Elizabeti amayira oko mwana

Enyuma w’emyaka 400, esyombimbo sye Yerusalema isyabiritasyahimbwa, omuhereri Zekaria na mukali wiwe Elizabeti, babya bikere hakuhi ne Yerusalema. Habya ihabirilaba emyaka mingyi ibabirilunga, aliwe isibawite oko bana. Kiro kighuma Zekaria inianemuhisya obukwa omo hekalu nyibuyirire, omumalaika Gabrieli mwamuhulukira. Zekaria mwakwa obuba, aliwe Gabrieli mwamubwira ati: ‘Isighubaha. Namakuletera engulu mbuya erilua oko Yehova. Mukali waghu, Elizabeti, akendibuta omwana kandi erina liwe likendisyabya Yohana. Yehova abirisombola Yohana busana n’omubiiri w’embaghane.’ Zekaria mwamubulya ati: ‘Nangaligha niti ebyo ukabugha? Ingye na mukali waghe twabirikula kutsibu okw’ibuta omwana.’ Gabrieli mwabugha ati: ‘OMungu yulyanyituma erikubwira omwatsi oyu. Neryo kundi sighutikirya ebyo ngabugha, ukendibya mumu erihika omughulu omwana akendisyabutwa.’

Zekaria mwabugha endambi nene omo ahabuyirire kutsibu h’ehekalu. Abere ahuluka, abandu ababya bamulindirire ehihya mubanza eriminya nga habereki. Zekaria abya isyakibugha. Abya akakolesya lisa ebiminyikalo b’ebyala. Neryo abandu mubaminya ngoko Zekaria abirihabwa omulaghe erilua oko Mungu.

Enyuma w’aho, Elizabeti mwabya mukule n’eributa omwana w’obulume, ngoko omumalaika anabugha. Abira n’abatunga biwe mubasyalebya omwana. Mubatsema haghuma naye. Elizabeti mwabwirabo ati: ‘Erina liwe likendibya Yohana.’ Mubabugha bati: ‘Omo kihanda kyaghu simuli oyukahulawa mo Yohana. Mwahule mo Zekaria, erina lya baba wiwe.’ Neryo Zekaria mwahandika erina eryo ati: ‘Erina riwe yo Yohana.’ Aho n’aho, Zekaria mwatsuka eribugha! Engulu y’eributwa ry’omwana oyo muyowibwa ehosi-hosi omo Yudea. Abandu mubasweka kutsibu n’eriyibulya bati: ‘Omwana oyu akendisyabya mundu wa muhanda wahi?’

Zekaria musulibwa n’ekirimu kibuyirire. Mwateka obuminyereri ati: ‘Yehova apipawe. Mwalagha Abrahamu ati akendisyatuma omulamya, Masiya, erisyatusabula. Yohana akendisyabya muminyereri kandi asyuwania enzira busana na Masiya.’

Kandi omwatsi w’embaghane mwahikira omutunga wa Elizabeti, ye Maria. Tulebaye ekyo omo somo eyikwamire.