Mucumaeri

6 Pano dambujiko rimweni randakavona panyika,* irona rinoitikira vandhu vese: 2 Mwari wo cokwadi anopa mundhu upfumi, zviro zvo kunyama no rukujo, zvoita kuti atame kucotehwa ngo zviro zvaanoda. Asi Mwari wo cokwadi aamuiti kuti iyena abuse zviro zvaanazvo, asi anoita kuti mundhu umweni abuse zvirozvo. Izvi azvina zvazvinobesera, ibonezi basi. 3 Kudari mwanarume akabara zana* ro vana, opona makore akawanda oguma pa ukarahwa, asi pikija zvakadaro iyena otama kubusa zviro zvake zvakanaka iyena acito afa, ndingananga kuti mwana mudoko wakabahwa akafa arinane kupinda mwanarume uwu. 4 Ngokuti iyena wakaviira biresi, woenda mucidima, cidima cofukija zina rake. 5 Pikija aazivi kumbovona zuva nee kuziva ciri cese, iyena ari pamugariro* uri nane kupinda mwanarume wiya. 6 Zvinobesenyi mundhu akararama makore anokwana zviuru zviviri,* acizivi kumbova no mudakaro? Vese avaendi mu ndau yondhoyo here?

7 Mabasa ese okuvangisira anoitwa ngo mundhu, anomaita kuti awane zvokuha. Asi cido cake cokuda zvokuha narini acizoperi. 8 Kuitisa kudini muzivi ari nane kupinda benji? Zvinobesenyi murombo kuziva zvokuita muupenyu? 9 Zviri nane kukwanihwa ngo zviro zvinovoniwa ngo majiso, kupinda kuda zviro zvaucikakwanisi kuva nazvo. Izvi azvinavo zvazvinobesa, ikugogomera mbhepo.

10 Ciro cese ciripo cakapera kare kupuwa zina, mugariro o mundhu waakuzivika kare, iyena aadikani kuhwisana no mundhu ano simba rakakura maningi kupinda iyena. 11 Panoverekethwa masoko akawanda maningi, panovavo no masoko akawanda acikabeseri. Mundhu angabesereka kudini ngo masoko akadaro? 12 Ndiyani anoziva zviro zviri nane ku mundhu kuti aite mukati mo njiku jake shoma jicikabeseri jinopinda inga munvuriri? Ndiyani angazozivisa mundhu zvinozoitika panyika* pasure po kufa kwake?