Ezekieli
42 Enyuma w’aho, mwanileta omo kibugha ky’ehihya erilolera oko luhande lw’endata. Neryo mwanileta oko nyumba y’ebyumba by’eriliramo hakuhi n’omwanya owatemoki, oko luhande lw’endata lw’enyumba eyikwamire. 2 Obuli bw’enyumba eyo oko bwingiriro bw’endata bwabya maboko* 100, n’obughali bwayo bwabya maboko 50. 3 Enyumba eyo yabya omo kati-kati k’ekibugha ky’emwisi ekyabya ky’obughali bw’amaboko 20, n’omwanya owasesire w’ekibugha ky’ehihya. Ebiyira* byayo byabya bisamalirene oko syo etaje isatu erilola endata. 4 Embere w’ebyumba by’eriliramo* habya enzira y’emwisi y’obughali bw’amaboko 10 n’obuli bw’amaboko 100.* Esyonyukyo sy’ebyumba ebyo syabya oko luhande lw’endata. 5 Ebyuma by’eriliramo eby’oko etaje y’endata byabya bike-bike oko bye etaje y’eyikwa n’ey’omo kati-kati, kusangwa esyobalko musyalya omwanya wabyo munene. 6 Kusangwa abya maetaje asatu, kandi isyawite esyonduyi ng’esyonduyi sy’ebibugha, kyo kyaleka omwanya wabyo inialibwa kutsibu kwilaba owe etaje y’ahisi n’ey’omo kati-kati.
7 Oluhimbo lw’ehihya olw’amabwe olwabya hakuhi n’ebyumba by’eriliramo olwabya lulolere oko kibugha ky’ehihya eritungererana n’ebindi byumba by’eriliramo, lwabya lw’obuli bw’amaboko 50. 8 Kusangwa obuli bw’ebyumba by’eriliramo ebyabya ebwanga bw’ekibugha ky’ehihya bwabya maboko 50, nikwa obw’ebyumba ebisamalirene n’ahabuyirire bwabya maboko 100. 9 Ebyumba by’eriliramo byabya n’enzira y’eringiriramo oko luhande lw’eyo eryuba rikasira eyo abandu bakingirira mubyo erilua omo kibugha ky’ehihya.
10 Habya n’ebyumba by’eriliramo emwisi* w’oluhimbo lw’amabwe lw’ekibugha ky’ehihya erilolera oko luhande lw’eyo eryuba rikasira, hakuhi n’omwanya owatemoki n’enyumba. 11 Embere wabyo yabya enzira eyiri ng’enzira y’ebyumba by’eriliramo ebiri oko luhande lw’endata. Obuli bwabyo n’obughali bwabyo, byabya bilingirirene, kandi byabya n’ah’erihulukira haghumerera n’emitwire mighumemerera. Obwingiriro bwabyo 12 bwabya ng’obw’ingiriro bw’ebyumba by’eriliramo ebyabya bilolere oko luhande lw’eyikwa. Ahatsukire enzira habya obwingiriro, embere w’oluhimbo lw’amabwe, oluhererenie nakyo oko luhande lw’eyo eryuba rikasira, aho abandu babya bakingirira.
13 Neryo mwanibwira ati: “Ebyumba by’eriliramo by’oko luhande lw’endata n’ebyumba by’eriliramo by’oko luhande lw’eyikwa ebiri hakuhi n’omwanya owatemoki ni byumba ebibuyirire, aho abahereri abakahika hakuhi na Yehova bakalira amahere awabuyirire kutsibu. Omo mo bakahira amahere, amahere awabuyirire kutsibu, obuhere bw’eyisyano, obuhere bw’erilolo, n’obuhere bw’olubanza,* kusangwa omwanya oyo abuyirire. 14 Omughulu abahereri bakingira, sibatolere bakahuluka erilua omo habuyirire erihulukira omo kibugha ky’ehihya bate balusya esyongyimba esyo bakakola nasyo omubiiri, kusangwa sibuyirire. Litolere ibambala esindi ngyimba imo bahika omo myanya eyo abandu bahamulirwe.”
15 Abere abibugha eripima omwanya w’emwisi w’ehekalu,* mwanihulukya erilaba omo nzira y’olukyo olutungerere oluhande lw’eyo eryuba rikasira. Neryo mwapima omwanya wosi.
16 Mwapima oluhande lw’eyo eryuba rikasira omo luseke lw’eripimamo.* Erikwamana n’oluseke lw’eripimamo, omwanya oyo mwayira obuli bw’esiseke 500 eritsuka oko luhande lughuma erihika oko lundi luhande.
17 Mwapima oluhande lw’endata. Erikwamana n’oluseke lw’eripimamo, omwanya oyo mwabya n’obuli bw’esiseke 500.
18 Mwapima oluhande lw’eyo eryuba rikasira. Erikwama n’oluseke lw’eripimamo, omwanya oyo mwabya n’obuli bw’esiseke 500.
19 Mwatimbira oko luhande lw’eyo eryuba rikalengera. Mwapima obuli bw’esiseke 500 omo luseke lw’eripimamo.
20 Mwapima omwanya oyo oko syombande syosi ini. Abya atimbireko oluhimbo lw’obuli bw’esiseke 500 n’obughali bw’esiseke 500, erighaba ahabuyirire n’ah’ahamulirwe abandu bosi.