Ezekieli

45 “‘Omughulu mukendisyaghaba ekihugho mo mwandu erilabira obukanga, mukendisyaha Yehova y’erighabo eribuyirire oko kihugho ekyo. Obuli bw’erighabo eryo bukendisyabya maboko* 25 000, n’obughali bwakyo amaboko 10 000. Ekiharo* kyosi ekyo kikendisyabya righabo eribuyirire. 2 Omo kihugho ekyo mukendisyabya omwanya owabuyirire owalingirirene oko mbande syosi, ow’amaboko 500 oko maboko 500;* n’oko buli luhande hakendisyabya n’olulisiryo lw’amaboko 50. 3 Oko bipimo ebi, ukendisyapima obuli bw’amaboko 25 000 n’obughali bw’amaboko 10 000, n’emwisi mukendisyabya ahabuyirire, ekindu ekibuyirire kutsibu. 4 Rikendisyabya righabo eribuyirire kutsibu omo kihugo busana n’abahereri, abakakola omubiiri w’ahabuyirire, abakaseghera hakuhi erikolera Yehova. Akendisyabya mwanya w’amanyumba wabo n’omwanya owabuyirire busana n’ahabuyirire.

5 “‘Abalawi abakakolera omubiiri oko hekalu, bakendisyabya n’erighabo ly’obuli bw’amaboko 25 000 n’obughali bw’amaboko 10 000; kandi bakendisyimya ebyumba 20 by’eriliramo* ibyabya byabo.

6 “‘Litolere imwimya erighabo imwahalyo omuyi. Erighabo eryo, rikendisyabya ly’obuli bw’amaboko 25 000 (erilingirirene n’erighabo eribuyirire) n’obughali bw’amaboko 5 000. Rikendisyabya ly’abandu bosi b’enyumba ya Israeli.

7 “‘N’omukulu akendisyahabwa ekiharo. Ekiharo ekyo kikendisyabya oko mbande ibiri sy’erighabo eribuyirire n’ekiharo ekyahabawa omuyi. Kikendisyabya hakuhi n’erighabo eribuyirire n’ekiharo ky’omuyi. Kikendisyabya oko luhande lw’eyo eryuba rikalengera n’oko luhande lw’eyo eryuba rikasira. Obuli bwakyo erilua oko mupaka wakyo w’oko luhande lw’eyo eryuba rikalengera n’oko mupaka wakyo w’oko luhande lw’eyo eryuba rikasira bukendisyalingirirana n’obuli bw’ekiharo ky’ekighuma ky’oko bihanda. 8 Ekiharo ekyo kikendisyabya kiwe omo Israeli. Abasondoli baghe sibendisyasyaghalya abandu baghe, kandi bakendisyaghabira abandu b’enyumba ya Israeli b’ekihugho erikwamana n’ebihanda byabo.’

9 “Yehova, Omukama Mukulu oko Bosi ati: ‘Mwabirikita kutsibu, inywe basondoli ba Israeli!’

“Muleke obutsururu bwenyu, muleke n’erikolobokya abandu, neryo mukole ebyuwene n’ebitunganene. Muleke eriyimirya ebindu by’abandu baghe,’ Yehova, Omukama Mukulu oko Bosi atya. 10 ‘Litolere imwakolesya ebilo by’ekwenene, ekipimo kye efa* eky’ekwenene, n’ekipimo ky’ebati* eky’ekwenene. 11 Litolere ihabya ekipimo ekihirirweho ekye efa n’ebati. Ebati nguma litolere iyabya kighuma ky’omw’ikumi kye omeri,* ne efa nguma litolere iyabya kighuma ky’omw’ikumi kye omeri. E omeri yo ikendisyabya kipimo ky’erighenderako. 12 Eshekeli nguma litolere iyabya gera 20. N’esyoshekeli 20 erihirako esyokeli 25 erisyahirako esyoshekeli 15, ebyosi haghuma bikendisyabya mane* nguma.’

13 “‘Ekihembo ekyo litolere imwaleta kya kino: ekighuma ky’oko 6 kye efa erilua oko buli omeri nguma y’engano, n’ekighuma ky’oko 6 kye efa erilua oko buli omeri y’ekisusu. 14 Erighabo ly’amaghuta litolere iryapimwa omo kapimo k’ebati. Ebati nguma ni kighuma ky’omw’ikumi kye kori,* n’esyobati 10 ni omeri nguma, kundi esyobati 10 silingene ne omeri nguma. 15 N’omo kihyo ky’Abaisraeli, litolere embuli nguma iyatekwa oko syombuli 200. Esi sikendisyabya sy’obuhere bw’eyisyano, obuhere bw’eryokererya obukahererawa obwosi, n’obuhere bw’obuholo,’* Yehova, Omukama Mukulu oko Bosi atya.

16 “‘Abandu bosi b’omo kihugho bakendisyaha omukulu oyuli omo Israeli y’ekihembo eki. 17 Nikwa omukulu akendisyabya n’omubiiri w’amahere w’eryokererya awakahererawa awosi, obuhere bw’eyisyano, obuhere bw’obwabu omughulu w’ebiro bikulu, emighenda mihya-mihya, esyosabato, n’ebindi biro bikulu ebyabirihirwaho eby’abandu b’enyumba ya Israeli. Y’ukendisyateka obuhere bw’erilolo, obuhere bw’eyisyano, obuhere bw’eryokererya obukahererawa obwosi, n’amahere w’obuholo,* busana n’erilihira abandu b’enyumba ya Israeli b’embanulo.’

18 “Yehova, Omukama Mukulu oko Bosi ati: ‘Oko mwisi w’erimbere, ekiro ky’erimbere ky’omwisi, litolere iwimya erilua omo kihangulo enume y’ende eyikine nyilere eyiteko bulema, neryo ukendisyerya ahabuyirire oko rilolo. 19 Omuhereri akendisyimya oko musasi w’obuhere bw’erilolo inyahiragho oko kadrema k’omulango w’ehekalu, oko mahembe ani w’omunywa owatimbire oko kiherero, n’oko kadrema k’omulango w’ekibugha ky’emwisi. 20 Ekyo kyo ukendisyakola omo kiro kye 7 ky’omwisi busana n’owosi-wosi oyukahalaya omw’itandalwa kutse omo butaminya; kandi litolere imwalihira ehekalu y’embanulo.

21 “‘Omo mwisi w’erimbere, ekiro kye 14 ky’omwisi oyo, mukendisyakola ekiro kikulu ky’Epasaka.* Omukati owatemo levire* litolere inyalibwa omo biro 7. 22 Ekiro ekyo, omusondoli akendisyateka enume y’ende mo buhere bw’erilolo busana naye iyuwene-wene, na busana n’abandu b’omo kihugho. 23 Omo biro 7 ebyo, eby’ekiro kikulu, akendisyaletera Yehova esyonume sy’esyonde 7 esikine nyilere esiteko bulema n’esyombangale 7 esiteko bulema mo buhere bw’eryokererya obukahererawa obwosi, omo buli kiro ky’oko biro 7 ebyo. Akendisyaleta n’embaya obuli kiro mo buhere bw’erilolo. 24 Kandi atolere inyabana n’obuhere bw’eyisyano obwe efa nguma busana n’obuli nume y’ende eyikine nyilere ne efa nguma busana n’obuli mbangale, n’ehini* nguma y’amaghuta busana n’obuli efa.

25 “‘Omo mwisi we 7, ekiro kye 15 ky’omwisi oyo, omo biro 7 omughulu w’ekiro kikulu, litolere inyateka obuhere bughumerera bw’erilolo, obuhere bw’eryokererya obukahererawa obwosi, obuhere bw’eyisyano, n’amaghuta.’”