Erisonda ly’omungu okw’itwe niki?

OMUGHULU ukasoma egazeti, erilebya etelevizyo, kutse erihulikirira eradiyo, ukalangira n’ery’owa emyatsi mingyi ey’erikola ebitatolere, ey’amalwa, n’ey’olutsatsuho olukahutalaya n’erita abandu bangyi. Kwa muhwa naghu unemwaghalwa busana n’endwala kutse eriholerwa n’omundu oyo wanzire.

Teriyibulya:

• Ekyo ky’oMungu anzire ati kinyihikire n’abomo kihanda kyaghe?

• Nangabana obuwatikya bw’erilwa n’ebikanyaghalaya bo hayi?

• Obuholo bw’ekwenene bunemwendisyabya?

EBiblia yikatusubiraya ndeke oko mabulyo ayo.

EBIBLIA YIKAKANGIRIRAYA YITI OMUNGU AKASYAKOLA EBINDU EBIKATSEMESAYA BY’OKO KIHUGHO.

• Abandu sibendisyasy’owa obulumi, sibendisyasyakekeluha, kutse erihola.​—Eribisulirwa 21:4

• ‘[Ekirema] kyasyatwa ebika ng’engabi.’​—Isaya 35:6

• ‘Ameso w’esyondime-time asyalibulwa.’​—Isaya 35:5

• Abaholi bakasyasuba.​—Yoane 5:28, 29

• Sihali oyukendisyalwala.​—Isaya 33:24

• Obuli mundu oko kihugho akasyabya n’ebyalya bingyi.​—Esyonyimbo 72:16

  

EBY’EBIBLIA YIKAKANGIRIRAYA BYANGANAKUWATIKYA

Kyolobire erilengekania uti emilaghe eyiri omo hiyani ehy’erimbere ehy’ekitabu kino ni nzoli buyira. Aliwe oMungu abiribugha ati hakisiya hake iniaberererya emilaghe eyo, kandi eBiblia yikakanganaya ng’akasyakola atya ati.

EBiblia yikakanaya bingyi okwaho. Yikatubwira ebyo tutolere eriminya tutoke eribya n’obutseme bw’ekwenene n’engebe eyuwene lino. Terilengekania hake oko bindu ebikakuletera amaghaniryo. Lyanganabya iry’eribula esyofranga kutse emyatsi eyikahanga-hangaya obunyumba bwaghu, esyondwala, kutse eriholerwa n’omundu oyo w’anzire. EBiblia yanganakuwatikya erilwa n’ebikakwaghalaya, kandi ebyo yikasubiraya oko mabulyo awakwamire hano bikakusubaya omutima w’omonda:

• Tukaghalawa busana naki?

• Twangakinda ebikatwaghalaya byo tuti?

• Twanganabana obutseme omo bunyumba bwetu?

• Omundu akabya ahola akabya ati?

• Tunemwendisyasyalola oko abotwanzire ababirihola?

• Ekyangaleka itwayiketera ngoko oMungu akasyakola ebyosi eby’alagha niki?

Iwe erisoma ekitabu kino kikakanganaya ngoko w’anzire eriminya eby’eBiblia yikakangiriraya. Ekitabu kino kikendikuwatikya. Oko buli nungu (fungu) kuli amabulyo awakendikuwatikya ery’owa eBiblia yo ndeke. Abandu bangyi bakatsema erigha eBiblia n’Abimiri ba Yehova. Tukalengekanaya tuti naghu ukenditsema erigha eBiblia yo haghuma netu. OMungu akutsumule omughulu ukayikasa eriminya eby’eBiblia yikakangiriraya!