Obadia
1 Enzoli ya Obadia:*
Bino by’ebinywa ebyo Yehova Omukama Mukulu oko Bosi akabugha oko Edomu:
“Mutukowa omwatsi mulebe owakalua oko Yehova,
Omutumwa mwakatumawa omo bihanda:
‘Muhangane! Tuyiteghekanaye, tuyalwe na Edomu.’”
2 “Lebaya! Nabirikuyira mo muke kutsibu omo kati-kati k’ebihanda.
Abandu bakupokirye kutsibu.
3 Eriyilabirirya eriri omo mutima waghu ryabirikuteba,
Iwe wikere omo mighenyo y’olukuka,*
Iwe wikere omo myanya y’endata, ukayibwira omo mutima uti,
‘Nindi yukendinindaghalirya oko kihugho?’
4 Nomo wangahira obwikalo bwaghu bw’endata* ng’erisamba,
Kutse nomo wangahira olutu lwaghu omo kati-kati k’esyongununu,
Ngendikukimya,” Yehova atya.
5 “Abibi bamabihika ewaghu, abakapura ebindu bamabyasa omo kiro,
(Ighukendilw’iwatoghotibwa!)*
Isibendiheka ebyo banzire bisa?
Kutse abakoha emizabibu bamabihika ewaghu,
Isibendisigha enyuma y’emizabibu milebe y’eribota-bota?
6 Babirikwesa-kwesa Esau!
Babirikwesa-kwesa ebindu biwe by’obughuli ebibisire!
7 Abira baghu bosi* babirikutibitako n’eriyakukolya oko mupaka.
Babirikuteba.
Abandu ababya omo buholo haghuma naghu babirikukinda.
Abakalya omukati haghuma naghu bakendisyahira obutimba aho ukendisyalaba,*
Aliwe siwendisyaminya.
8 Ekiro ekyo,” Yehova atya,
“Sinendisyatoghotya abandu b’amenge be Edomu
N’eribughaho obutoki bw’eriyiteghererya omo kiharo ky’ebitwa kya Esau.
9 Temani, abasuda baghu bakendisyakwa obuba,
Kundi abandu bosi b’omo kiharo ky’ebitwa kya Esau bakendisyakerwa.
10 Kundi muwakolera mughala wenyu Yakobo omo butsururu,
Esisoni sikendisyakuswika,
Kandi ukendisyatoghotibwa kera na kera.
11 Ekiro wimana luhande butsir’ikola mwatsi,
Ekiro ab’ehandi batwala abasuda biwe b’omo bunyewa,
Omughulu ab’ehandi bingira omo muyi* wiwe n’erikola obukanga busana ne Yerusalema,
Muwakola ng’abo.
12 Isiwayisyandira ekiro mughala wenyu amahikirwa n’obuhanya,
Isiwatsema omughulu abandu be Yuda bamatoghotibwa,
Kandi isiwabugha n’emiyiheko ekiro amahikirwa n’obuhanya.
13 Isiwingira omo muyi* w’abandu baghe ekiro bamahikirwa n’obuhanya,
Isiwayisyandira ekiro bamahikirwa n’obuhanya,
Kandi isiwimaya obuteke bwabo ekiro bamahikirwa n’obuhanya.
14 Isiwimana omo mahwa w’enzira busana n’erikera abandu babo abalyabala,
Kandi ekiro balyahikirawa n’obuhanya, isiwahira abandu babo abalyabala omo byala by’enzighu.
15 Kundi ekiro kya Yehova ekyo akendisyalwamo n’ebihanda byosi kiri hakuhi.
Ukendikolerwa ngoko ulyakola.
Ebyo ulyakolera abandi bikendikusubako.
16 Kundi ngoko wanywira oko kitwa kyaghe kibuyirire,
Kutya ebihanda byosi bikendisyabya ikobinemunywa.
Bikendisyanywa n’erimera,
Kandi bikendisyabya nga sibyebyatabyaho n’ekiro n’ekighuma.
17 Aliwe abakendisyabala bakendisyabya oko Kitwa kye Sioni,
N’ekitwa ekyo kikendisyabya kibuyirire;
N’ekihanda kya Yakobo kikendisyasubana n’ebindu byakyo.
18 Ekihanda kya Yakobo kikendisyabya muliro,
Ekihanda kya Yozefu kikendisyabya kirimi,
N’ekihanda kya Esau kikendisyabya ng’ebiti ebyumire;
Bakendisyahira kubo k’omuliro n’eritimyabo,
Omo kihanda kya Esau simwendisyabala n’omundu n’omughuma,
Kundi Yehova iyuwene-wene abiribugha.
19 Bakendisyimya e Negebu n’ekiharo ky’ebitwa kya Esau,
Bakendisyimya e Shefela n’ekihugho ky’Abafilistini.
Bakendisyimya ekiharo kya Efraimu n’ekiharo kye Semaria,
Na Benyamini akendisyimya e Gileadi.
20 Ekihugho ky’Abakanana eriyahika e Zarefati
Kikendisyabya ky’abanyewa b’omo luba* olu,
Kikendisyabya ky’Abaisraeli.
N’abanyewa be Yerusalema, ababya e Sefaradi, bakendisyimya emiyi ye Negebu.
21 N’abasabuli bakendisyahetukira oko Kitwa kye Sioni
Bakayatswera ekiharo ky’ebitwa kya Esau,
N’obwami bukendisyabya bwa Yehova.”