Ncedisa Abanye Bamazi UJehova

1. Uzwa njani nxa ubona umuntu ofunda iBhayibhili ethuthuka?

UZWA njani nxa umuntu ofunda iBhayibhili eqalisa ukungena imihlangano, lokuphendula lokuxoxela abanye lokho akufundayo? Uzwa njani nxa umbona ethuthuka aze azinikele kuJehova abhabhathizwe? Akulambuzo ukuthi lokho kuyathokozisa! Ukubona umuntu ethuthuka ngaleyondlela kwenza simdumise uJehova, ngoba siyabe sikwazi ukuthi nguye omncedisileyo.—1 Khor. 3:​5-9; 3 Joh. 3, 4.

2. Kuyini uJehova akufunayo? (U-1 Thimothi 2:​3, 4)

² UJehova laye kuyamthokozisa ukubona abantu abafunda iBhayibhili bethuthuka ngoba yena vele akufunayo yikuthi “abantu bemihlobo yonke basindiswe njalo bathole ulwazi oluqondileyo lweqiniso.” (Bala u-1 Thimothi 2:​3, 4.) UJehova ufuna ukuthi abantu bamazi kuhle futhi bakwazi lalokho azasenzela khona. (Jer. 9:24) Lokhu kuhle kusitshengise ukuthi kumele bathole ulwazi oluqondileyo. Kodwa ukuba lolwazi oluqondileyo akutsho ukuphongukwazi nje ngoNkulunkulu kuphelele khonapho. Esinye isikhwicamfundo seBhayibhili sathi “lololwazi kuyabe kumele lumtshintshe umuntu.” Yikho-ke nxa umuntu esemazi uJehova kuyabe kumele atshintshe aphilele ukwenza intando yakhe. Angenza njalo usengaba lethemba lokuthola ukuphila okungapheliyo.—Joh. 17:3.

3. Sizaxoxa ngani esihlokweni lesi?

³ UJehova usiphe umsebenzi wokuncedisa abanye ukuthi bamazi. Esihlokweni lesi sizaphendula imibuzo elandelayo: Kungani kumele labo esifunda labo iBhayibhili bamazi kuhle uJehova? Singabancedisa njani ukuthi bamazi? Singabancedisa njani ukuthi bakusebenzise lokho asebekwazi ngoJehova?

BANCEDISE BAMAZI KUHLE UJEHOVA

4. Nxa sifunda lomuntu iBhayibhili siyabe sihloseni? (UMakho 12:30.)

⁴ UJesu wathi kumele sithande uJehova ngenhliziyo yonke, langomphefumulo wonke, langengqondo yonke langamandla wonke. (Bala uMakho 12:30.) Okuzakwenza umuntu esifunda laye iBhayibhili amthande uJehova yikumazi kuhle. Kumele umuntu azinikele kuJehova ngoba emthanda, kungabi yikuthi ufuna ukuthabisa abantu kumbe ukuba lilunga lenhlanganiso. Akumelanga akwenzele nje ukuthi kulento ayifundileyo ayithandileyo. Yikho-ke nxa sifunda lomuntu iBhayibhili inhloso yethu ngeyokumncedisa ukuthi amazi uJehova futhi amthande.

5. Ukuthanda uJehova kuzamnceda njani umuntu ofunda iBhayibhili?

⁵ Kulula ukulalela umuntu omthandayo. Yikho nxa umuntu ofunda laye iBhayibhili angamazi futhi amthande uJehova kuzakubalula ukuthi amlalele. UJesu wathi: “Mina ngenza lokho uBaba angitshele khona ukuze umhlaba wazi ukuthi ngiyamthanda uBaba.” (Joh. 14:31) Kusegcekeni-ke ukuthi umuntu angamthanda uJehova, uzamlalela ahlale eqotho kuye.—1 Joh. 5:3.

6. Ukumazi ngcono uJehova kuzamnceda njani umuntu ofunda iBhayibhili? Nika isibonelo.

⁶ Nxa umuntu ofunda iBhayibhili angamazi kuhle uJehova uzakwenelisa ukwenza izinqumo ezinhle. Ngokwesibonelo, umuntu kafundi imota ngokuphongubala nje ebhukwini abesesithi usengumtshayeli. Kuyabe kumele angene emoteni kube lomuntu omtshengisayo ukuthi kutshayelwa njani, laye abesesenza lokho akutshengisiweyo. Angabe elokhe esenza njalo, uyabe elokhe eyifunda imota acine eseyingcitshi. Kunjalo langomuntu ofunda iBhayibhili, nxa efuna ukubamazi ngcono uJehova akwenelanga ukuthi aphelele ekubaleni kuphela. Kodwa kumele azibonele ngawakhe ukuthi kunceda ngani ukulandela lokho akutshelwa nguJehova. Nxa umuntu lo esemazi ngcono uJehova, ebona lendlela amncedisa ngayo, uzazimisela ukuhlala esenza izinto ezimthokozisayo.

7. Ukwazi uJehova kwamnceda njani uJosefa?

⁷ Ukwazi uJehova kwanceda uJosefa ukuthi angavumi ukuhugwa ngumkaPhothifa. Kumele ukuthi wakhula esizwa ngo-Adamu lo-Eva lango-Abrahama loSara. (Gen. 2:24; 20:​3, 6) Engxenye lokho ayekuzwa kwamenza wazwisisa ukuthi uJehova uwubona njani umtshado lokuthi akumthokozisi ukuthi umuntu alale lomuntu angatshadanga laye. UJosefa wayemazi kuhle uJehova okokuthi lanxa umkaPhothifa wazama esazama ukumhuga yena wathi ngeke enze into enjalo. Waze wathi kuye: “Ngingayenzelani into embi kangaka, ngonele uNkulunkulu?” (Gen. 39:​7-9) UJosefa wayekwazi ukwehlukanisa okuhle lokubi, okuthokozisa uJehova lokungamthokozisiyo kwasekumnceda ukuthi enze okuqondileyo. Nxa singancedisa esifunda labo iBhayibhili ukuthi bamazi kuhle uJehova bazakwenelisa ukwenza okumthokozisayo.

MNCEDISE AMAZI UJEHOVA

8. Kuyini okusebhukwini elithi Ungathokoza okungasinceda nxa sifunda lomuntu iBhayibhili?

⁸ Singamncedisa njani umuntu esifunda laye iBhayibhili ukuthi amazi ngcono uJehova? Okunye esingakwenza yikubuza imibuzo njengoJehova. UJehova wake wancedisa uJobe ngokumbuza imibuzo etshiyeneyo. Wambuza imibuzo engedlula 50! (Jobe. 38:1–41:34) Lathi kuhle ukuthi sisebenzise imibuzo nxa sifundisa umuntu. Ibhuku elithi Ungathokoza Kuze Kube Nini Lanini! lilemibuzo enganceda esifunda laye amazi ngcono uJehova. (Khangela ibhokisi elithi “Imibuzo Esingayibuza Esifunda Laye.”) Kuqakathekile sibili ukuthi siyisebenzise kuhle imibuzo leyo.

9-10. (a) Kuyini okunganceda umuntu ofunda iBhayibhili ukuthi afunde okunengi nxa ebala iBhayibhili? (UJakhobe 5:11) (b) Ungamncedisa njani ofunda laye iBhayibhili ukuthi ananzelele okuthokozisa uJehova lokungamthokozisiyo endabeni ayabe eyibala? Nika isibonelo.

⁹ Sijayele ukuthi nxa siqalisa ukufunda lomuntu iBhayibhili sihle simkhuthaze ukuthi azame ukubala iBhayibhili nsuku zonke.a Manje singamncedisa njani ukuthi afunde okunengi nxa ebala iBhayibhili? Singamcebisa ukuthi azibuze ukuthi vele uJehova wakufakelani khonokho eBhayibhilini lokuthi kumfundisani ngaye. Lokho yikho okwenziwa ngumfundi uJakhobe. Wathi ekhuluma ngendaba kaJobe waveza ukuthi ayimfundisanga nje ukuthi uJobe wayeqinisela kodwa wasala efunde lokuthi uJehova nguNkulunkulu olozwelo lesihawu.—Bala uJakhobe 5:11.

¹⁰ Kumele sincedise esifunda labo ukuthi nxa bebala indaba eziseBhayibhilini badinge ukuthi zibafundisani ngoJehova, bazame lokuzwisisa ukuthi yiziphi izinto ezithokozisa uJehova lezingamthokozisiyo. Ake sithi umuntu ofunda laye ubala iBhayibhili esebenzisa itshathi ethi “Qalisa Ukubala IBhayibhili Nsuku Zonke” esebhukwini elithi Ungathokoza Kuze Kube Nini Lanini! Ake sithi usekhethe ukubala indaba yokuphoselwa kukaDanyeli emgodini wezilwane. Ubungamncedisa njani? Ubungamkhuthaza ukuthi azibuze imibuzo enjengale: ‘Kungani uJehova wavikela uDanyeli? Lokhu kuveza ukuthi uJehova uthokoziswa ngabantu abanjani?’ (Dan. 6:​10, 22) Kwahamba njani ngamadoda ayefuna ukubulalisa uDanyeli? Ngabantu abanjani abangamthokozisiyo uJehova?’ (Dan. 6:​4, 5, 24) Ungamkhuthaza lokuthi adinge lokunye angakufunda ngoJehova endabeni leyo.—Dan. 6:​26, 27.

11. Singamncedisa njani esifunda laye ananzelele ukuthi akufundayo kuvela kuJehova?

¹¹ Kumnandi ukubona umuntu esifunda laye ethokoziswa yilokho akufundayo futhi kukhanya ukuthi kuyamnceda. Loba kunjalo, kuqakathekile ukuthi simncedise ananzelele ukuthi uncediswa nguJehova ngoba vele nguye osifundisayo. (Isaya. 30:​20, 21) Esifunda laye angasibonga ngasekufundile kumbe asincome kakhulu ngendlela esimfundisa ngayo. Lanxa kungakubi ukuthi enze njalo kumele sibe leqiniso lokuthi udumo lonke silusa kuJehova.

MFUNDISE UKUSEBENZISA ASEKUFUNDILE

12-13. Kuyini okunganceda umuntu nxa kuyikuthi kazwisisi eyinye indaba eseBhayibhilini? (Khangela lomfanekiso.)

¹² Ulwazi esilalo lungasinceda kuphela nxa silusebenzisa. Manje ungamnceda njani ofunda laye ukuthi asebenzise lokho asekufundile? Okokuqala ongakwenza yikumfundisa ukuthi nxa ebala indaba angayizwisisiyo eBhayibhilini, aqale azikhumbuze lokho akwaziyo ngoJehova. Ngokwesibonelo usengabala ngezinye indaba lapho uJehova abhubhisa khona abanye abantu waxolela abanye abesezibuza ukuthi yindaba uJehova wenza njalo. Manje ungamncedisa njani ukuthi azwisise indaba ezinjalo?

¹³ Mkhuthaze ukuthi azikhumbuze lokho akwaziyo ngoJehova. Nansi imibuzo angazibuza yona: UJehova ubathanda okunganani abantu? (2 Phet. 3:9) Kuyini akwenzileyo ukuze asikhulule esonweni? (Efe. 2:​4, 5) UJehova uyabajezisa yini abantu abangonanga lutho? Uyaphongumekela yini umuntu okumele ajeziswe? (Eks. 34:​6, 7) Ezinye indaba eziseBhayibhilini azilangcazelo yokuthi kungani uJehova wenza into ethile. Lanxa kunjalo, akumelanga sizihluphe ngezinto esingazitshelwanga ngoba siyamazi uNkulunkulu wethu njalo siyakwazi ukuthi uhlala esenza okulungileyo.

14. Singamncedisa njani umuntu esifunda laye iBhayibhili ukuthi azwanane labanye ebandleni?

¹⁴ Nansi esinye isibonelo lapho ongancedisa khona ofunda laye iBhayibhili ukuthi asebenzise ulwazi aselalo. Ake sithi omunye ebandleni wenze into engamphathi kuhle. Ungamncedisa njani? Kungaba kuhle ukumkhumbuza ukuthi uJehova ubabona njani abantu abasebandleni. Eminye imibuzo angacabanga ngayo yileyi: UJehova utshengise njani ukuthi uyabathanda abantu bakhe? (Joh. 3:16) UJehova uzwa njani nxa ebona abantu bakhe behlezi ngokuthula futhi bezwanana? (Hubo. 133:1) UJehova uzwa njani nxa esibona sizama ngamandla wonke ukuhlala simanyene? (2 Khor. 13:11) Ncedisa umuntu ofunda laye iBhayibhili abone ukuthi uJehova uyathokoza kakhulu nxa singakhangela okuhle okwenziwa ngabafowethu labodadewethu kulokulandelela amaphutha abo.

15-16. (a) Umuntu ofunda iBhayibhili angamlingisela njani uJesu nxa kumele enze izinqumo? (UJohane 8:29) (b) UMarianne wamncedisa njani umuntu afunda laye ukuthi akhethe kuhle? (Khangela lomfanekiso.)

¹⁵ Okwesithathu ongakwenza yikuncedisa umuntu ofunda laye iBhayibhili ukuthi asebenzise ulwazi aselalo ngoJehova nxa esenza izinqumo. Mhlawumbe lokhu ungakwenza ngokumtshengisa isifundo 35 ebhukwini elithi Ungathokoza Kuze Kube Nini Lanini! Isihloko sakhona sithi “Kuyini Okuzakuncenda Ukuthi Ukhethe Kuhle?” Kodwa ake sithi usethandazile kuJehova, wachwayisisa kodwa lokhe engakwazi ukuthi enzeni. Engxenye angabe ezitholile sibili izimiso ezikhuluma ngendaba yakhona kodwa kakwazi ukuthi yisiphi okumele asisebenzise. Manje ungamncedisa njani? Mhlawumbe ungamkhuthaza ukuthi alingisele uJesu. Kanje uJesu wayesenzani? Wathi: “Ngihlala ngisenza izinto ezimthokozisayo [uBaba].” (Bala uJohane 8:29.) Cela umuntu ofunda laye ukuthi azibuze umbuzo lo. ‘Nxa ngicabangisisa ngezimiso esengizitholile lalokho engikwaziyo ngoJehova, kuyini okumele ngikwenze lapha okuzamthokozisa?’ Mkhumbuze ukuthi loba yisiphi isinqumo azasenza siyabe siqondile nxa kuyikuthi sithokozisa uJehova.

¹⁶ Omunye umama ohlala eChile owayefunda iBhayibhili kwakumele akhethe ukuthi uzakwenzani. Wathola umsebenzi olemali ezwayo kodwa owawungasoze umnike isikhathi sokuya emihlanganweni yebandla. Ngapha abangakibo babesithi angayekela umsebenzi lowo uzawuthola ngaphi omunye. Udadewethu okuthiwa nguMarianne owayefundisa umama lo iBhayibhili uthi: “Ngamkhuthaza ukuthi acabangisise ngokuthi uJehova wayezezwa njani ngalokho ayezakukhetha. Ngamcela lokuthi athandaze ngendaba leyo abesenanzelela lokuthi uJehova uwuphendula njani umthandazo wakhe. Kasahambanga emsebenzini lowo futhi kungakayi ngaphi wathola omunye owawumnika isikhathi sokungena imihlangano yebandla.” Unanzelele yini ukuthi uMarianne kazange amtshele ukuthi enzeni? Akwenzayo nje yikumnceda acabangisise ngalokho ayesekwazi ngoJehova lokuthi asebenzise lololwazi. Lokho kwanceda umama lo ukuthi amthembe kakhulu uJehova njalo wambonga kakhulu uMarianne ngendlela ayemncedise ngayo. UMarianne uqhubeka esithi: “Umama lo wazibonela sibili ukuthi uJehova uzahlala esinakekela nxa singaqakathekisa ukumkhonza.”

UJEHOVA UZAQHUBEKA EKUBUSISA

17. Kuyini okumele labo esifunda labo iBhayibhili bakuqakathekise kakhulu?

¹⁷ Abantu esifunda labo iBhayibhili basala befunde izinto ezinengi. Ngokwesibonelo basala besazi iqiniso ngabantu abafileyo, befundile lokuthi kungani uJesu wasifela njalo sebezwisisa lokho esizakwenzelwa nguMbuso kaNkulunkulu. Baphinda bafunde lokuthi izinto zihamba njani enhlanganisweni kaJehova. Babakwazi ngemihlangano yethu, lomsebenzi wabadala ebandleni kanye lalokho okwenziwa liQula Elikhokhelayo. Khona kuhle sibili ukuthi babezazi izinto lezi kodwa okuqakatheke kakhulu yikuthi bamazi kuhle uJehova.

18. Kunceda ngani ukwazi uJehova?

¹⁸ UJehova usibusise kakhulu ngokusipha umsebenzi wokufundisa abanye ngaye. Umuntu osefunde ngoJehova wamazi kuhle uthola izibusiso ezinengi. Ngokwesibonelo, bonke abamazi kuhle uJehova bazathola ukuphila okungapheliyo ngesikhathi esizayo. (1 Joh. 5:20) Ngitsho lakhathesi umuntu omazi kuhle uNkulunkulu futhi omkhonzayo uyathokoza empilweni. (Hubo. 25:​12-15) Esinye isibusiso esikhulu asitholayo yikwaziwa nguJehova. (1 Khor. 8:3) Akucabange ukuthi kuhle kangakanani ukuba ngumngane kaSomandla. Kusegcekeni ukuthi ukwazi uNkulunkulu yinto eqakatheke kakhulu!