Yeremia
42 Neryo abakulu bosi b’abasuda, na Yohanani mughala wa Karea, Yezania mughala wa Hosaya, n’abandu bosi, eritsuka oko mulere erihika oko mukulu, mubasa, 2 bamabwira omuminyereri Yeremia bati: “Kisi, utuwatikaye, kandi utusabire oko Yehova oMungu waghu, itwe n’abosi abalyasighala aba, kundi ngoko wamalangira, itwe twanabya banene twabiribya bake. 3 Yehova oMungu waghu atukanganaye enzira eyo tutolere itwalabamo n’ebyo tutolere itwakola.”
4 Omuminyereri Yeremia mwabasubirya ati: “Namabyowa ebyo mwamabinibwira. Kandi ngendisaba Yehova oMungu wenyu erikwamana n’ebyo mulyanisaba; ngendibabwira ebyosi ebyo Yehova akendinisubirya. Sinendibabisa omwatsi wosi-wosi.”
5 Mubasubirya Yeremia bati: “Yehova abye mwimiri* wetu w’ekwenene kandi mutaleghula twamatendikola ebyo Yehova oMungu waghu akenditubwira erilabira iwe ati tukole. 6 Kyangabya kibuya kutse kibi, tukendikwama omulenge wa Yehova oMungu wetu oyo tukakutumako, emyatsi itoke eritughendera ndeke kundi mutukakwama omulenge wa Yehova oMungu wetu.”
7 Ebiro 10 mubyabya byabilaba, Yehova mwakania na Yeremia. 8 Neryo Yeremia mwabirikira Yohanani mughala wa Karea n’abakulu bosi b’abasuda ababya haghuma naye n’abandu bosi, eritsuka oko mulere erihika oko mukulu. 9 Mwababwira ati: “Yehova, oMungu we Israeli, oyo mulyanitumako muti nimulembe-lembe niti abakanganaye olukogho, ati: 10 ‘Mwamabiligha erisighala omo kihugho kino, ingendisyabahimba omo mwanya w’eribahimbula, kandi ingendisyabahera omo mwanya w’eribakulanga, kundi ngendisyayikubya bomo* busana n’obuhanya obo niryabaletera. 11 Isimwakwa obuba busana n’omwami we Babiloni, oyo mukasagha.’
“‘Isimwakwa obuba busana naye,’ Yehova atya, ‘kundi niri haghuma nenyu busana n’eribasabula n’eribalusya omo byala biwe. 12 Kandi ngendibakwira obulighe, naye akendibakwira obulighe n’eribasubya omo kihugho kyenyu.
13 “‘Aliwe mwamabibugha muti, “Iyehe, sitwendisighala omo kihugho kino!” kandi mwamatendikwama omulenge wa Yehova oMungu wenyu 14 omw’ibugha muti, “Iyehe, tukendiya e Misri, eyo tutetwangalola oko malwa kutse eryowa omulenge w’erihembe, eyo tutetwangabula eky’erirya;* eyo yo tukendikala,” 15 neryo muhulikirire ekinywa kya Yehova, inywe bandu be Yuda abalyasaka. Yehova w’emilondo, oMungu we Israeli, ati: “Mwamabya imwabiriyisogha kundu eriya e Misri kandi mwamabiyikalayo,* 16 omuyali ogho mukasagha iniakendibahikako eyo, omo kihugho kye Misri, n’enzala eyo mukasagha iyikendikendibakwamirira e Misri, kandi imukendiholerayo. 17 N’abandu bosi ababiriyisogha eriyikala e Misri bakendihola omo muyali, omo nzala, n’omo kihunzo.* Sihali n’omughuma oyukendibala oko buhanya obo ngendileterabo.”’
18 “Kundi Yehova w’emilondo, oMungu we Israeli, ati: ‘Ngoko nutulira ekinigha kyaghe n’erihitana ryaghe oko bikalani be Yerusalema, kutya ngendibutulirako erihitana ryaghe mwamabiya e Misri. Kandi abandu bakendibya bakabahula omughulu bakatakira, mukendibya ekindu ekikita obuba, mukenditakirwa, kandi mukendihemuka, kandi simwendisyasyalola oko mwanya ono.’
19 “Yehova abiribahayira, inywe bandu be Yuda abalyasaka. Isimwaya e Misri. Muminye ekyo, ingye namabibabwira munabwire 20 ngoko ekosa yenyu ikendisyaleka imwahola.* Mumwanituma oko Yehova oMungu wenyu, muti, ‘Utusabire oko Yehova oMungu wetu. Ukenditubwira ebyosi ebyo Yehova oMungu wetu akendibugha, netu tukendikolabyo.’ 21 Namabibabwira munabwire ekyo alyabugha, aliwe simwendikwama ebyo Yehova oMungu wenyu alyabugha kandi simwendikola omwatsi wosi-wosi ogho alyanituma ati nibabwire. 22 Aliwe, muminye ngoko oko kwenene-kwenene mukendihola omo muyali, omo nzala, n’omo kihunzo, omo kihugho ekyo mwanzire eriyikalamo.”