Mucumaeri

7 Zina rakanaka riri nane* kupinda mafuta akanaka, njiku yokufa iri nane kupinda njiku yokubahwa. 2 Zviri nane kwenda kumuzi kwafiwa kupinda kwenda ku nyumba iri kuitihwa mabuso, ngokuti rufu ndiwona magumo o vandhu vese, wiya ari penye anodikana kurangarijisisa ngo pamusoro pazvo. 3 Zviri nane kucumba kuciripi kuseka, ngokuti kumeso ko mundhu wakacamwa kunomuita kuti ave no mwoyo wakanaka. 4 Ngokuti mwoyo yo vazivi iri pa nyumba pafiwa, asi mwoyo yo mapenji iri pa nyumba ino mudakaro.*

5 Zviri nane kuzwa mbhangiro yo muzivi kuciripi kuzwa ndumbo yo mapenji. 6 Kuseka ko benji kwakaezana no kupsa kunoita muzwa pasi po poto, izvi azvinavo zvazvinobesera. 7 Kubzinyirihwa kungaita kuti muzivi ave rethe, kudhyekehwa kungaita kuti mundhu aite zvakashata.

8 Kupera ko ciro kuri nane kupinda kutanga kwaco. Zviri nane kuva mundhu anosengerera kupinda kuva mundhu anojikuja. 9 Ucakasika kunyangajwa, ngokuti mwoyo yo mapenji ndiyona inokasika kunyangajwa.

10 Ucananga kudari: “Ngenyi mukuvo jokare jainga jiri nane kupinda ja wari?” Ngokuti asipi uzivi unokuita kuti uvhunjise kudaro.

11 Zvakanaka maningi mundhu ano uzivi paanowana utaka uri wese. Ngokuti uzivi unobesera vandhu vese vanorarama.* 12 Ngokuti uzivi unojivirira inga kujivirira kunoita mare, asi kubesera kunoita zivo nga uku: Uzivi unoita kuti vaya vanawo vaenderere mberi vecipona.

13 Vonai basa ra Mwari wo cokwadi, ndiyani angarungamisa zvaakapeamisa? 14 Pa njiku yakanaka, ivai mundhu wakanaka, asi pa njiku yo zvineso ceukijai kuti Mwari wo cokwadi ndiyena wakaita njiku yakanaka no njiku ino zvineso, kuti vandhu vatame kuva no cokwadi co zviro zvinozovaitikira kumbeji.

15 Mu upenyu wangu ucina zvaunobesera, ndakavona zviro zvese izvi, vandhu vakarurama vanofa mu ururami hwavo, vandhu vakashata vanopona mukuvo wakareba pikija veciita zviro zvakashata.

16 Ucanyanya kuva mundhu wakarurama, nee kukhombija kuti iwewe uri mundhu ano uzivi wakawanda. Ngenyi ungada kujiuraya? 17 Ucanyanya kuva mundhu wakashata nee kuva benji. Ungada kufa ngenyi mukuvo wako ucito wakwana? 18 Zviri nane kuzwira mbhangiro imwe ucikaphurusi mbhangiro imweni; ngokuti wiya anothya Mwari anozwira jese.

19 Uzivi unoita kuti muzivi ave ano simba maningi kupinda gumi ro vanarume vakavanga vari mu dhorobha. 20 Ngokuti akuna mundhu wakarurama pa nyika anoenderera mberi eciita zvakanaka acikashaishi.

21 Cimwenizve, ucapurukira masoko ese anoverekethwa ngo vandhu; ngokuti ungazwa mushandiri wako ecikutuka; 22 iwewe ngo mu mwoyo mwako, unonasa kuziva kamare kuti wakambotukavo vandhu vamweni kazinji.

23 Ndakapopora zviro zvese izvi ngo uzivi, ndonanga kudari: “ Ndinozova muzivi.” Asi ndakazvikonehwa. 24 Zviro zvese zvakaitika azvizwisisiki, izvona zvainga zvakakura zvojika. Apana angazvizwisisa. 25 Inini ndakaita kuti mwoyo wangu ude kuziva, kupopora, kupsanga uzivi no mathangwe anoitisa kuti zviro zviitike, kuti ndizwisise zviro zvakashata zvicina hwiru no urethe wo upenji. 26 Inini ndakazovona zviro izvi: Mwanakaji wakaezana no murau, wakashata* kupinda rufu ngokuti mwoyo wake wakaezana no juya, nyara jake jakaezana no magaragajero. Mundhu anodakajisa Mwari wo cokwadi aazobathwi ndiyena, asi mushaishi anozobathwa ndiyena.

27 Mujijisi anonanga kudari: “Vonai, inini ndakavona zviro izvi. Ndakapsakisisa ciro cimwe nga cimwe kuti ndigume pa mbhejiso, 28 asi zvandaienderera mberi ndecipsaka andizivi kuzviwana. Ndakawana mwanarume umwe pakati po vandhu vanokwana kuita 1.000, asi andizivi kuwana nee mwanakaji umwe hake. 29 Zviro zvandakazovona nga izvi basi: Mwari wo cokwadi wakaita vandhu vakarungama, asi ivona vakatevera mazano avo akawanda.”