E Yerusalema muyatoghotibwa

Ngendo nyingyi, abandu be Yuda mubaleka Yehova, bamaramya emiungu y’amabehi. Oko myaka mingyi, Yehova mwalola embere eribawatikya. Mwatuma abaminyereri bangyi eribakunga, aliwe mubatahulikirira. Omo mwanya w’ekyo, ibakasekereraya abaminyereri. Yehova mwabughaho ati eriramya lyabo ly’esyosanamu?

Omwami we Babiloni ye Nebukadneza, abya inianemukinda ebihanda bingyi. Omughulu akinda e Yerusalema engendo y’erimbere, mwahamba Omwami Yehoyakini, abanya-mwami, abasuda, n’abafundi, neryo abosi amatwalabo e Babiloni. Mwaheka n’ebindu byosi eby’obughuli eby’omo hekalu ya Yehova. Neryo Nebukadneza mwayira Zedekia mo mwami we Yuda.

Okw’itsuka, Zedekia abya iniakowa Nebukadneza. Aliwe ebihanda bya hakuhi ne Yuda n’abaminyereri b’amabehi mubabwira Zedekia bati ayisamambule oko Babiloni. Yeremia mwamukunga ati: ‘Wamabiyisamambula, omo Yuda imukendibya obwiti, enzala, n’amakoni.’

Zedekia abere abitabala omo myaka 8, mwayisamambula oko Babiloni. Mwasaba abasuda be Misri erimuwatikya. Neryo Nebukadneza mwatuma abasuda biwe eriyahamba e Yerusalema n’eritimba oko muyi wosi. Yeremia mwabwira Zedekia ati: ‘Yehova ati wamabiyihira omo byala bya Bababiloni, iwe n’omuyi imukendilama. Aliwe wamatendikola utya, Abababiloni ibakendihisya e Yerusalema neryo ibabatwala omo bunyewa.’ Zedekia mwabugha ati: ‘Sinangakola ekyo!’

Habere halaba omwaka mughuma n’enusu, abasuda be Babiloni mubasambula esyombimbo sy’omuyi we Yerusalema, bamingiramo n’eritimya omuyi. Mubatimya ehekalu, eriita abandu bangyi, n’eriheka amaelfu w’abandu.

Zedekia mwatswa e Yerusalema, aliwe Abababiloni mubamukwamirira. Mubayamuhambira hakuhi ne Yeriko neryo bamamuletera Nebukadneza. Omwami we Babiloni mwita abaghala ba Zedekia inianasamalire. Neryo Nebukadneza mwatobongola ameso wa Zedekia n’erimuhira omo ngomo. Mwaholera omo ngomo omo. Aliwe Yehova mwalagha abandu be Yuda ati: ‘Enyuma we myaka 70, ngendisyabasubya eka wenyu, e Yerusalema.’

Emyatsi muyabya yiti oko balwana abatwalawa e Babiloni? Mubanasighala bataleghula oko Yehova?