Ezekieli
19 “Litolere iwimbira abakulu be Israeli b’olwimbo lw’obulighe* 2 n’eribugha uti:
‘Mama waghu abya ndi? Endale y’obukali omo kati-kati k’esyondale.*
Inyakaghotsera omo misuko y’esyondale* esy’amaka.
3 Mwakulya ekighuma ky’oko byana biwe, nakyo mukyabya musuko w’endale* ey’amaka.
Muyigha eritulanga ebyo iryahamba mo hihande-hihande,
Nibya muyalya n’abandu.
4 Ebihanda mubyowa engulu yayo neryo mubyahambayo omo kyuna kyabyo,
Nabyo mubyaletayo e Misri omo syondoano.
5 Mwalindirira, n’oko nduli mwalangira ngoko sihali amaha wosi-wosi w’erisubula.
Neryo mwimya ekindi ky’oko byana biwe, amatumakyo mo musuko w’endale* ey’amaka.
6 Nayo muyatimba-timba omo kati-kati k’esyondale neryo muyabya musuku w’endale* ey’amaka.
Muyigha eritulanga ebyo iryahamba, kandi nibya muyalya n’abandu.
7 Muyatimba-timba omo minara* yabo eyikongotere n’eritsandya emiyi yabo eyikongotere,
Erihika oko kika eriruruma lyayo lyamusula oko kihugho ekyabya matongo.
8 Ebihanda by’omo biharo bya hakuhi mubyasa erisyaghusa kuyo kw’obutimba bwabyo,
Nayo muyahambwa omo kyuna kyabyo.
9 Mubahirayo omo kaje* omo syondoano bamatwalirayo omwami we Babiloni.
Mubaboherayo eyo, omulenge wayo isyasyowika oko bitwa bya Israeli.
10 Mama waghu abya ng’omuliki w’omuzabibu omo musasi* waghu, owaherire hakuhi n’amaghetse.
Busana n’amaghetse mangyi, mwahetya amatunda kandi mwusulako amatahi.
11 Mwasako amatahi awakala-kalire, awatolere eribya mutso w’abami ow’obwami.*
Mwakula, amayimoleka kwilaba eyindi miti,
Kandi mwalangirika busana n’obuli bwagho na busana n’ebiti byagho bingyi.
12 Aliwe mwakulwa omo buhitane, amaghuswa oko kitaka,
N’erihunga ly’eyo eryuba likasira muryumya amatunda wagho.
Amatahi wagho awakala-kalire mwatwibwa amuma, n’omuliro mwahisyagho.
13 Lino aherire omo mbwarara,
Omo kihugho ekitemo amaghetse, ekikwire enyota.
14 Omuliro mwalanda erilua omo matahi* wagho amahisya amasasa wagho n’amatunda wagho,
Kandi muhatasighala eritahi n’erighuma erikala-kalire, sihali omutso w’obwami* busana n’eritabala.
“Olo lo lwimbo lw’obulighe, kandi lukendisyakolesibwa mo lwimbo lw’obulighe.