Ukumumuza Izitho Zensitha Zomunye Umuntu Yikuya Emacansini Yini?

Umbiko we-U.S. Centers for Disease Control and Prevention uthi phose ingxenye yalabo abakhuluma labo abaphakathi kweminyaka engu-15 kusiya kwengu-19 bake bamumuza izitho zensitha zomunye umuntu. USharlene Azam umlobi webhuku elithi Oral Sex Is the New Goodnight Kiss uthi: “Nxa ungakhuluma labasakhulayo [mayelana lokumumuza izitho zensitha zomunye umuntu] bayakutshela ukuthi akulanto embi ngakho. Abakuboni njengokuya emacansini.”

• Wena ucabangani?

• Liyini iqiniso ngendaba le?

• Kungani kuqakathekile?

Wena ucabangani?

Phendula imibuzo elandelayo ngo-ye kumbe hatshi.

1. Inkazana ingazithwala yini nxa ingamumuza izitho zensitha zomunye umuntu?

   1. Ye

   2. Hatshi

2. Ukumumuza izitho zensitha zomunye umuntu kungabangela imikhuhlane yini?

   1. Ye

   2. Hatshi

3. Ukumumuza izitho zensitha zomunye umuntu yikuya emacansini yini?

   1. Ye

   2. Hatshi

Liyini iqiniso ngendaba le?

Qathanisa izimpendulo zakho lalezi ezilandelayo.

1. Inkazana ingazithwala yini nxa ingamumuza izitho zensitha zomunye umuntu?

   Impendulo: Hatshi. Yikho okwenza abanengi baziyenge besithi ukumumuza izitho zensitha zomunye umuntu akusiyongozi.

2. Ukumumuza izitho zensitha zomunye umuntu kungabangela imikhuhlane yini?

   Impendulo: Ye. Umuntu omumuza izitho zensitha zomunye umuntu angaba lehepatitis (A kumbe B), amaqhubu esithweni sensitha, igonorrhea, iherpes, i-HIV, lesyphilis.

3. Ukumumuza izitho zensitha zomunye umuntu yikuya emacansini yini?

   Impendulo: Ye. Ukuya emacansini yiloba yini egoqela izitho zensitha zomunye umuntu, kungaba yikuhlangana kwendoda lomfazi, ukumumuza izitho zensitha zomunye umuntu, ukuya emacansini kusetshenziswa isitho sokuya ngaphandle kumbe ukutshaya omunye umuntu ibhonyaponya.

Kungani kuqakathekile?

Cabanga ngamavesi ahambisana lendaba yokumumuza izitho zensitha zomunye umuntu.

IBhayibhili lithi: ‘Intando kaNkulunkulu yikuthi lixwaye ubufebe.’—1 KwabaseThesalonika 4:3.

Ibala elihunyutshwe ngokuthi “ubufebe” likhuluma ngayo yonke imihlobo yokuya emacansini lomuntu ongatshadanga laye okugoqela lokumumuza izitho zensitha zomunye umuntu, ukuya emacansini kusetshenziswa isitho sokuya ngaphandle kumbe ukutshaya omunye umuntu ibhonyaponya. Umuntu ofebayo angaba lesiphetho esibi kakhulu futhi okubi ukwedlula konke yikuthi angaphambanisa ubungane bakhe loJehova.—1 UPhetro 3:12.

IBhayibhili lithi: “Loba ngubani oqhubeka efeba wona umzimba wakhe.”—1 KwabaseKhorinte 6:18.

Ukumumuza izitho zensitha zomunye umuntu kungalimaza umuntu emzimbeni kanye lasekukhonzeni. Kungenza lokuthi umuntu azwe ubuhlungu enhliziyweni. Ibhuku elithi Talking Sex With Your Kids lithi: “Ukuzizwa usetshenzisiwe, uzisola futhi ubuthakathaka akupheleli endabeni yokuya emacansini usebenzisa isitho esiqondileyo kuphela. Loba yibuphi ubuhlungu esibuzwayo singaphambanisa siye emacansini singahlosanga, bungabakhona lalapho sisenza loba yisiphi isenzo sokuya emacansini. Ukuya emacansini akutshintshi, kuzahlala kuyikuya emacansini.”

IBhayibhili lithi: “Mina Jehova nginguNkulunkulu wakho, lowo okufundisayo ukuze uncedakale.”—U-Isaya 48:17.

Uyakukholwa yini ukuthi imithetho kaNkulunkulu ephathelane lokuya emacansini inceda wena? Kumbe ubona angani ikuvimbela okuthile? Okungakunceda ukuthi uphendule imibuzo le, yikucabanga ngomgwaqo olezimota ezinengi futhi olamabhakane abhalwe isiqubu abatshayeli okumele bahambe ngaso, futhi ulamarobhothi lamabhakane atshengisa ukuthi umtshayeli kame. Amabhakane lawo uzawabona njengakuvimbela okuthile yini kumbe uzawabona ekuvikela? Kungenzakalani nxa wena labanye abatshayeli lingayekela ukuwalandela?

Kuyafanana lezimiso zikaNkulunkulu. Nxa ungayekela ukuzilandela uzavuna lokho okuhlanyelayo. (KwabaseGalathiya 6:7) Ibhuku elithi Sex Smart lithi: “Nxa ungayekela ukulandela lokho okukholwayo lokuqakathekisayo, wenze izinto okwaziyo ukuthi aziqondanga, uzacina ungasazihloniphi.” Kodwa nxa ungalandela izimiso zikaNkulunkulu, uzabe utshengisa ukuthi uyazihlonipha. Okuhle kakhulu yikuthi uzakuba lomzwangedwa ohlanzekileyo.—1 UPhetro 3:16.