Yeremia
47 Bino by’ebinywa ebyo Yehova abwira omuminyereri Yeremia ebilebirye Bafilistini, embere Farao asinge e Gaza. 2 Yehova ati:
“Hulikirira! Amaghetse akendilua oko luhande lw’endata.
Akendibya lusi olukabwagha.
Akendibwahira omo kihugho n’omo buli kindu ekirimo,
Omo muyi n’omo bikalani bamo.
Abandu bakendilaka,
N’abandu bosi abikere omo kihugho ekyo bakendisimba.
3 Omughulu bakendisyowa ebikindo by’ebighera by’esyosabayiri* siwe sy’obulume,
Efuyo y’emitoka yiwe y’amalwa,
Efuyo y’ebiringo biwe,
Nibya n’abobaba sibendisyasuba enyuma batoke eriyawatikya abana babo,
Kundi ebyala byabo bikendisyabya ibyabirileghetsana,
4 Kusangwa ekiro ekikasa kikendisyatoghotya Abafilistini bosi;
Kikendisyabugha omo muyi we Tiro n’owe Sidoni mw’abawatikya babo bosi abasaka.
5 Gaza akendisyabyako oluhala.*
Ashkeloni abirihunibwa.
Iwe wasaka w’omo ribanda ryabo eriri ng’embawarara,
Erihika mughulu wahi ukendibya ighunemuyisara-sara?
6 Aaa! Iwe muyali wa Yehova!
Ukendisalawahuna mughulu wahi?
Suba omo lubo* lwaghu!
Luhuka n’eribya bukutu!
7 Angatoka ati eribya bukutu
Yehova abimubwira ati akole?
Abirimubwira ati alwe ne Ashkeloni n’omwanya owali oko musike-sike w’engetse,
Eyo yo alyamutuma.”