Ungami Ukufunda NgoJehova

1. Sizwa njani nxa sicabanga ngoMdali wethu uJehova?

UYAKE uzibuze yini ukuthi uJehova ulolwazi olunganani? Inhlakanipho yakhe ke, uyake ucabange ngayo yini? Uzwa njani nxa ucabanga ngezinto ezimangalisayo uJehova azenzileyo? Nxa sicabanga ngoMdali wethu sisala sibambe owangaphansi. Sivumelana laye sibili umphostoli uPhawuli owathi: “Inotho kaNkulunkulu lokuhlakanipha kwakhe kanye lolwazi lwakhe kujule kakhulu! Izahlulelo zakhe ngeke uzihlole uzizwisise ngokugcweleyo njalo ngeke sizazi zonke izindlela zakhe.”—Rom. 11:​33, 34.

2. Kungani sisithi singabamazi uJehova?

² Lanxa singeke sikwazi konke ngoJehova siyenelisa ukwazi ukuthi unguNkulunkulu onjani. Inkosi uDavida yatshela umntanayo uSolomoni yathi: “Mazi uNkulunkulu kayihlo njalo umkhonze ngenhliziyo yonke. Nxa ungamdinga uzamthola.” (1 Imilan. 28:9) Ngokuya kwesikhathi lomphostoli uJohane wakhumbuza amaKhristu ukuthi ‘ayephiwe ukuqedisisa ukuze amazi oqinisileyo.’ (1 Joh. 5:20) LoJesu laye watsho ukuthi abantu bangenelisa ukumazi uJehova nxa yena ‘angamveza kubo.’—Mat. 11:27.

3. Sizaxoxa ngani esihlokweni lesi?

³ Lanxa kungabe kukunengi osukufundile ngoJehova, okukhona yikuthi awungeke uthi sufike ekucineni. Kuzamele uqhubeke usibamazi. (Joh. 17:3.) Isihloko lesi sizasinceda ukuthi siqhubeke sifunda okunengi ngoJehova ukuze simthande kakhulu futhi simthokozise kungelani lokuthi sesileminyaka emingaki simkhonza. Sizaphendula imibuzo elandelayo. Kutshoni ukwazi uJehova? Kungani kumele siqhubeke sisibamazi ngcono? Singenzani ukuze simazi?

KUTSHONI UKWAZI UJEHOVA?

4. Yiwuphi umehluko okhona phakathi kokwazi ngoNkulunkulu lokumazi sibisibili? Chasisa

⁴ UJehova wathi ekhuluma ngabantu bakhe ababezakhululwa eBhabhiloni wathi: “Ngizakwenza inhliziyo zabo zifise ukungazi, bazi ukuthi mina nginguJehova.” (Jer. 24:7) Kungani uJehova wathi abantu laba babezamazi bona babevele bengamaJuda futhi besazi okunengi ngaye? Njengoba abantu laba besebehlale eBhabhiloni okweminyaka leminyaka kwakumele bazihlolisise bazibuze ukuthi babelokhe besamthanda ngenhliziyo yonke yini uJehova. Elinye ibhuku elichasisa amavesi aseBhayibhilini lithi: “Kulomehluko omkhulu phakathi kokwazi ngoNkulunkulu lokumazi yena ngokwakhe njengoba nje kulomehluko phakathi kokubala ngothando lokuba semathandweni.” Kusegcekeni-ke ukuthi akwenelanga ukuba lolwazi nje ngoNkulunkulu kodwa kumele simazi ukuthi unguNkulunkulu onjani sibisibili.

5. Kuyini okutshengisa ukuthi inkosi uJosiya yayimazi uJehova?

⁵ Nxa sesimazi uJehova siyabe sesikwazi lokho okumthokozisayo lalokho okumdanisayo. Asixoxeni ngenkosi uJosiya. IBhayibhili lithi: “Ngomnyaka wesi-8 wokubusa kwakhe, esesengumfana nje, waqalisa ukudinga uNkulunkulu kaDavida ukhokho wakhe.” (2 Imilan. 34:3) UJosiya wayengaphongubala nje iLizwi likaNkulunkulu aphelele khonapho kodwa wayesuka lapho ayekwenza lokho elikutshoyo. Lokhu yikho okwenza uJehova watshela uJeremiya ukuthi uJosiya ‘wayesahlulela kuhle futhi esenza okulungileyo, njalo ebalwela abantu abacindezelwayo labangabayanga.’ UJehova waqhubeka wathi khonokho okwakwenziwe nguJosiya yikho okwakutshengisa ukuthi uyamazi.—Jer. 22:​15, 16.

6. Ukwazi uJehova kuzasinceda njani? (IHubo 9:10)

⁶ Bala iHubo 9:10. Nxa sesimazi kuhle uJehova kuzabalula ukuthi simthembe. Lokhu yikho kanye okwenziwa ngumphostoli uPhawuli. Ngesikhathi ebotshiwe njalo esezabulawa wabhala wathi: “Angilanhloni ngoba ngiyamazi lowo engikholwa kuye.” (2 Thim. 1:12) Okwenza uPhawuli wamthemba kangaka uJehova yikuthi wayemazi njalo ekhumbula indlela ezitshiyeneyo uJehova ayemncedise ngazo. Wayekwazi ukuthi uJehova wayengasoze amkhohlwe loba sekutheni lokuthi wayezamvusa.

KUNGANI KUMELE SIQHUBEKE SISIBAMAZI NGCONO UJEHOVA?

7. Kuyini okungenzakala nxa sesilesikhathi eside sikhonza?

⁷ Kungenzakala ukuthi ngesikhathi uqalisa ukufunda iBhayibhili wawukukhuthalele ukubala ngoba wawufuna ukufunda okunengi ngoJehova. Kodwa nxa iminyaka ilokhe itshova sokungaba lula ukuthi ungasazihluphi kangako ngokufunda okunengi ngaye. Nxa sibala iBhayibhili sisodwa kumbe silalele emihlanganweni yethu kungabalula ukuzibuza ukuthi lokhu esikufundayo kusinceda njani thina lokuthi kubanceda njani abanye. Khona akulanto embi ngalokho ngoba vele iBhayibhili lisikhuthaza ukuthi senze njalo. (2 Thim. 3:​16, 17) Kodwa akumelanga sigxile kukhonokho kuphela size sikhohlwe ukuthi sifundani ngoJehova ngoba phela iBhayibhili lilokunengi okungenza simazi ngcono uBaba wethu.—Hubo. 25:​8-10a

8. Kuzahamba njani nxa singaqhubeka sifunda ngoJehova? (IHubo 73:​24-28)

⁸ Nxa singaqhubeka sifunda okunengi ngoJehova sizasondela kuye sibe ngabangane bakhe. Ujayele ukuzwa njani nxa uqeda kubala iBhayibhili kumbe uqeda kubukela uhlelo lwe-Broadcasting? Nxa uvela emhlanganweni wesabelo kumbe owesiqinti ke? Iqiniso elikhona yikuthi abanengi bethu siyabe sisizwa siseduze kakhulu loJehova. Kungani? Ngoba siyabe sesifunde okunengi ngaye. Lokho kwenza simdumise njalo simbonge. Sizwa njengomhubi owathi esecabangisise ngendlela uJehova amnakekela ngayo wathi: “UNkulunkulu ulidwala lami, uvikela inhliziyo yami. Uyisabelo sami kuze kube phakade.” (Bala iHubo 73:​24-28.) Nxa singaqhubeka sisibamazi ngcono uJehova sizakuqakathekisa kakhulu ukuba ngabangane bakhe.

9. Kuzakunceda ngani ukuhlala ucabanga ngoJehova? Nika umzekeliso.

⁹ IBhayibhili lisitshela ukuthi sidinge uJehova. (Zaga. 3:​5, 6) Kutshoni lokhu? Lokhu kutsho ukuthi sicabangisise ngesesikwazi ngaye besesizama ukwenza okumthokozisayo. Izikhathi ezinengi umuntu otshadileyo ujayele ukuthatha ipikitsha yomkakhe ayenze ibe yi-screen saver efonini yakhe. Uyabe ekwenzelani lokhu? Uyabe usenzela ukuthi loba nini nxa evula ifoni acabange ngesithandwa sakhe. Ukucabanga ngomkakhe kuzamnceda ukuthi enze izinto ezizamthokozisa njalo abalekele loba yini engamdanisa kumbe imzwise ubuhlungu. Nxa lathi singahlala sicabanga ngoJehova uNkulunkulu wethu kuzakubalula ukuthi senze okumthokozisayo.—Hubo. 19:​13, 14.

10. Kuzasinceda njani ukufunda ngoJehova?

¹⁰ Siyenelisa ukulingisela uJehova ngoba sadalwa ngomfanekiso wakhe. (Gen. 1:26) Lokhu sekusitsho ukuthi kumele sifunde ngaye besesizibuza ukuthi singamlingisela njani. UJesu wabasola kakhulu ababhali labaFarisi ngoba kabazange balingisele uJehova. Babelandelela okuyizinto okuncanencane okusemthethweni bakhohlwe izinto eziqakathekileyo ezinjengokwahlulela kuhle, ukuba lesihawu kanye lokuthembeka. (Mat. 23:23) Thina akumelanga senze njengabo kodwa kumele sicabangisise ngemithetho lezimiso eziseLizwini likaNkulunkulu besesibona ukuthi zisifundisani ngoJehova. Singenza njalo sizenelisa ukulingisela uJehova.—1 Joh. 4:​8, 11.

SINGENZANI UKUZE SIMAZI UJEHOVA?

11. Waqala njani ukufunda ngoJehova?

¹¹ Usakhumbula yini ukuthi ngubani owaqalisa ukukutshela ngoJehova? Kungenzakala ukuthi ngabazali bakho. Engxenye baqala ngokukulandisela izindaba eziseBhayibhilini ezakufundisa ngoJehova, mhlawumbe basebekuchasisela lokuthi kunengi ongakufunda ngaye nxa ungakhangelisisa izinto azidalileyo. Kumbe engxenye wafunda ngoJehova usukhulile uncediswa ngoFakazi bakaJehova. Engxenye bakuncedisa besebenzisa ibhuku elithi Ungathokoza Kuze Kube Nini Lanini! Lowo owakufundisayo wakunceda wazwisisa ukuthi uJehova nguNkulunkulu onjani lokuthi ungafunda okunengi ngaye ngokukhangela izinto azidalileyo.b (Neh. 8:8; Imiseb. 14:17) Khathesi asixoxeni ngokuthi singenzani ukuze siqhubeke sifunda ngoJehova.

12-13. Nxa sibala indaba eziseBhayibhilini kuyini okumele sikwenze ukuze sifunde okunengi ngoJehova? Nika isibonelo. (UJeremiya 39:​15-18) (Khangela lomfanekiso .)

¹² Okokuqala okungasinceda sifunde okunengi ngoJehova yikubala iLizwi lakhe iBhayibhili. EBhayibhilini kulamavesi ahle atsho ukuthi uJehova nguNkulunkulu onjani. (Eks. 34:​6, 7) Kodwa indaba ezinengi eziseBhayibhilini ngeziphathelane labantu lezinto ababezenza. Nxa ubala indaba ezinjalo, dinga ukuthi zikufundisani ngoJehova.

¹³ Ake sithi ubala indaba yomTopiya okuthiwa ngu-Ebhedimeleki owakhipha uJeremiya emgodini. Nxa ubala kuJeremiya 38:​6-13 usungahle ubone ukuthi indoda le yayilesibindi futhi ibathanda abanye lokuthi ungayilingisela njani. Kodwa kukhona yini ongakufunda ngoJehova? Ye, kukhona. Ungehla layo indaba le uze uyefika kusahluko 39 usungananzelela ukuthi uJehova nguNkulunkulu onjani. (Bala uJeremiya 39:​15-18.) Uyakubona yini okusemavesini la okutshengisa ukuthi uJehova kakukhohlwa esimenzela khona? Kukhona yini okutshengisa ukuthi kakhethi? Kukhona yini okunye okufundayo ngoJehova endabeni le? Nxa ubala indaba eseBhayibhilini zama ukudinga ukuthi ikufundisani ngoJehova ubusumbonga futhi umdumise ngalokho okufundileyo ngaye.

14. Ukucabangisisa ngezinto ezidaliweyo kunceda ngani?

¹⁴ Okwesibili okungasinceda sifunde okunengi ngoJehova yikucabangisisa ngezinto azidalileyo. (Hubo. 145:​9, 10) Kodwa lokho akutsho ukuthi ungakhangela nje izinto ezidaliweyo uzahle umazi uJehova ngoba phela kulabanye abaqeda iminyaka leminyaka befunda ngazo kodwa basale bengamazi uNkulunkulu kumbe bephika lokuthi ukhona. Umphostoli uPhawuli wabhala wathi: ‘Lanxa uNkululunkulu engabonakali, ubuntu bakhe bubonakala ngendlela ecacileyo futhi buyazwisiseka nxa ukhangela izinto azidalayo.’ (Rom. 1:20) Kwelinye iBhayibhili ivesi le ithi umuntu ocabangisisa kuhle uyenelisa ukubona ubuntu bukaNkulunkulu. Yikho kumele sijulise ingqondo sicabangisise, sizame ukubona ukuthi izinto ezidaliweyo zisifundisani ngoMdali.

15. Kuyini okwenziwa nguPatrick ukuze amazi ngcono uJehova futhi singamlingisela njani? (Khangela lomfanekiso.)

¹⁵ Abanengi bethu sihlala emadolobheni futhi lokhu kungenza kube nzima ukuthi sizibone lula izinto ezidaliweyo. Kodwa lokho sekusitsho yini ukuthi ngeke senelise ukufunda ngoJehova ezintweni ezidaliweyo? Asixoxeni ngokujayele ukwenziwa ngumfowethu okuthiwa nguPatrick ohlala edolobheni elikhulu okuthiwa yiBrazzaville, eCongo. Uthi: “Ngijayele ukukhangelisisa izinto ezidalwe nguJehova. Lapho engihlala khona ngijayele ukubona izibungwana zidinga ukudla lenyoni zilungisa izidleke. Ngelinye ilanga ngabona inyoni zibhodabhoda zidobha insiba, lotshani lokunye nje okutshiyeneyo ukuze zilungise kuhle izidleke zazo.” UPatrick kazange aphongubukela nje inyoni lezo zisakha izidleke wama khonapho kodwa wacabangisisa ngalowo owazidalayo. Uthi: “Ngafunda ukuthi uJehova uyaziqakathekisa izinto azidalileyo ngitsho lalezo ezingakhanya zingatsho lutho. Lokhu kuyangiqinisekisa ukuthi lami uzahlala enginakekela, kasoze angilahle.”

16. Kuyini okwenza uMariya wamazi kuhle uJehova futhi singamlingisela njani? (Khangela lomfanekiso.)

¹⁶ Okwesithathu okungasinceda simazi ngcono uJehova yikucabangisisa ngalokho asenzele khona. Yikho okwenziwa nguMariya umama kaJesu. Wayephiwe umsebenzi omkhulu wokondla iNdodana kaNkulunkulu. UJehova wamqinisekisa esebenzisa u-Elizabethi lengilosi uGabriyeli. UMariya wayevele emazi kuhle uJehova futhi esazi lokuthi uyathokoza ngaye. (Luk. 1:30) Loba kunjalo, wacabangisisa ngokwakwenzakele wasefunda okunye okunengi ngoJehova. Wafunda ukuthi uJehova ulamandla, ulozwelo, kakhethi lokuthi uyabaqakathekisa abantu abakhangelelwa phansi. (Luk. 1:​46-55) UMariya wayekuqakathekisa ayekwenzelwa nguJehova. Lathi siyayiqakathekisa kakhulu indlela uJehova asincedisa ngayo “ngesikhathi esifaneleyo.” (Heb. 4:16) Yikho nxa ungancediswa ngabanye, kuhle ukuzibuza ukuthi okwenzakeleyo kukufundisani ngoJehova.

SIZAHLALA SIFUNDA NGOJEHOVA KUZE KUBE NINI LANINI

17-18. Ukufunda ngoJehova kuzaphela yini?

¹⁷ Zinengi sibili izinto esizazifunda ngoJehova emhlabeni omutsha. Kuzabe kulezincwadimgoqwa ezizasitshela okunengi ngaye lokuthi ufuna siphile njani. (Isam. 20:12) Langalesosikhathi sizabe silokhe sifunda okunengi ngezinto ezidalwe nguJehova besesicabangisisa ngokuthi zisifundisani ngaye. (Isaya. 11:​6-9) Ukubona izihlobo zethu zivuswa lokukhitshwa kwesono ebantwini kuzasifundisa okunengi ngaye kwenze lokuthi simthande kakhulu.

¹⁸ Ukufunda ngoJehova vele akusoze kuphele. Phela yena ubekhona kusukela nini futhi uzahlala ekhona kuze kube nini lanini ‘lokuzwisisa kwakhe akulamkhawulo.’ (Hubo. 90:2; 147:5) Asisoze ‘siwuzwisise wonke umsebenzi owenziwe nguNkulunkulu weqiniso kusukela ekuqaliseni kuze kuyefika ekucineni.’ (Umtshu. 3:11) Yikho ke, kungelandaba ukuthi sesikhonze okwesikhathi esinganani kasiqhubekeni sisenza konke okusemandleni ethu ukuthi sifunde okunengi ngoBaba wethu olothando uJehova.