Yehova mwatuma Yeremia eriyatulira

Yehova mwasombola Yeremia eribya muminyereri oko bandu be Yuda. Mwamubwira ati atulire abandu n’eribakunga ati baleke erikola ebituwene. Yeremia mwabugha ati: ‘Yehova, nikine mulere. Sinasi erikania n’abandu.’ Yehova mwamubwira ati: ‘Isiwasagha. Ngendikubwira eby’eribugha. Ngendikuwatikya.’

Yehova mwabwira Yeremia ati ahindanaye abakulu b’abandu, atulange etsupa y’eribumba embere syabo n’eribugha ati: ‘E Yerusalema ko yikenditulangwa yitya.’ Yeremia abere abikola ngoko Yehova amubwira, abakulu mubahitana kutsibu. Omuhereri Pashuri mwahunza Yeremia n’eriboha amaboko n’amaghulu wiwe omo bisayi by’esyombagho. Omo kiro kyosi, Yeremia abya isyangatoka erighenda. Pashuri mwamulusyamo omo tututu. Yeremia mwabugha ati: ‘Omubiiri ono akalire. Ngendileka eritulira.’ Aliwe kwenene mwanaleka? Iyehe. Yeremia abere abitasyalengekania oko mubiiri oyo, mwabugha ati: ‘Omulaghe wa Yehova ali ng’omuliro omw’ingye. Sinangaleka eritulira.’ Yeremia mwalola embere erikunga abandu.

Emyaka muyalaba, kandi muhabya omwami muhya e Yuda. Abahereri n’abaminyereri b’amabehi mubapona omulaghe wa Yeremia. Mubabwira abanya- mwami bati: ‘Omulume oyu atolere iniakwa.’ Yeremia mwabugha ati: ‘Mwamanyita, imukanyitira busa. Ngabugha ebinywa bya Yehova, si byaghe.’ Abanya-mwami abo babere bowa batya, mubabugha bati: ‘Omulume oyu syatolere erikwa.’

Yeremia mwalola embere eritulira, lero ekyo mukyaleka abanya-mwami nabo ibahitana kutsibu. Mubasaba omwami eriita Yeremia. Omwami mwababwira ati banganakola ekyosi-kyosi ekyo banzire erikola oko Yeremia. Mubimya Yeremia n’erimughusa omo kyuna kiri ekiri mw’ebyondo, ibanasi bati akendiholeramo. Yeremia mwatsuka eritobera omo byondo ebyo.

Neryo omukulu mughuma w’oko bwikalo bw’omwami, ye Ebed-meleki mwabwira omwami ati: ‘Abanya-mwami babirighusa Yeremia y’omo kyuna! Twamamulekamo iniakendihola.’ Omwami mwabwira Ebed-meleki ati imaye abalume 30 bayalusaye Yeremia y’omo kyuna. Netu tutolere itwabya nga Yeremia, oyo watalighira ekindu kyosi-kyosi kimukakiraye eritulira.