Yesu ni mundu oyuli ati?

Omughulu tukigha emyatsi eyo Yesu abugha n’erikola oko Kihugho, tukaminya emibere eyikaleka itwatsemera eribya bira biwe na ba Tata wiwe, Yehova. Yesu awite mibere yahi eyuwene? Kandi twangakwama emibere ya Yesu yo tuti omo ngebe yetu?

1. Yesu ali nga Tata wiwe omo nzira syahi?

Elubula, Yesu mwalangira ngoko Tata wiwe akakola kandi abirigha myatsi mingyi okwiye omo myaka mingyi kutsibu. Busana n’ekyo, akalengekanaya, akayowa, kandi akakola nga Tata wiwe. (Soma Yoane 5:19.) Yesu akakanganaya emibere ya Tata wiwe yo ndeke-ndeke; kyo kyaleka iniabugha ati: “Oyo wamanyilangira iniabirilangira Tata.” (Yoane 14:9) Omughulu ukigha emibere ya Yesu, ikakuwatikaya eriminya Yehova yo ndeke. Eky’erileberyako, Yesu abya akakwira abandu b’obulighe, neryo ekyo kikakanganaya ngoko Yehova naye akakukwira obulighe.

2. Yesu mwakangania ati ngoko anzire Yehova?

Yesu mwabugha ati: “Ngoko Tata anyihana, ko ngakola nyitya ekihugho kitoke eriminya ko nyanzire Tata.” (Yoane 14:31) Yesu mwakangania ngoko anzire Tata wiwe yo kutsibu omwimusikya nibya n’omughulu erikola atya lyabya likalire. Kandi, kusangwa abya anzire Tata wiwe yo kutsibu, ebiro byosi iniakakanaya okwiye n’eriwatikya abandi b’eribya n’obwira obuwene haghuma naye.​—Yoane 14:23.

3. Yesu mwakangania ati ngoko anzire abandu?

EBiblia ikabugha yiti ‘obutseme bwa Yesu bwabya haghuma n’abaghala b’abandu.’ (Emisyo 8:31) Mwakangania olwanzo omwisubya abandu bʼomutima n’eriyiherera eribawatikya. Mwakola ebitiko-tiko busana n’erikangania obutoki bwiwe, aliwe kandi n’erikakangania abandu ngoko akabakwira obulighe. (Mariko 1:40-42) Mwakolera abandu b’omo lukogho kandi butsira akasololo. Ebinywa biwe mobyakirania n’eriha amaha abandu b’emitima myolo ababya bakamuhulikirira. Kundi abya anzire abandu bosi, Yesu abya ayiteghekire eryaghalwa n’erihola busana nabo. Aliwe, kutsibu-tsibu Yesu anzire abakakwama amakangirirya wiwe.​—Soma Yoane 15:13, 14.

WIGHE BINGYI

4. Yesu anzire Tata wiwe

Eky’erileberyako kya Yesu kikatukangiriraya ngoko twangakangania oMungu y’olwanzo lwetu. Musome Luka 6:12 na Yoane 15:10; 17:26. Enyuma sy’erisoma obuli risako, musubiraye oko ribulyo rino:

• Twangigha erikwama emibere ya Yesu yo tuti kandi twangakangania tuti ngoko twanzire Yehova?

6. Yesu ni mwenge

Yesu syabya n’ebindu bingyi by’ekinya-mubiri aliwe iniakaha abandi b’oko ebyo awiteko. Musome Emibiri 20:35, neryo musubiraye oko ribulyo rino:

• Ngoko Yesu abugha, twangabana obutseme bo tuti?

Mulebaye EVIDEO, neryo musubiraye oko ribulyo erikwamire.

EVIDEO: “Erihitya rikaleta obutseme bungyi”​—Ekitswe ky’evideo (4:00)

• Nomo twangabya isituwite ebindu bingyi by’ekinya-mubiri ni nzira syahi esyo twangahitiryamo?

Unalwe wasi?

EBiblia ikatukangiriraya yiti tusabe Yehova erilabira erina lya Yesu. (Soma Yoane 16:23, 24.) Omughulu tukasaba Yehova erilabira erina lya Yesu, tukakanganaya ngoko tukasima Yesu oko ebyo akola erituwatikya eribya bira ba Yehova.

MUKIGHA MYATSI YAHI?

Yesu anzire Yehova kandi anzire abandu. Kundi Yesu ali nga Tata wiwe, omughulu tukaminya Yesu yo ndeke, Yehova naye ko tukamuminya ndeke tutya.

Eriyibukya

• Twangakangania tuti ngoko twanzire Yehova nga Yesu?

• Twangakangania tuti ngoko twanzire abandu nga Yesu?

• Ni mubere wahi wa Yesu owo ukatsemera kutsibu?

EBINDI EBY’ERIMINYA

Ulangire emibere milebe ya Yesu eyo twangigha.

“Erikwama emibere ya Yesu, ubye . . .” (Yesu​—Ni Njia, Kweli, na Uzima, ukurasa wa 317)

Ulangire erisaba erilabira erina lya Yesu nga ni ry’omughaso busanaki.

“Busanaki litolere itwasaba erilabira erina lya Yesu?” (Mnara wa Mlinzi, Februari 1, 2008)

EBiblia ikanabugha Yesu ng’abya asosire ati?

“Yesu abya asosire ati?” (Omwatsi w’oko jw.org)

Tukigha myatsi yahi erilabira omo mibere eyo Yesu abya akakoleramo abakali?

“OMungu asikirye abakali kandi akabalangiramo b’omughaso” (Munara wa Mulinzi, Tarehe 1 Mwezi wa 9, 2012)