Zekaria
9 Bino ni binywa by’oMungu:
“Ebinywa ebyo Yehova akabugha oko kihugho kya Hadraki,
Kandi kutsibu-tsibu bilebirye* Damasko
Kundi Yehova akabya inianasamalire abandu
N’ebihanda byosi bye Israeli.
2 Kandi bilebirye Hamati, eyiri oko mupaka wiwe,
Bilebirye Tiro na Sidoni,
Kundi abandu b’omo bihugho ebyo bakayilangira mo b’amenge kutsibu.
3 Tiro abiriyihimbira omwanya ogho mundu ate angahikamo bweghu-bweghu.
Abirilundika efeza* ng’olututu
Abirilundika n’ehoro ng’ebyondo by’omo syonzira.
4 Muhulikirire! Yehova akendisyaheka ebindu byabo,
Akendisyita abasuda babo n’eribaghusa omo ngetse;*
N’omuyi oyo akendisyatimibwa omo muliro.
5 Ashkeloni akendisyalangira omwatsi oyo n’erisagha;
Gaza akendisyahandabuka kutsibu,
Na Ekroni akendisyahandabuka kutsibu,
Kundi oyo abya akahiramo amaha wiwe abirihemuka.
Omo muyi we Gaza simwendisyabya mwami
N’omo muyi we Ashkeloni simwendisyabya omwikalani.
6 Omwana w’obumbalaka akendisyikala e Ashdodi,
Kandi ngendisyabughaho emiyiheko y’Omufilistini.
7 Ngendisyalusya omo buno bw’Omufilistini mw’ebindu ebiriko omusasi
Kandi ngendisyalusya omo meno wiwe mw’ebindu ebikita esyonye,
N’abandu biwe abakendisyasighalira bakendisyabya b’oMungu wetu;
Akendisyabya ng’omukulu w’ekihanda omo Yuda,
Na Ekroni akendisyabya ng’Omuyebusi.
8 Ngendisyahira ekambi yaghe embere sy’enyumba yaghe,
Nitoke eriteyayo, sihabye oyukingiramo n’oyukaluamo;
Kandi sihali oyukimanira omubiiri* oyukendisyasyalaba muyo,
Kundi ameso waghe abiriyilangirira ekyo.*
9 Mwali we Sioni, utseme kutsibu.
Mwali we Yerusalema, utseme ng’oyukabisinga.
Lebaya! Omwami waghu anemwasa eyo uli.
Atunganene, kandi anemuleta omulamo,*
Akayikehaya kandi ane oko punda,
Ane oko punda y’obulume, oko kyana ky’epunda y’obukali.
10 Ngendisyabugha emitoka y’amalwa omo Efraimu
Ngendisyabugha n’omo Yerusalema mw’esyosabayiri.*
N’obuta* bw’amalwa bukendisyalusibwaho.
Akendisyabwira ebihanda by’omulaghe w’obuholo;
N’obutabali bwiwe bukendisyalua oko ngetse nguma, ibwayahika oko yindi ngetse.
N’eritsuka oko Lusi,* eriyahika oko mipaka y’ekihugho.
11 Iwe mukali, ngendisyalusya abandu baghu abali omo ngomo omo kyuna ekitemo amaghetse
Omo musasi w’endaghane yaghu.
12 Musube omo mwanya ogho mundu ate anghikamo bweghu bweghu,
Inywe bandu abali omo ngomo abali n’amaha.
Iwe mukali, ngakubwira munabwire niti, ‘Ngendisyakutsumula kabiri.
13 Kundi ngendisyakondomya* Yuda ng’obuta.*
Ngendisyahira Efraimu oko buta,*
Sioni, ngendisyabukya abana baghu
Batoke erilwa n’abana baghu, iwe Bugiriki,
Kandi ngendisyakuyira ng’omuyali w’omusuda.’
14 Yehova akendisyalangirika iniane endata kubo,
Omusali wiwe akendisyalua omo buta* ng’obupalyo.
Yehova Omukama Mukulu oko Bosi akendisyabuha omo rihembe,
Kandi akendisyalola embere omo bihunga binene by’oko luhande lw’eyikwa.
15 Yehova w’emilondo akendisyabalwirako,
Kandi bakendisyamera n’erisinga amabwe omo mijeledi.
Bakendisyanywa n’erileta olukanda, ng’oyulyanywa edivai;
Bakendisyusula ng’ekibakuli,*
Ng’esyongonde* sy’ekiherero.
16 Ekiro ekyo, Yehova oMungu wabo akendisyabasabula
Kundi ni syombuli siwe, ni bandu biwe;
Kusangwa bakendisyakangabasania oko kitaka kiwe ng’amabwe w’obughuli awali oko mbita.
17 Obubuya bwiwe ni bunene kutsibu,
Kandi uwene kutsibu!
Engano yikendisyaha abalwana b’akaghala,
N’edivai nyihya-nyihya yikendisyaha ababikira b’akaghala.”