Zekaria
3 Enyuma sy’aho, mwanikangania omuhereri mukulu Yosua inianimene embere sy’omumalaika wa Yehova, na Sitani abya inianimene oko luhande lwiwe lw’amali atoke erilwa naye. 2 Neryo omumalaika wa Yehova mwabwira Sitani ati: “Sitani, Yehova akuhayire! Yehova, oyo wasombola Yerusalema, akuhayire! Sighulangire ngoko omulume oyu ni kihande ky’omuti ekiriko omuliro ekiryalusibawa omo muliro?”
3 Yosua abya ambite esyongyimba esitunda-tundire, kandi abya imene embere sy’omumalaika. 4 Omumalaika mwabwira ababya bimene embere siwe ati, “Mumulusaye esyongyimba esitunda-tundire.” Enyuma sy’aho, mwabwira Yosua ati, “Tahie, nabirikulusyako ekosa yaghu, kandi ukendisyambalibwa esyongyimba esyuwene.”*
5 Neryo munabugha niti: “Ekilemba ekyerire kihirawe oko mutwe wiwe.” Neryo mubahira oko mutwe wiwe kw’ekilemba ekyerire, neryo bamamwambalya esyongyimba; n’omumalaika wa Yehova abya inianimene hakuhi n’aho. 6 Enyuma sy’aho, omumalaika wa Yehova mwabwira Yosua ati: 7 “Yehova w’emilondo ati, ‘Wamabikwama esyonzira syaghe, kandi wamabikola ebyo ngakusaba erikola, ighukendisyabya mutsweri omo nyumba yaghe, kandi ighukendisyasugha* ebibugha byaghe. Kandi ingendisyakulighira eribya omo kati-kati k’abandu abimene hano.’
8 “‘Iwe muhereri mukulu Yosua, n’inywe balikiwe, inywe mwikere embere siwe, kisi muhulikirire, kundi mukendisyabya kindu ekikakanganaya ebikendisyabya. Mulangire, ngabakanganaya omughombe waghe oyukahulawa mo Risasa. 9 Mulangire eribwe eryo niryahira embere sya Yosua. Eribwe eryo ririko ameso 7, kandi ngendisyahandika kuryo kw’ebihandiko,’ Yehova w’emilondo atya, ‘kandi ngendisyabughaho ekosa y’ekihugho ekyo omo kiro kighuma.’
10 “‘Ekiro ekyo,’ Yehova w’emilondo atya, ‘obuli mughuma w’okw’inywe akendisyabya akabwira omuhimbani wiwe ati ase omo ndina y’omuti wiwe w’emizabibu n’omo ndina y’omuti wiwe w’esyotini.’”