosai 3:5, neryo musubiraye oko mabulyo ano:

• Tukaminya tuti ngoko epornografia, erihandikirana emyatsi eyikabugha oko myatsi y’engyingo, n’erinyighitsa ebitsuko by’olubuto ni myatsi mibi omo meso wa Yehova?

• Ukalengekanaya uti nina ky’amenge Yehova eribugha ati tubye itunerire omo mighendere, omo ebyo tukabugha, n’omo malengania wetu? Busanaki?

Uminye ngoko wangasinga kutse erileka amalengekania mabi. Mulebaye EVIDEO.

EVIDEO: Ukole emyatsi milebe utoke eribya iwunerire (1:51)

Yesu mwakolesya omusyo erikangania ko litolere itwakola ebyuwene tutoke eribya itunerire omo malengekania, omo mighendere, n’omo binywa. Musome Matayo 5:29, 30, neryo musubiraye oko ribulyo rino:

• Yesu syabya akasonda eribugha ati ritolere itwahutalya omubiri wetu, aliwe, abya akasonda eribugha ati litolere itwakola mwatsi mulebe. Ni yisogha lyahi eryangawatikya omundu eriyihighula oko malengekania awatuwene?b

Wamabya iwunemuyikasa erisinga kutse erileka amalengekania mabi, Yehova analangire eriyikasa lyaghu. Musome Esyonyimbo 103:13, 14, neryo musubiraye oko ribulyo rino:

• Wamabya iwunemuyikasa erisinga emibere mibi, erisako eri lyamakuwatikya liti okwilola embere omwiyikasa erileka emibere eyo?

Wamataluka kaghuma si bughambu siwangatoka!

Kyangan’oloba erilengekania uti, ‘Mongataluka, nanganalwinaleka.’ Aliwe terilengekania oko kino: Omughulu omutibiti akatwikala n’eriwa ahisi, eryo si bughambu syangaswasinga endibito, kutse sikibughire kiti syangaswatsuka eritibita. Netu kutya, twamabitaluka kaghuma ekyo si kibughire kiti sitwangatoka erileka emibere mibi. Kandi sibughambu eriyikasa lyetu erihika aho lyabirikwira busa. Hakanabya endambi itwataluka erikola omwatsi mulebe. Isiwaleka! Omo nzira y’obuwatikya bwa Yehova, wanganatoka erileka emibere mibi.

MUKIGHA MYATSI YAHI?

Tukatsemesaya Yehova omughulu tukayitsinga eribya utunerire omo myatsi eyilebirye omubiri, omo malengekania, n’omo mighendere.

Eriyibukya

• Busanaki ni ky’omughaso eribya itunerire?

• Wangakolaki utoke eribya iwunerire omo myatsi eyilebirye omubiri?

• Wangakolaki utoke eribya n’amalengekania n’emighendere ey’erire?

EBINDI EBY’ERIMINYA

Ni myatsi mike-mike yahi eyo wangakola utoke eribya iwunerire omo myatsi eyilebirye omubiri nomo wangabya isiwuwite esyofranga nyingyi?

Obuyonzo n’erinaba oko byala​—bikatuwatikaya eribya n’omubiri owuwene (3:01)

Ulangire emyatsi eyo wangakola utoke erileka erifuta etaba.

“Ngoko wangaleka erifuta etaba” (Amkeni!, Mei 2010)

Langira emyatsi mibi eyikahikira oyukalebaya epornografia.

“Epornografia​—ikanahutalaya kutse iyehe?” (Munara wa Mulinzi, Tarehe 1 Mwezi wa 8, 2013)

Langira ekyawatikaya omulume mughuma erileka eribya akalebya epornografia.

“Monataluka ngendo nyingyi embere nyitoke” (Munara wa Mulinzi Na. 4 2016)