Yeremia
38 Neryo Shefatia mughala wa Matani, Gedalia mughala wa Pashuri, Yukali mughala wa Shelemia, na Pashuri mughala wa Malkiya mubowa Yeremia akabwira bandu bosi ati: 2 “Yehova ati, ‘Oyukendisighala omo muyi ono akendihola omo muyali, omo nzala, n’omo kihunzo.* Aliwe oyukendiyihira omo byala by’Abakaldayo akendibala, akendibalya engebe* yiwe n’eribyaho.’ 3 Yehova ati, ‘Oko kwenene omuyi ono akendihirwa omo byala by’abasuda b’omwami we Babiloni; kandi akendihambagho.’”
4 Neryo abakulu mubabwira omwami bati: “Kisi ita omulume oyu, kundi ebinywa biwe bikabuna abasuda abakiri omo muyi ono b’omutima,* bikabuna n’abandu bosi b’omutima. Kundi omulume oyu syanzire abandu aba bakabya omo buholo, aliwe anzire ibahikirwa n’obuhanya.” 5 Neryo omwami Zedekia mwabasubirya ati: “Yoyo! Mumukolere ngoko mwanzire, kundi omwami syangabaghania.”
6 Neryo mubahamba Yeremia, bamamuhira omo kyuna ky’amaghetse kya Malkiya, mughala w’omwami, ekyabya omo Kibugha ky’Abateya. Mubandaghalya Yeremia omo bikoba. Aliwe omo kyuna ekyo mwabya isimuli maghetse, ebyondo bisa byo byabyamo, neryo Yeremia mwatsuka eritobera omo byondo.
7 Ebedi-meleki Omuetiopia, omukonwe* w’omo nyumba y’omwami, mwowa ngoko babirihira Yeremia y’omo kyuna ky’amaghetse. Oko mughulu oyo, omwami abya inianikere oko Lukyo lwa Benyamini. 8 Neryo Ebedi-meleki mwalua eyiri enyumba y’omwami, amayabwira omwami ati: 9 “Mukama waghe kandi mwami waghe, ekyo abalume aba balyakolera omuminyereri Yeremia ni kibi! Mubakamughusa omo kyuna ky’amaghetse, neryo akendiholeramo busana n’enzala, kundi omo muyi simukiri omukati.”
10 Neryo omwami mwabwira Ebedi-meleki Omuetiopia ati: “Ughende n’abalume 30, muyalusaye omuminyereri Yeremia omo kyuna ky’amaghetse isyalyahola.” 11 Neryo Ebedi-meleki mwaghenda n’abalume abo, amingira omo nyumba y’omwami, omo mwanya owali eyikwa w’ekyumba ky’eribikamo ebindu by’obughuli. Mubimya aho ebisarangute n’ebihande-bihande by’esyongyimba esikwire, bamaboherabyo oko bikoba, neryo bamandaghaliryabyo Yeremia omo kyuna ky’amaghetse. 12 Neryo Ebedi-meleki Omuetiopia mwabwira Yeremia ati: “Kisi, uhire ebisarangute ebi n’ebihande-bihande ebi by’esyongyimba esikwire omo masakwa waghu, n’enyuma sy’aho ukendilabyako ebikoba.” Neryo Yeremia mwakola atya. 13 Enyuma sy’aho, mubakura Yeremia y’omo bikoba, bamamulusya omo kyuna ky’amaghetse. Yeremia mwasighala omo Kibugha ky’Abateya.
14 Omwami Zedekia mwabugha ati bayende omuminyereri Yeremia, bamutwale oko bwingiriro bw’akasatu obuli omo nyumba ya Yehova. Mubabya babimukolyaho, omwami mwabwira Yeremia ati: “Nanzire inakubulya omwatsi mulebe. Isiwanibisa ekindu kyosi-kyosi.” 15 Neryo Yeremia mwabwira Zedekia ati: “Namabikubwira, oko kwenene ighukaniita. Kandi namabikuha erihano, isiwendikwamaryo.” 16 Neryo omwami Zedekia mwalapira Yeremia omo bubiso-biso ati: “Oko kwenene-kwenene ngoko Yehova aliho, oyo watuha engebe eyi,* sinendikwita, kandi sinendikuhira omo byala by’abalume aba abakasonda erikwita.”
17 Neryo Yeremia mwabwira Zedekia ati: “Yehova, oMungu w’emilondo, oMungu we Israeli, ati: ‘Wamabiyihira omo byala by’abakulu* b’omo butabali bw’omwami we Babiloni, ighukendibalya engebe yaghu.* N’omuyi ono isyendihisibwa omo muliro, kandi iwe n’ab’omo nyumba yaghu imukendibala. 18 Aliwe wamatendiyihira omo byala by’abakulu b’omo butabali bw’omwami we Babiloni, omuyi ono iniakendihirwa omo byala by’Abakaldayo, kandi ibakendihisyagho omo muliro. Naghu, isibendikubalya.’”
19 Neryo omwami Zedekia mwabwira Yeremia ati: “Ngasagha Abayahudi abalyatswa n’eriyayighunga n’Abakaldayo. Namabihirwa omo byala byabo, ibangananikolera omo butsibu.” 20 Aliwe Yeremia mwabugha ati: “Siwendihirwa omo byala byabo. Kisi, ukwame ebinywa bya Yehova ebyo ngakubwira. Wamabikwamabyo, emyatsi iyikendikughendera ndeke, kandi isiwendihola.* 21 Aliwe wamatendiyihira omo byala byabo,* Yehova mwakanibisulira ati: 22 Abakali bosi abalyasighala omo nyumba y’omwami we Yuda bakenditwalwa eyiri abakulu b’omo butabali bw’omwami we Babiloni, kandi abakali abo banemubugha bati,
‘Abalume abo wabya ukayiketera* babirikuteba kandi babirikusinga.
Babirileka ekisando kyaghu ikyatobera omo byondo.
Ibwa babiriyisubulira.’
23 Abakali baghu bosi n’abana baghu bosi bakenditwalwa eyiri Abakaldayo. Abakaldayo sibendikubalya. Omwami we Babiloni akendikuhamba. N’omuyi ono akendihisibwa omo muliro busana naghu.”
24 Neryo Zedekia mwabwira Yeremia ati: “Isiwabwira omundu wosi-wosi oko myatsi eyi, ukasyahola. 25 N’abakulu bamabiminya ngoko mungakanaya naghu, neryo ibasyakubwira bati, ‘Kisi, utubwire ebyo ulyakanaya n’omwami, isiwatubisa kindu, kandi sitwendikwita. Omwami mwakakubwira atiki?’ 26 Litolere iwabasubirya uti, ‘Mungalemba-lemba omwami niti isyanisubaya omo nyumba ya Yehonatani, ngasyaholerayo.’”
27 Enyuma sy’aho, abakulu bosi mubayasungana na Yeremia, bamamubulya amabulyo. Mwabwirabo ebinywa byosi ebyo omwami amubwira ati akendibabwira. Mubatasyamubulya kindu, kundi sihabya oyo wowa ebyo Yeremia akanaya n’omwami. 28 Yeremia mwasighala omo Kibugha ky’Abateya erihika omughulu omuyi we Yerusalema ahambawa. Omuyi we Yerusalema mwahambwa Yeremia iniakine eyo.