OMungu mwahangyika omulume n’omukali ab’erimbere

Yehova mwahira eririma ly’omo mwanya owakahulawa mo Edeni. Eririma ryabya ryoswire mw’amawa, emiti, n’esyonyama. Neryo oMungu mwabumba omulume w’erimbere, ye Adamu omo lututu n’eribuhira omo nindo yiwe mw’omuka. Unasi emyatsi nga muyabya yiti? Omulume oyo mwabya mundu oyuliho! Yehova mwaha Adamu y’omubiiri ow’eriteya eririma eryo, kandi mwamubwira ati ahe esyonyama syosi sy’amena.

Yehova mwaha Adamu y’ekyalayiro kikulu. Mwabwira Adamu ati: ‘Wanganalya oko matunda w’emiti yosi, aliwe butsira oko matunda awali oko muti mughuma w’embaghane. Wamabirya oko matunda ayo, ighukendihola.’

Enyuma w’aho Yehova mwabugha ati: ‘Ngendikolera Adamu y’omuwatikya.’ Mwaghotserya Adamu, neryo mwakolesya olukanga lwa Adamu erimuhangyikira omukali. Mwahulwamo Eva. Adamu na Eva bo babya ekihanda ky’erimbere. Adamu mwayowa ati busana n’omukali wiwe oyo? Adamu mwatsema kutsibu, mwabugha ati: ‘Talebya ekyo Yehova abirikola erilua omo lukanga lwaghe! Lero naghe, namabana oyuli ng’ingye.’

Yehova mwabwira Adamu na Eva ati babute abana basulaye ekihugho. Aby’anzire ibakola omo bughuma eriyira ekihugho kyosi mo paradiso, ngoko eririma lye Edeni lyabya. Aliwe mukitabya kitya. Busanaki? Tukendiminya bingyi omo mwatsi owakwamire.