Ezekieli

26 Oko mwaka we 11 oko kiro ky’erimbere eky’omwisi, ekinywa kya Yehova mukyanihikako kiti: 2 “Mughala w’omudu, kundi abandu be Tiro babiribugha muhanda oko Yerusalema bati, ‘Si h’aho! Olukyo lunene olo abandu babya bakalabamo lwabiribunzungulwa! Kundi abiribunzungulwa,* obuli kindu kikendyasa ewaghe, naghe ngendibya muteke; 3 neryo Yehova, Omukama Mukulu oko Bosi ati: ‘Eryo ngalwa naghu, iwe Tiro, kandi ngendileta ebihanda bingyi erilwa naghu, ngoko engetse ikanaleta ebisunda byayo. 4 Bakendihimbula esyombimbo sye Tiro n’amanyumba wayo mali-mali. Ngendihalayo omutaka wosi, neryo e Tiro iyabya lukuka olutekoki oluhenirye. 5 Ikendibya kibugha ky’eryumiryamo amatimba omo kati-kati k’engetse.’

“‘Kusangwa ingyuwene-wene nabiribugha,’ Yehova, Omukama Mukulu oko Bosi atya, ‘kandi ikendibya kindu ekyo ebihanda bikahunga. 6 N’abandu b’omo milongo eyitimbire kuyo bakendiitwa omo muyali, neryo abandu bakendiminya ngoko indi Yehova.’

7 “Kusangwa Yehova Omukama Mukulu oko Bosi ati: ‘Eryo hano ngaleta Omwami Nebukadneza* we Babiloni erilua oko luhande lw’endata erisyalwa ne Tiro. Iye ni mwami w’abami, kandi awite oko syosabayiri, esyongurubani sy’amalwa,* abakaghendaya esyosabayiri, n’omulondo munene w’abasuda.* 8 Akendiita omo muyali abandu b’omo milongo y’omo biharo byaghu, kandi akendikutimbyako oluhimbo lw’erikubambira. Akendikutimbyako n’oluba lw’erikubambira, inyasumba n’engabo nene akalwa naghu. 9 Akendisambula esyombimbo syaghu omo mipundo yiwe, n’eriterya amanyumba waghu mali-mali omo syombasa* siwe. 10 Esyosabayiri siwe sikendibya nyingyi kutsibu erihika oko kika isyakuswika olututu. N’ebikindo by’abakaghenda oko syosabayiri, ebiringo, n’esyongurubani,* bikendileka esyombimbo syaghu isyasukana, ng’abalume abakakumukalira omo muyi w’esyombimbo esisambukere. 11 Ebighera by’esyosabayiri siwe bikendilyatangira esyonzira syenyu syosi sy’omuyi; akendiita abandu baghu omo muyali n’esyonduyi syaghu sy’amaka akenditulangirasyo oko kitaka. 12 Bakendiheka obuteke bwaghu n’eriyihekera ebindu byaghu by’ekomerse, ibaterya esyombimbo syaghu, n’eriterya amanyumba waghu awaghambire; neryo bakendighusa omo maghetse amabwe waghu, ebindu byaghu by’esyombagho, n’omutaka waghu.’

13 “‘Ngendileka olukanda lw’esyonyimbo syaghu ilumbya, n’omulenge w’enanga* yaghu syendisyasyowika. 14 Naghe ngendisyakuyira mo lukuka olutekoki oluhenirye neryo ukendisyabya kibugha ky’eryumiryamo amatimba. Siwendisyasyahimbwa, kusangwa ingye Yehova, ingyuwene-wene nabiribugha,’ Yehova Omukama Mukulu oko Bosi atya.

15 “Yehova Omukama Mukulu oko Bosi akabwira e Tiro ati: ‘Ebitsira sibyendisyatitimana kwehi bikowa olukanda lw’eritera lyaghu, omughulu abakasonda erihola* bakendisyabya ibanemusimba kutsibu, n’omughulu abandu bakendisyabya ibanemwitwa ewaghu? 16 Abanya-mwami bosi abikere oko ngetse bakendisyakima oko bitumbi byabo by’obwami ibalusya esyokanzu syabo n’erilusya esyongyimba syabo esiriko esyodese, kandi bakendisyatitimana omo buba. Bakendisyikala oko kitaka ibatitimana lughumerera n’erikutungerera ibabirikukubala. 17 Bakendisyakwimbira olwimbo lw’ekiriro* n’erikubwira bati:

19 “Kusangwa Yehova, Omukama Mukulu oko Bosi ati: ‘Omughulu ngendikuyira mo mulala ng’emiyi eyitikeremo abandu, omughulu ngendikusulyamo amaghetse, n’amaghetse w’amaka inyakulengako, 20 iwe haghuma n’abandu abakandaghalira omo kyuna haghuma naghu,* ngendisyabaleta ahali abandu ba kera kera; ngendikwikalya omo mwanya w’ahisi kutsibu, ng’emyanya ya kera eyabiriyirwa mo matongo, haghuma n’abakandaghalira omo kyuna, neryo iwabya isiwangatasyikalwamo. Neryo ngendisyaha ekihugho ky’abaliho ky’olukengerwa.*

21 “‘Omw’itsumbukania, ngendikuletako obuba bunene, naghu ukendibulirana. Bakendikusonda-sonda, aliwe siwendisyasungika,’ Yehova Omukama Mukulu oko Bosi atya.”