Ezra mwakangirirya Emighambo y’oMungu

Habya ihamabilaba emyaka 70, Abaisraeli bangyi ibabirisuba e Yerusalema, aliwe abandi babya ibakinikere omo biharo mbiriri-mbiriri by’obutabali bwe Persia. Omughuma w’okw’ibo abya ini muhereri Ezra, oyo wakangiriraya abandu b’Emighambo ya Yehova. Ezra mwaminya ngoko abandu be Yerusalema babya isibakikwamire Emighambo, neryo mwanza eriyayo eriyabawatikya. Omwami Artashasta we Persia mwamubwira ati: ‘OMungu mwakuha amenge utoke erikangirirya Emighambo yiwe. Kandi ughende n’obuli mundu wosi-wosi oyo wanzire erighenda naghu.’ Ezra mwahindana haghuma n’abosi ababya banzire erisuba e Yerusalema. Mubasaba Yehova y’obuteya oko lughendo luli olo babya nalo, neryo mubahongoka.

Enyuma w’emisi ini mubahika e Yerusalema. N’abanya-mwami bayo mubabwira Ezra bati: ‘Abaisraeli babirikosera Yehova kandi babiritahya abakali abakaramaya emiungu y’amabehi.’ Ezra mwakolaki? Embere sy’abandu, Ezra mwakukama n’erisaba ati: ‘Yehova, wabiritukolera bingyi, aliwe twabirikukosera.’ Abandu mubabindula emitima yabo, aliwe mubalagha oko buwatikya batoke erikola ebyuwene. Ezra mwasombola abasyakulu n’abatsweri erilebya emyatsi eyo. Omo yindi misi isatu eyakwama, abaghana eriramya Yehova mubatibitwako.

Muhalaba emyaka 12. Omo mughulu oyo, esyombimbo sye Yerusalema syabya isyamabitasyahimbwa. Neryo Ezra mwahindania abandu omo kibugha ky’abandu bosi busana n’eribasomera Emighambo y’oMungu. Ezra abere anemusanzula ekitabu, abandu mubahangana. Mwapipa Yehova, n’abandu mubasumbira ebyala byabo by’endata bakalighirana naye. Neryo Ezra mwasoma n’eryowisya abandu b’Emighambo, n’abandu mubahulikirira ndeke. Mubaligha ngoko babya ibabirisighania Yehova, neryo mubalira. Ekindi kiro Ezra mwatasyabasomera eyindi Mighambo mingyi. Mubaminya ngoko omo biro ebiri hakuhi batolere ibakola Ekiro Kikulu ky’Ebibanda. Neryo aho n’aho, mubalw’ibatsuka eriyiteghekania.

Omo biro 7 ebye fete eyo, abandu mubatsema n’erisima Yehova busana n’eryerya akalyo ko kutsibu. Habya isihali hatabya Ekiro Kikulu ky’Ebibanda ng’ekyo erilua omo biro bya Yoshua. Efete y’abere yabihwa, abandu mubahindana n’erisaba bati: ‘Yehova muwatusabula erilua omo bukobe, muwatuha ebyalya omo mbwarara, kandi muwatuha ekihugho ekyuwene eki. Aliwe ngendo nyingyi, itukakukosera. Muwatuma abaminyereri eritukunga, aliwe isitulibowa. Muwahanda omutima. Muwaberererya endaghane yaghu oko Abrahamu. Neryo lino tukayilagha tuti tukendikowa.’ Mubahandika eriyilagha lyabo, neryo abanya-mwami, Abalawi, n’abahereri mubahira kw’ekikumo.