“Obwami bwaghu bwase”

Yehova mwalagha ati: ‘Sihendisyasyabya erilira, obulumi, amakoni, kutse oluholo. Ngendisyasangula emisonia yosi omo meso wabo. Ebindu bibi byosi bikendisyabiriranwa.’

Yehova mwahira Adamu na Eva b’omo ririma lye Edeni. Abya anzire ibabyamo buholo kandi ibanatsemire. Lyabya litolere ibaramya Tata wabo w’elubula n’eryusulya omo kihugho mw’abana babo. Adamu na Eva mubatowa Yehova, aliwe ekusudi yiwe muyitabinduka. Omo kitabu kino twabirilangira ngoko obuli kindu ekyo oMungu akalagha kikabererera. Obwami bwiwe bukendisyaleta emiyisa mibuyanga oko kihugho, ngoko analagha Abrahamu.

Hakisigha hake Sitani, esyombinga siwe, n’abandu babi bosi ibahwaho. Obuli mundu akendisyaramya Yehova. Sitwendisyabya tukalwala kutse erihola. Aliwe tukendisyabya tukabuka itunawite akaghala kanene kandi itunatsemire busana n’eribyaho. Ekihugho kikendisyabya paradiso. Obuli mundu akendisyabya n’akalyo akuwene n’eryikala omo nyumba yiwe butsira buba. Abandu bakendisyabya bolo. Bakendisyakolerana ndeke. Sitwendisyasagha esyonyama sy’omoli, nasyo sisyendisyatusagha

Kikendisyatsemesya kundu omughulu Yehova akendisyatsuka erilubukya abandu. Tukendisyatsema erisungana na Abeli, Noa, Abrahamu, Sara, Musa, Ruta, Esteri, na Daudi n’abandi abakolera oMungu yo kera. Tukendisyakola haghuma nabo eriyira ekihugho mo paradiso. Hakendisyabya bingyi by’erikola ebikatsemesaya.

Yehova anzire iwasyabya omo paradiso. Ukendisyamuminya omo nzira eyo ute watalengekania. Tulole embere eriyitunda hakuhi na Yehova, obuli kiro, na kera na kera!