Ezekieli
10 Ininatungerere, munalangira endata oko kyanya ekyabya oko mitwe y’abakerubi ekindu ekisosire eribwe ly’eyakuti, ikine endata kubo. Kyabya kindu ekisosire ekitumbi ky’obwami. 2 Neryo mwabwira omulume oyo wabya ambite olukimba lw’ekitani ati: “Ingira omo biringo, emwisi w’abakerubi, usulaye omo byala byaghu bibiri mw’amakala awakaka awakalua omo kati-kati k’abakerubi, utsatsangegho oko muyi.” Neryo mwingira ininatungerere.
3 Omughulu omulume oyo ingira, abakerubi babya bimene oko luhande lw’enyumba, n’ekitu mukyusula omo kibugha ky’emwisi. 4 N’olukengerwa lwa Yehova mulwahetuka erilua oko bakerubi, erilolera oko kadrema k’omulango w’enyumba; neryo ekitu mukyasa kikusula omo hekalu, n’ekibugha ky’ehihya mukyusulamo erikangabasania ry’olukengerwa lwa Yehova. 5 n’omulenge w’ebipupa by’abakerubi inyakowika omo kibugha ky’ehihya. Abya ng’omulenge w’Omutoki w’Ebyosi omughulu akabugha.
6 Neryo mwalayira omulume oyo wabya ambite olukimba lw’ekitani ati: “Wimaye omuliro omo kati-kati k’ebiringo, erilua omo kati-kati k’abakerubi. Neryo mwingira, amimana hakuhi n’ekiringo. 7 Neryo omughuma w’oko bakerubi mwasumba ebyala biwe erihika oko muliro owabya omo kati-kati k’abakerubi. Mwimya kugho, amahiragho omo byala bibiri by’omulume oyo wabya ambite ekitani. Naye mwimyagho amahuluka. 8 Ebyala ebyabya emwisi sy’ebipupa by’abakerubi byabya bisosire ebyala by’omundu.
9 Ininatungerere, munalangira ebiringo bini aho lutambi oko bakerubi. Ekiringo kighuma oko luhandi lw’obuli mukerubi. Ebiringo ibikabya nga bikakangabasanaya ng’eribwe ry’ekrisolito. 10 Ko byabya bisosire bitya: ebiringo bini byosi byabya bisosene. Ekiringo kighuma ikikabya nga kiri omo kindi kiringo. 11 Ibikabya bikaghenda, ibikaghenda oko syombande ini syosi butsir’iribinduka, kusangwa ibikaghenda eyo omutwe asamalire butsira eribinduka. 12 Abakerubi babya boswireko ameso oko mibiri yabo yosi, oko mighongo yabo, oko byala byabo, n’oko bipupa byabo. N’ebiringo byosi, ebiringo by’abosi bani, byabya byoswireko ameso oko mbande syosi. 13 Oko mwatsi w’ebiringo, munowa omulenge akabirikirabyo ati: “Biringo!”
14 Obuli mughuma* abya awite amusu ani. Obusu bw’erimbere bwabya bw’omukerubi, obw’akabiri bwabya bw’omundu,* obw’akasatu bwabya bw’endale,* n’obw’akani bwabya bw’erisamba.
15 N’abakerubi ibakahetukira endata—babya ibye n’ebihangyikwa ebiriho* ebyo nalangira oko lusi lwe Kebari. 16 Omughulu abakerubi babya bakaghenda, ebiringo ibikaghenda aho lutambi kubo, n’omughulu abakerubi babya bakasumba ebipupa byabo eribya endata oko kihugho, ebiringo isibiribinduka kutse erilua ako luhande lwabo. 17 Ibakabya bakimana, n’ebiringo nabyo ibikimana; n’omughulu babya bakahetuka, n’ebiringo ibikahetuka haghuma nabo, kusangwa ekirimu ekyabya omo bihangyikwa ebiriho ebyo kyabya n’omo biringo.
18 Neryo olukengerwa lwa Yehova mulwalua ahikwa oko mulango w’olukyo lw’enyumba, lwamahangana endata oko bakerubi. 19 Neryo abakerubi mubasumba ebipupa byabo bamabatuka oko kitaka ininatungerere. N’ebiringo byabya aho lutambi kubo bakahetuka. Mubimana oko bwingiriro bw’enyumba ya Yehova, oko luhande lw’eyo eryuba rikasira, n’olukengerwa lw’oMungu wa Israeli lwabya endata kubo.
20 Ebi bye bihangyikwa ebiriho* ebyo nalangira emwisi w’ekitumbi ky’oMungu we Israeli oko lusi lwe Kebari, neryo munaminya ngoko babya ini bakerubi. 21 Ebihangyikwa bini ebyo, obuli kighuma kyabya kiwite amusu ani, ebipupa bini, n’emwisi w’ebipupa byabo habya ebyabya bisosire ng’ebyala by’omundu. 22 N’erisosa ly’amusu wabyo, lyabya lisosire amusu agho nabya inabirilangira oko lusi lwe Kebari. Obuli kighuma ikikaghenda embere butsir’ikita.