Esyombimbo sye Yerusalema

Tutasuba enyuma hake. Nehemia, omughombe w’Omwami Artashasta, abya Muisraeli oyo wabya ikire omo muyi we Persia e Shushani. Mughala wabo mwalua e Yuda n’omwatsi mubi ono: ‘Abandu abasuba e Yerusalema sibali omo buteya. Esyombimbo n’emilango eyo Abababiloni basambula sibiribyatasyahimbwa.’ Nehemia mwahitana. Mwanza erighenda e Yerusalema eriyawatikya, neryo mwasaba omwami ati amulighire erighenda.

Kiro kighuma, omwami mwaminya ngoko Nehemia syatsemire. Mwabugha naye ati: ‘Sighuli watabya utya. Wakwireki?’ Nehemia mwabugha ati: ‘Nangatoka niti eritendibya omo bulighe omughulu omuyi wetu, e Yerusalema, ni bisambukalirya?’ Omwami mwamubulya ati: ‘Wanzire inakukoleraki?’ Aho n’aho, Nehemia mwasaba Yehova bukutu-kutu. Mwabugha ati: ‘Kisi, nyitume e Yerusalema eriyahimba esyombimbo syagho.’ Omwami Artashasta mwabwira Nehemia ati aghende, kandi mwakola ekyosi-kyosi eriteya Nehemia omo lughendo lwiwe olo. Kandi mwayira Nehemia mo muguvernere we Yuda n’erimuha emiti y’erihimbamo emilango y’omuyi.

Nehemia abere ahika e Yerusalema mwayiteghererya esyombimbo sy’omuyi. Neryo mwahindania abahereri n’abatabali n’eribabwira ati: ‘Omuyi abiritsanda kutsibu. Tutolere itwatsuka obuhimbe.’ Abandu mubaligha, neryo mubatsuka eritasyahimba esyombimbo.

Aliwe esindi nzighu sy’Abaisraeli musyatsuka eribasekererya, n’eribugha siti: ‘Eboha yanganaterya oluhimbo olo mukahimba.’ Abahimbi mubatatsomana esyonzighu esyo, mubalola embere erihimba. Oluhimbo mulwabya luli n’eriwata.

Esyonzighu musyasira oko syombande mbiriri-mbiriri n’erianza erihamba e Yerusalema. Abayahudi babere bowa ekyo, mubakwa obuba. Aliwe Nehemia mwabugha ati: ‘Simubahe. Yehova ane haghuma netu.’ Mwahiraho abateya eriteya abahimbi, neryo esyonzighu musyataluka.

Omo biro 52 bisa, esyombimbo n’emilango mubyahwa erihimbwa. Nehemia mwaleta Abalawi bosi e Yerusalema busana n’efete y’eribugha omubiiri w’obuhimbe. Mwabatonda mo bikuto bibiri by’abimbi. Mubasambira oko luhimbo omw’ilaba oko bisambiro ebyo Lukyo lw’Ekitehero, neryo bamatimba oko muyi, abandi eyi n’abandi eyi. Mubawata esyongunga, amasengo, n’esyonanga n’eriimbira Yehova. Ezra mwaghenda n’ekikuto kighuma, na Nehemia amaghenda n’ekindi, erihika oko hekalu aho beghanaya. Abandu bosi, abalume, abakali, n’abana mubaherera Yehova y’obuhere n’eritsemera ekiro ekyo. Emilenge yabo y’obutseme muyowibwa ehali.