ESOMO 38
Ukanganaye erisima busana n’ekihembo ky’engebe
Twanganakola n’eritsemera emyatsi mingyi omughulu tuli n’engebe. Nibya n’omughulu tukalola oko maligho, twanganatsemera eyindi myatsi y’omo ngebe. Twangakangania Yehova yo tuti ngoko tuli n’erisima busana n’ekihembo ky’engebe? N’omwatsi mukulu owakatukuna erikola tutya ni wahi?
1. Busanaki litolere itwatsemera engebe?
Litolere itwatsemera engebe kundi ni kihembo ekikalua oko Tata wetu w’olwanzo, Yehova. Iye yo “nzuko y’engebe,” ni bughambu, niye yo wahangyika emihanda yosi y’engebe. (Esyonyimbo 36:9) “Akaha engebe n’omuka n’ebindu byosi oko bandu bosi.” (Emibiri 17:25, 28) Yehova akatuha ebyosi ebyo tulaghireko tutoke eribyaho. Kandi akatuha ebyo tulaghireko tutoke eritsemera engebe.—Soma Emibiri 14:17.
2. Twangakangania Yehova ngoko tuli n’erisima busana n’ekihembo ky’engebe tuti?
Yehova akakuteghaya, erilua omughulu watsuka omo nda ya mama waghu. Akasondolwa n’ekirimu ky’oMungu, omughuma w’oko baramya ba Yehova, yo Dawidi, mwahandika ati: “Mowanyilolako isindinabutwa [inyikine omo nda, NWT].” (Esyonyimbo 139:16) Yehova akalangira engebe yaghu mo y’obughuli bunene kutsibu. (Musome Matayo 10:29-31.) Yehova akahitana kutsibu oko mundu oyukabughaho engebe yiwe kutse ey’oghundi mundu.a (Eriluayo 20:13) Kandi akahitana kutsibu twamahira engebe yetu y’omo bwiko isihali ekikaleka, kutse tutetakola ekyosi-kyosi eriteya engebe y’abandi. Omughulu tukateghaya engebe yetu n’ey’abandi, tukakanganaya ngoko tukatsemera ekihembo kibuya ky’engebe.
WIGHE BINGYI
Ulebaye emyatsi milebe eyikakanganaya ngoko uli n’erisima busana n’ekihembo ky’engebe.
3. Usughe engebe kutse omubiri waghu
Abakristo ababiriyiherera oko Yehova bakakolesaya engebe yabo yosi omwimukolera. Bakabya nga bakaherera emibiri yabo mo buhere oko Mungu. Musome Abanya Roma 12:1, 2, neryo musubiraye oko mabulyo ano:
Ekyangakukuna erisugha omubiri waghu niki?
Ni nzira nyilebe syahi esyo wangasughamo omubiri waghu?
4. Isiwakola emyatsi eyangakuhutalya kutse eyangaleka iwahola
EBiblia ikatuhana yiti litolere itwayikakirya oko mikolere eyangahira engebe yetu y’omo bwiko. Mulebaye EVIDEO eriminya emyatsi eyo wangakola utoke eriteya engebe yaghu.
Musome Emisyo 22:3, neryo mulebaye ngoko mwangayiteya n’eriwatikya abandi eriyiteya . . .
omo nyumba yaghu.
eyo ukakolera omubírí.
omughulu ukakola ebitsange.
omughulu ukaghendaya kutse omughulu uli omo mutoka, oko kinga, oko pikipiki, omo bwato n’ebindi.
5. Usikaye engebe y’omwana oyukine omo nda
Dawidi mwakangania ngoko Yehova atsomene ebyosi ebikaleka omwana iniakula omughulu akine omo nda ya mama wiwe. Musome Esyonyimbo 139:13-17, neryo musubiraye oko ribulyo rino:
Omo meso wa Yehova, engebe y’omundu ikatsuka omughulu omumama akabya mukule kutse omughulu omwana akabutawa?
Emighambo eyo Yehova aha abana be Israeli yabya iyikateghaya abo mama n’abana abali omo nda. Musome Eriluayo 21:22, 23, neryo musubiraye oko mabulyo ano:
Yehova abya iniakalangira ati omundu oyukabughaho engebe y’omwana oyutewabutwa butsira erikolerera?
Abya iniakayowa ati omundu amabikolerera omwatsi oyo?b
Amalengekania w’oMungu ayo amaleka iwalangira engebe yo wuti?
Nibya n’omukali oyukalangira engebe mo y’obughuli hanganabya omughulu inialangira eritwa obukule nga lyo lyamatolera oko ndambi eyo. Musome Isaya 41:10, neryo musubiraye oko mabulyo ano:
Bamabihatikana omukali ambu atwe obukule litolere iniayiketera ndi atoke erimuha obuwatikya? Busanaki?
ABANDU BALEBE BAKABUGHA BATI: “Omukali asingene erisombola ng’akenditwa obukule kutse iyehe—iye yo mukule.”
Ekikaleka iwikirirya uti Yehova akalangira engebe y’omumama n’ey’omwana wiwe oyukine omo nda mo y’obughuli niki?
MUKIGHA MYATSI YAHI?
EBiblia ikatukangiriraya eryanza, erisikya, n’eriteya ekihembo ky’engebe ekyo Yehova abirituha. Ekyo kihiriremo engebe yetu n’ey’abandi.
Eriyibukya
Busanaki engebe y’abandu ni y’obughuli omo meso wa Yehova?
Yehova akayowa ati omughulu omundu akabughaho engebe y’oghundi omwiyiririra?
Busanaki ukatsemera ekihembo ky’engebe?
EBINDI EBY’ERIMINYA
Twangakangania tuti ko tuli n’erisima busana n’ekihembo ky’engebe ekyo Yehova abirituha?
Ubane ekisubiryo oko ribulyo rino, oMungu anganaghanyira omukali oyo watwa obukule?
“EBiblia ikabugha yitiki okwitwa obukule?” (Omwatsi w’oko jw.org)
Wighe ngoko eriminya amalengekania w’oMungu oko ngebe lyanganatuwatikya erisombola ebitsange ebite byangahira engebe yetu y’omo bwiko.
“Wanganakola oko bitsange ebikahira engebe y’omo bwiko?” (Amkeni!, Oktoba 8, 2000)
Byangabya biti omundu amabya n’amalengekania w’erisonda eriyita? Langira ngoko eBiblia yangamuwatikya.
a Yehova atsomene kutsibu ab’emitima eyibunangikire. (Esyonyimbo 34:18) Anasi eriyowa muhanda erikaleka abandu ibasonda eriyita kandi ananzire eribawatikya. Erilangira ngoko Yehova anganakuwatikya eriyikakirya oko malengekania awakakuna abandu b’erisonda eriyita, usome omwatsi “Nanzire erihola—EBiblia yangananyiwatikya omughulu nyiri n’amalengekania w’erisonda eriyita?” awali omo kitswe Ebindi eby’eriminya omo somo eno.
b Ababya ibabiritwa obukule siritolere erihangya-hangya kulenga kateho oko mwatsi owo bakola—kundi Yehova anganabaghanyira. Eriminya myatsi mingyi, ulebaye omwatsi “EBiblia ikabugha yitiki okwitwa obukule?” owali omo kitswe Ebindi eby’eriminya omo somo eno.