OMungu mwahangyika olubula n’ekihugho

Yehova Mungu yo Muhangyiki wetu. Mwahangyika obuli kindu, ebyo tukalangira n’ebyo tutelangira. Embere sy’erihangyika ebyo tukalangira, mwahangyika abamalaika banene kutsibu. Unasi abamalaika nga ni bahi? Abamalaika ni bihangyikwa ebyo Yehova akola kandi biri nga ye. Ngoko situlilangira oMungu, nabo sitwangalangirabo. Omumalaika w’erimbere oyo Yehova ahangyika mwabya muwatikya wiwe. Omumalaika oyo mwawatikya Yehova erihangyika esyongununu, n’ebindi bindu byosi. Ekighuma ky’oko bindu ebyo ky’ekihugho, obwikalo bwetu obuwene.

Neryo Yehova mwateghekania ekihugho busana n’esyonyama n’abandu eribya kukyo. Mwakola ekyakakala ky’eryuba erikolerya ekihugho. Mwahangyika ebitwa, esyongetse, n’esyonyusi.

Ni kyahi ekyakwama? Yehova mwabugha ati: ‘Ngendilasya ebiti, n’emiti.’ Amatunda mbiriri-mbiriri, ebiti, n’amawa mubyatsuka erilasa. N’enyuma w’aho, Yehova mwahangyika esyonyama esikaghuluka, esy’omo ngetse, esikaghenda, n’esikayikura. Mwakola n’esike-sike, ng’esyolape; n’esyonene-nene, ng’esyotembo. Ni nyama yahi eyo wanzire?

Neryo Yehova mwabwira omumalaika w’erimbere ati: “Tubumbe omundu.” Abandu ibo babya ini b’embaghane kulenga esyonyama. Ibo ibanganakola ebindu. Ibanganakania, eriseka, n’erisaba. Omubiiri wabo abya eriteya ekihugho n’esyonyama. Unasi oyo wabya mundu w’erimbere nga nindi? Leka tulebaye.