ESOMO 32

Obwami bw’oMungu bunemutabala!

Eyitsapisirwe

Obwami bw’oMungu bwatsuka eritabala elubula oko mwaka 1914. Kandi oyo w’omughulu owo ebiro by’enduli by’eritabala ly’abandu byatsuka. Tukaminya tuti? Tulebaye ebyo eBiblia yabugha embere, n’ebikakoleka munabwire oko kihugho, kandi ngoko abandu bakayiwata eritsuka oko mwaka 1914.

1. EBiblia moyabugha emyatsi yahi y’embere?

Ekitabu ky’eBiblia kya Danieli mokyabugha embere kiti oBwami bw’oMungu bwangatsukire eritabala oko nduli y’omughulu owakahulawamo “emighulu irinda.” (Danieli 4:16, 17) Emyaka mingyi enyuma syaho, Yesu naye mwakania oko mughulu mughumerera oyo mo “mighulu y’ebihanda,” kandi mwakania ngoko emighulu eyo siyiriyahwererera. (Luka 21:24) Tukendilangira ngoko emighulu irinda eyo yahwererera oko mwaka 1914.

2. Ni myatsi yahi eyikalaba omo kihugho, n’abandu bakayiwata bati eritsuka oko mwaka 1914?

Abigha ba Yesu mobabulya Yesu bati: “Emyatsi eyi yasyabya oko mughulu wahi kandi ekiminyikalo ky’eribyaho lyawe ni kyahi?” (Matayo 24:3) Omwibasubirya, Yesu mwababwira emyatsi mingyi eyangabereho abitsuka eritabala elubula mo Mwami w’oBwami bw’oMungu. Omo myatsi eyo muli amalwa, enzala, n’emisiki. (Soma Matayo 24:7.) Kandi eBiblia moyabugha embere yiti emibere eyo abandu bakasyabya nayo omo “biro by’enduli” yikendisyaleka ihabya “emighulu eyikalire.” (2 Timoteo 3:1-5) Emyatsi eyo n’emibere eyo, yabirilangirika kutsibu-tsibu eritsuka oko mwaka 1914.

3. Busanaki emyatsi yabiritsanda kutsibu oko kihugho eritsuka omughulu oBwami bw’oMungu bwatsuka eritabala?

Mughulu muke enyuma sya Yesu eribya Mwami w’oBwami bw’oMungu, mwalwa na Sitani n’esyombinga elubula. Sitani mwasingwa. EBiblia ikabugha yiti “Sitani mwaguswa ahisi oko kihugo, n’abamalaika buwe mobaguswa ahisi haguma naye.” (Eribisulirwa 12:9, 10, 12) Sitani ahitene kutsibu kundi asi ngoko akendisyatoghotibwa. Busana n’ekyo akaleta omo kihugho kyosi m’obulumi n’amaghali. Neryo ekyo kikaleka itwaminya ekikaleka emyatsi iyaghenda ikatsanda oko kihugho k’obuli kiro! Obwami bw’oMungu bo bukasyabughaho emyatsi mibi eyo.

WIGHE BINGYI

Wighe nga tukabugha tuti oBwami bw’oMungu bwatsuka eritabala oko mwaka 1914 busanaki, kandi ekyo nga kiri na maanaki okwitwe.

4. Emighanzo y’emyaka eyihambene n’amaminyereri w’eBiblia yikakanganaya ngoko oBwami bw’oMungu bwatsuka eritabala oko mwaka 1914

Mulebaye EVIDEO.

EVIDEO: Obwami bw’oMungu bwatsuka eritabala oko mwaka 1914 (5:02)

OMungu mwalotesya Omwami we Babeli yo Nebukadeneza y’enzoli ey’amukanganayamo ebikendisyakoleka omo biro ebikasa. Enzoli eyo kandi ngoko Danieli amukumbulirayo bikakanganaya ngoko yikabererera oko Butabali bwa Nebukadeneza n’oko Bwami bw’oMungu.—Musome Danieli 4:17.a

Musome Danieli 4:20-26, neryo mukolesaye ebiri oko kayani 132 eribawatikya erisubirya oko mabulyo ano:

(A) Nebukadeneza mwalangira myatsi yahi omo nzoli yiwe?—Ulebaye emilondo 20, ne 21.
(B) Omuti endiyirwa ati?—Ulebaye omulondo 23.
(C) Oko nduli ye “mighulu irinda” hendibyaki?—Ulebaye omulondo 26.

Ngoko enzoli y’omuti yihambene n’oBwami bw’oMungu

OBUMINYERERI (Danieli 4:20-36)

Obutabali

(A) Omuti owakaswekaya

Erihwaho ly’obutabali

(B) “Mukonde omuti,” kandi “emighulu irinda imulabeko”

Ekisiki ky’omuti kihangirwe omo muliki w’ekyuma n’omulinga.

Obutabali bwamasubibwaho

(C) “Obwami bwagu bwaswasyabya”

Eribererera ery’erimbere . . .

(D) Omuti abya akasosekania ndi?—Ulebaye omulondo 22.
(E) Obutabali bwiwe mobwahwaho buti?—Musome Danieli 4:29-33.
(F) Ekyahikira Nebukadeneza oko nduli ye “mighulu irinda” niki?—Musome Danieli 4:34-36.

ERIBERERERA LY’ERIMBERE

Obutabali

(D) Nebukadeneza, Omwami w’eBabeli

Erihwaho ly’obutabali

(E) Enyuma sy’omwaka 606 M.M.W., Nebukadeneza mwaherya obwenge neryo mwaherya obutoki bw’eritabala omo myaka irinda

Nebukadeneza abirighalama oko kitaka neryo anemulya oko biti ng’enyama.

Obutabali bwamasubibwaho

(F) Nebukadeneza mwasubira obwenge bwiwe kandi amasubira n’eritabala

Omwami Nebukadeneza anemusamalira elubula anyanasambirye ebyala.

Eribererera ly’akabiri . . .

(G) Omuti abya akasosekania ndi?—Musome 1 Emyatsi y’Emighulu 29:23.
(H) Obutabali bwabo mobwahwaho buti? Tukaminya tuti ngoko omughulu Yesu abya oko kihugho obutabali obo bwabya isibwebwasubibwaho?—Musome Luka 21:24.
(I) Obutabali obo mobwasubibwaho mughulu wahi, kandi hayi?

ERIBERERERA LY’AKABIRI

Obutabali

(G) Abami be Israeli ababya bakatabala omo mwanya w’oMungu

Abami be Israeli ngoko babya basubukeneko oko bitumbi by’obwami, banikere omughuma enyuma sy’oghundi. Amasalali w’ekyakakala anemubakolerya.

Erihwaho ly’obutabali

(H) E Yerusalema yamatoghotibwa, ekyo kyamaleka abami be Israeli ibatabya k’oyukatabala omo mughulu w’emyaka 2 520

Omuliro anemutoghotya omuyi wa kera w’eYerusalemu oko mwaka 607 M.M.W Enyuma syaho, mohalaba myaka 2 520.

Obutabali bwamasubibwaho

(I) Yesu amatsuka eritabala mw’oMwami w’oBwami bw’oMungu elubula

Yesu anamutabala ekihugho inyane elubula erilua oko mwaka 1914 M.W. Amasalali w’ekyakakala anemumukolerya.

Emighulu irinda ni y’emyaka mingahi?

Emilondo milebe y’eBiblia ikatuwatikaya eryowa eyindi milondo. Eky’erileberyako, ekitabu ky’eBiblia eky’Eribisulirwa kikabugha kiti emyaka isatu n’embindi ni biro 1 260. (Eribisulirwa 12:6, 14) Emighulu irinda ni biro 1 260 ngendo ibiri, kutse ebiro 2 520. Hakanabya omughulu eBiblia iyakolesya ekinywa ekiro ikiri n’amaana w’omwaka. (Ezekieli 4:6) Ko bine bitya n’oko mighulu irinda eyikahulawa omo buminyereri obuli omo kitabu kya Danieli—bukasosekanaya emyaka 2 520.

5. Ekihugho kyabiribinduka eritsuka oko mwaka 1914

Mulebaye EVIDEO.

EVIDEO: Ekihugho kyabiribinduka eritsuka oko mwaka 1914 (1:10)

Yesu mwabugha embere ngoko ekihugho kikendisyasosa enyuma iye eribya Mwami. Musome Luka 21:9-11, neryo musubiraye oko ribulyo rino:

Ni myatsi yahi ey’okweyi eyo wabiriyilangirira kutse eryowa?

Omukwenda Paulo mwakangania emibere eyo abandu bakasyabya nayo omo biro by’enduli eby’obutabali bwa bandu. Musome 2 Timoteo 3:1-5, neryo musubiraye oko ribulyo rino:

Wanabiriyilangirira abandu bakakangania emibere eyiri ngeyo munabwire?

Esyopitsa: Esyofoto esikakanganaya emibere y’abandu oko biro bw’omwiso. 1. Omusondoli w’abasuda ane oko podiumu anemubugha n’omulenge muli inyanasambirye ebyala. 2. Enyumba yabiritera enyuma sy’omusiki. 3. Efiyo y’abasuda. 4. Ekikumula ky’abandu abambite maske banemulendera ehihya. 5. Esyo etage ibiri nyiri-nyiri esye Amerika sinemwaka enyuma aba terotiste eribambasyo. 6. Omulume anemukolesya esyodawa esikatamiraya. 7. Omulume amasumba engume n’erikaramira omukali wuwe. 8. Esyodawa esikatamiraya mbiriri-mbiriri n’amabu awakalire. 9. Abakali babiri banambire esyonyimba sy’omughulu kandi ababiriyipodoa ndeke. 10. Abajokere banemusondola ekikumula ky’abandu oko kosere. 11. Omundu anemughusa e bombe.

6. Obutabali bw’oBwami bw’oMungu butolere ibwatuha omuhwa w’erikola

Musome Matayo 24:3, 14, neryo musubiraye oko mabulyo ano:

Ni mubírí wahi w’omughaso owakakanganaya ngoko oBwami bw’oMungu bunemutabala lino?
Wangakolaki utoke naghu erikola oko mubírí oyo?

Obwami bw’oMungu bunemutabala lino, n’omughulu bukenditsuka eritabala ekihugho kyosi ali hakuhi. Musome Abaebrania 10:24, 25, neryo musubiraye oko ribulyo rino:

Obuli mughuma w’okwitwe atolere iniakolaki “akalangira ekiro ky’Omukama kikahika hakuhi”?

Esyopitsa: 1. Omwigha w’eBiblia anemukwama omuhindano w’Abimiri ba Yehova. 2. Omwigha w’eBiblia mughumerera oyo amahubiria omundu oyo asi. — Wamabigha omwatsi owangawatikya n’erisabula abandi, neryo wangakolaki?

OMUNDU MULEBE ANGANABULYA ATI: “Busanaki Abimiri ba Yehova bakakanaya kutsibu oko mwaka 1914?”

Iwe wangasubirya utiki?

MUKIGHA MYATSI YAHI?

Obuminyereri bw’eBiblia, emighanzo y’emyaka eyihambene n’amaminyereri, n’emibere y’ekihugho bikakanganaya ngoko oBwami bw’oMungu bunemutabala lino. Tukakanganaya ngoko twikirirye emyatsi eyo omwibwira abandi oko myatsi eyo nerihika oko mihindano.

Eriyibukya

Niki kyo kyabya oko nduli y’emighulu irinda eyabughawa embere omo kitabu ky’eBiblia kya Danieli?
Ekikaleka iwikirirya kwenene ngoko oBwami bw’oMungu bwatsuka eritabala oko mwaka 1914 niki?
Wangakangania wuti ngoko wikirirye ngoko oBwami bw’oMungu bunemutabala lino?

Ekiro ekyo twamabughirako esomo:

Ekyo wangakola

Uyikase eriberererya ebisabirwe eribya mutuliri w’engulu mbuya.

Ekindi ekyo wangakola:

Your other goal

EBINDI EBY’ERIMINYA

Lebaya ebyo abandu b’ehistoria n’abandi bakabugha oko syombinduka kutse esyombindule esyabiribya omo kihugho eritsuka oko mwaka 1914.

“Omughulu emibere y’abandu yatsuka eritsanda kutsibu” (Amkeni!, Aprili 2007)

Lebaya ngoko obuminyereri obukabanika omo Matayo 24:14 mobwaleka omulume mulebe iniabinduka omo ngebe yiwe.

“Nabya nyanzire amasata w’eBaseball kulenga ekindu kyosi!” (Munara wa Mulinzi Na. 3 2017)

Tukaminya tuti ngoko obuminyereri obukabanika omo Danieli esura 4 bulebirye oBwami bw’oMungu?

“Obwami bw’oMungu bwatsuka eritabala mughulu wahi? (Ekitswe 1)” (Munara wa Mulinzi, Tarehe 1 Mwezi wa 10, 2014)

Niki kyo kikakanganaya ngoko “emighulu irinda” eyikahulawa omo Danieli esura 4 yahwererera oko mwaka we 1914?

“Obwami bw’oMungu bwatsuka eritabala mughulu wahi? (Ekitswe 2)” (Munara wa Mulinzi, Tarehe 1 Mwezi wa 11, 2014)

a Ulebaye emyatsi ibiri y’omwiso omo kitswe Ebindi eby’eriminya ekiri omo somo eno.