IMIBUZO EBUZWA NGABASAKHULAYO
Ngingenzani Ngingehlelwa Zinhlupho?
Inhlupho zingehlela loba ngubani, kugoqela labasakhulayo. Phela iBhayibhili lithi: ‘Abalejubane abahlali benqoba emncintiswaneni, labalamandla abahlali benqoba empini. Bonke bafikelwa yisikhathi lezehlakalo ezibajuma belibele.’ (UmTshumayeli 9:11) Manje kuyini okuncede abanye abasakhulayo abake behlelwa zinhlupho? Ake sixoxe ngababili.
UREBEKAH
Abazali bami badivosa ngileminyaka engu-14.
Ngangingakholwa ukuthi abazali bami basebedivosa sibili. Ngangizibuza ukuthi yindaba ubaba esemtshiya umama yena emthanda kangaka, ngizibuza lokuthi mina wayesengitshiyelani. Ngangizitshela ukuthi engxenye ubaba ufuna ukutshaywa ngumoya nje okwesikhatshana.
Kwakunginzimela ukuthi ngikhulume lomunye umuntu ngokwakusenzakala njalo ngangingafuni lokucabanga ngakho. Ngangingakunanzeleli ukuthi ngasengihlala ngizondile futhi ngangikhathazeka kakhulu. Ngasengisehluleka lokulala.
Ngathi sengileminyaka engu-19, umama wabulawa yi-cancer. Mina lomama sasingamathe lolimi.
Ukwehlukana kwabazali bami kwangizwisa ubuhlungu sibili, kodwa ukufa kukamama khona kwangenza ngabona angani umhlaba ungihlanekele. Lakhathesi lokhe ngisizwa ubuhlungu. Ebusuku angibuquthi futhi ngihlala ngikhathazekile.
Lanxa kunjalo kukhona okungincedayo. Ngokwesibonelo iZaga 18:1 zithi akumelanga sizehlukanise labanye, yikho lami ngiyazama ukuthi ngingakwenzi lokho.
Kanti njalo mina nginguFakazi kaJehova. Ngakho okunye okungincedayo yikuzama ukubala amabhuku esiwaphiwa yinhlanganiso yethu. Elinye ibhuku elangincedayo ngesikhathi abazali bami bedivosa ngelithi Intsha Iyabuza—Izimpendulo Ezisebenzayo. Ngikhumbula ngibala esinye isihloko kuMqulu 2 esithi “Ngingajabula Yini Emkhayeni Onomzali Ongayedwa?”
UMathewu 6:25-34 uyanginceda kakhulu nxa ngikhathazekile. Kuvesi 27, uJesu wabuza wathi: “Ngubani phakathi kwenu ongangezelela umzuzu owodwa nje empilweni yakhe ngokukhathazeka?”
Inhlupho zingehlela loba ngubani, kodwa okwenziwa ngumama kwangifundisa ukuthi okuqakathekileyo yikuthi senzani nxa sesehlelwe yibunzima. Yena wakubona okukhulu sibili, ukudivosa lobaba kanye lokuba lomkhuhlane ongelaphekiyo. Lanxa kunjalo kazange alahle ithemba futhi wahlala elokholo oluqinileyo kuNkulunkulu kwaze kwaba sekucineni. Angisoze ngafa ngazikhohlwa izinto angifundisa zona ngoJehova.
Cabanga ngalokhu: Ukubala iBhayibhili lamabhuku asekelwe kulo kuzakunceda njani nxa ungehlelwa zinhlupho?—IHubo 94:19.
UCORDELL
Ngathi ngileminyaka engu-17, ubaba wafa ngimkhangele. Ukufa kwakhe kwakubuhlungu kakhulu kimi. Kwakungathi ngiyinhlanzi etshelwe ngamanzi.
Ngangingakholwa ukuthi wayengasekho sibili, kwakungani ayisuye abasebemgoqele ngengubo. Ngangizitshela ukuthi uzilalele nje, uzavuka kusasa. Ngazizwa ngilahlekile ngingakwazi lokuthi ngibambe ngaphi.
Ngekhaya singoFakazi bakaJehova, yikho ibandla lasincedisa kakhulu ngesikhathi sitshiywe ngubaba. Abafowethu labodadewethu babesiba leqiniso lokuthi siyakuthola ukudla, babuya bazohlala lathi njalo babehlala bekulungele ukusincedisa. Lokhu abakwenzanga okwesikhatshana nje kuphela, kodwa babesisekela lanxa kwasekudlule isikhathi eside silahlekelwe. Abakwenzayo kwangitshengisa ukuthi oFakazi bakaJehova ngamaKhristu eqiniso sibili.—UJohane 13:35.
U-2 Khorinte 4:17, 18 ungincede kakhulu. Ithi: “Ukuhlupheka ngokwesikhatshana futhi akutsho lutho kodwa kusenza sithole inkazimulo enkulu okumangalisayo njalo ehlala kuze kube nini lanini. Ngakho amehlo ethu siwathi nhlo ezintweni esingaziboniyo hatshi kwesizibonayo ngoba izinto esizibonayo ngezesikhatshana kodwa esingaziboniyo zihlala kuze kube nini lanini.”
Uvesi 18 uyangiqinisa kakhulu. Ukuhlupheka kukababa kwaba ngokwesikhatshana, kodwa lokho uNkulunkulu athembisa ukusenzela khona kuzahlala kuze kube nini lanini. Ubaba wathi esetshonile ngacabangisisa ngendlela engangiphila ngayo kanye lalokho engangifuna ukukwenza empilweni.
Cabanga ngalokhu: Ukwehlelwa yibunzima kungakunceda njani ukuthi ucabangisise ngalokho ongakwenza empilweni?—1 UJohane 2:17.