Ezekieli
12 Kandi ekinywa kya Yehova mukyambikako kiti: 2 “Mughala w’omundu, wikere omo nyumba y’abahona. Bawite ameso, nikwa sibelangira, bawite amatwi, nikwa sibalyowa, kusangwa ni nyumba y’abahona. 3 Nikwa iwe mughala w’omundu, uyiteghekaniraye omuheke w’erighenda nagho omo bunyewa. Neryo omw’itungyi ibanasamalire, ukendighenda omo bunyewa. Ulue omo nyumba yaghu, ughende ahandi ng’omundu oyukaghenda omo bunyewa ibanasamalire. Kwa muhwa bakendilangira ekyo, nomo bane kihanda ky’abahona. 4 Omw’itungyi ibanasamalire, ukendihulukya omuheke waghu ogho wabirisenga ow’erighenda nagho omo bunyewa. Neryo n’omw’igholo ibanatungerere, ukendihongoka ng’omundu oyukatwalawa omo bunyewa.
5 “Ibanatungerere, ukenditobola omo luhimbo mw’ekyuna, iwaheka ebindu byaghu n’erilaba omo kyuna ekyo. 6 Ibanasamalire, ukendihira ebindu byaghu by’oko kitigho, iwahulukiryabyo ehihya omo mwirimya. Ukendiswika obusu bwaghu isiwalangira ekitaka, kusangwa ngakuyira mo kiminyikalo busana n’enyumba ya Israeli.”
7 Munakola ngoko nanalayirawa. Omw’itungyi, muhahulukya omuheke waghe ng’omuheke w’erighenda nagho omo bunywewa, n’omw’igholo munatobola ekyuna omo luhimbo omo byala. N’omw’irimya mwabya abiwa ahisi, munahulukya omuheke waghe ibanasamalire, ininahekiregho oko kitigho.
8 Omo tututu, kandi ekinywa kya Yehova mukyanihikako, kiti: 9 “Mughala w’omundu, enyumba ya Israeli, enyumba y’abahona,* mubatitakubulya bati, ‘Ukayira uti kwe?’ 10 Ubwirebo uti, bino byo Omukama Mukulu oko Bosi Yehova akabugha, ‘Omulaghe ono alebirye omukulu oyuli e Yerusalema n’abandu bosi b’enyumba ya Israeli abali omo muyi.”’
11 “Ubwirebo uti, ‘Niri kiminyikalo busana nenyu. Ngoko ninalyakola, nabo ko banemwendisyakolerwa batya. Bakendisyatwala ehandi omo bunyewa. 12 Omukulu oyuli omo kati-kati kabo akendisyaheka ebindu biwe oko kitigho kandi akendisyaghenda omo mwirimya. Akendisyatobola ekyuna omo luhimbo neryo akendisyalabya mukyo mw’ebindu biwe. Akendisyaswika obusu bwiwe, isyalangira ekitaka.’ 13 Ngendisyamughusako obutimba bwaghe, naye akendisyahambwa omo butimba bwaghe bw’erihighamo. Neryo ngendisyamutwala e Babiloni omo kihugho ky’Abakaldea, aliwe syendisyalangirakyo, kandi akendisyaholera eyo. 14 N’abosi abamutimbireko, abakamuwatikaya n’abasuda biwe, ngendisyapanza-panzirabo oko mbande syosi; kandi ngendisyalusya omuyali omo lubo lwagho neryo inakwamirirabo. 15 Nabo bakendisyaminya ngoko indi Yehova omughulu ngendisyapanza-panzirabo omo bihanda n’eripanzalikaniabo omo bihugho. 16 Aliwe abake ba kubo ngendisyabalyabo oko muyali, oko nzala, n’oko kihunzo, batoke eriyakania oko mikolere yabo yosi eyikita nye omo bihanda eyo bakendisyaya; kandi bakendisyaminya ngoko indi Yehova.”
17 Kandi ekinywa kya Yehova mukyanihikako, kiti: 18 “Mughala w’omundu, litolere iwalya omukati waghu ighunemutitimana n’erinywa amaghetse waghu ighunemuhandabuka n’erihangya-hangya. 19 Ubwire abandu b’omo kihugho uti, ‘Yehova, Omukama Mukulu oko Bosi akabwira abikalani be Yerusalema abali omo kihugho kya Israeli ati: “Bakendisyalya akalyo kabo emitima isiyiri omo nda n’erinywa amaghetse wabo omo buba, kusangwa ekihugho kyabo kikendisyabya matongo ndeke-ndeke busana n’obukatsu bw’abosi abikere mukyo. 20 Emiyi eyikeremo abandu, ikendisyatsandibwa, n’ekihugho kikendisyabya kima; nenyu mukendisyaminya ngoko indi Yehova.”’”
21 Kandi ekinywa kya Yehova mukyanihikako, kiti: 22 “Mughala w’omundu, simunawite omusyo omo Israeli owakabugha ati, ‘Ebiro bikalaba aliwe sihali esyonzoli esikabererera!’ 23 Neyo ubwirebo uti, ‘Yehova, Omukama Mukulu oko Bosi ati: “Ngendisyaleka omusyo oyo inyumbya, kandi simwendisyasyakolesyagho omo Israeli mo kasimo.”’ Aliwe ubwirebo uti, ‘Ebiro biri hakuhi, esyonzoli syosi sikendibererera.’ 24 Kusangwa omo nyumba ya Israeli, simwendisyasyabya esyonzoli sy’amabehi n’eriminyerera ry’ekisehya.* 25 “Kusangwa ingye Yehova ngendisyabugha. Ekinywa kyosi-kyosi ekyo ngendisyabugha kikendisyakolwa butsir’itselewa. Omo biro by’enyu, inywe nyumba y’abahona, ngendisyabugha ekinywa kandi ngendisyaberereryakyo,” Yehova, Omukama Mukulu oko Bosi, atya.’”
26 Kandi ekinywa kya Yehova mukyanihikako, kiti: 27 “Mughala w’omundu, abana* ba Israeli banemubugha bati, ‘Esyonzoli esyo akalangira, sikendisyabugha mughulu muli imo syabererera, n’emyatsi eyo akabugha omo buminyereri ikendisyabya omo biro ebikasa ebiri hali.’ 28 Busana n’ekyo, ubwirebo uti, ‘Bino byo Yehova, Omukama Mukulu oko Bosi akabugha: “Sihali ekinywa kyaghe n’ekighuma ekikenditselewa; ekyosi-kyosi ekyo ngabugha kikendikolwa,’ Yehova, Omukama Mukulu oko Bosi, atya.”’”