Kunengi UJehova Angifundise Khona

Kunengi engakunanzelelayo lapha kodwa okwangithinta kakhulu yikubona abantu ababesebenzela uJehova. Abafowethu labodadewethu ababelapho babewukholisa umsebenzi wabo lanxa kwakungabalula ukuthi badakeke ngokwenza into eyodwa nsuku zonke. Babengazihluphi ngokuthi umsebenzi abawenzayo awubonwa ngabantu abanengi. Lokho kwangifundisa ukuthi lami kumele ngithobeke, ngenze loba yiwuphi umsebenzi engiwuphiwe nguJehova.

Kunengi uJehova angifundise khona. Eminyakeni yonke le ube elokhe engiqeqetsha. Kodwa ngingakalandisi okunengi, wothini ngiqale ngilixoxele ukuthi ngalithola njani iqiniso njengoba ngaqalisa ngingumBhuda.

UKUDINGA IQINISO

Ngazalelwa eChicago e-Illinois, e-U.S.A. Ngilizibulo ngakithi besengilandelwa ngabanawami abathathu. Abazali bami bathuthela eChicago besuka eJapan besiyazama impilo. Babefuna ukuthi lathi abantwana sifunde okuzwayo.

Abazali bami babengene bagxila enkolweni yesiBhuda. Umama yena wathi ekhula ngakibo vele kwakulethempeli lakhona. Ukhulu ozala umama labafowabo ababili babengadlali ngenkolo yesiBhuda. Lami ngangikwazi ukuthi yiyo inkolo yangekhaya. Ngangisithi ngifika nje ngivela esikolo, ngiqale ngokutshisa impepha besenginikela ngerayisi lamanzi esithombeni esasingekhaya. NgeSonto sasihamba ethempelini siyetshaya izindimi kwesinye futhi isithombe kodwa lesi sona sasisikhulu sihuqwe langegolide.

Ngikhumbula ngelinye ilanga ngimile ngikhangele isithombe esasilaso ngekhaya ngizibuza ukuthi, ‘Vele impilo yami izaphetha ngani? Nxa ngingafa kuzahamba njani?’ Ngalesosikhathi ngasengileminyaka engu-7. Phela thina esontweni sasifundiswe ukuthi nxa ungafa uyasuka uyehlala kweyinye indawo usungumoya. Into yakhona yayingangihambi kuhle ngicabanga ukuthi ngelinye ilanga ngiyabe ngingasekho emhlabeni. Lanxa kwakuthiwa ngiyabe sengiphila kweyinye indawo kodwa khonokho nje ukuthi ngiyabe ngingasenguye muntu kwakungidanisa kungiqeda amandla.

Ngathi sengisiyabamba iminyaka engu-15 ngaqalisa ukunanzelela ukuthi okunye esasikwenza kwakungacaci, kungakhanyi lokuthi sikwenzelani. Ngangisizwa angani ngilahlekile. Ngangisizwa ngaphakathi kwami ukuthi kumele ukuthi kuloNkulunkulu olamandla, ngifisa sibili ukumazi. (Mat. 5:3) Ngaphongucabanga ukuthi engxenye iBhayibhili lingayiphendula imibuzo engangilayo. Ngasuka ngayathenga iBhayibhili okuthiwa yi-King James Version. Ubona angani ngalithenga ngaphi? Kulabantu ababethengisa amaBhayibhili komunye umkhosi wamaBhuda, ngahle ngatshaya ngibambile!

Ngelinye ilanga ngizihambela lenja yami, ngahlangana lomunye umdala okuthiwa nguWilson Bashou. Ngalesosikhathi ngasengileminyaka engu-17. Umdala lo wangibuza wathi: “Uyakwazi yini ukuthi uNkulunkulu usithembisani?” Yahle yatsha ingxoxo sangena sajula eBhayibhilini. UWilson wangibalela uSambulo 17:1 wasengibuza wathi, ‘Uyakwazi yini ukuthi iBhayibhili liyabe lisitshoni nxa likhuluma ngamanzi amanengi aqanjwe evesini le?’ Kimi zazicitshile! Wasengitshengisa uvesi 15 ohle acacise ukuthi amanzi lawo atsho abantu. Ngananzelela ukuthi oFakazi bakaJehova babengazikhulumeli okwabo kodwa babechasisa amavesi besebenzisa amanye amavesi. Ngakuthanda lokho! Singakehlukani, uWilson wangipha ibhuku elithi The Truth That Leads to Eternal Life. Angazi ukuthi ngabe ngingaphi kungayisilo bhuku leliyana!

Ngemva kwamalanga angu-10 ngahamba ngayangena umhlangano eWolu yoMbuso okokuqala. Angisoze ngiyikhohlwe indlela abangamukela ngayo. Kusukela lapho kwahle kwaba yiyo impilo yami, ngangingasayikhuthi imihlangano. UWilson waqalisa ukufunda lami iBhayibhili. Ngangikholisa okokuthi kwezinye izikhathi sasitshova okwamahora angaba ngu-8 sifunda. Lokhu kwabazondisa kakhulu abazali bami, bazama besazama ukungifosa ukuthi ngiyekele ukufunda. Kodwa ngaqhubeka ngifunda iBhayibhili ngoba ngangizibonela ukuthi leli liqiniso. Ngabhabhathizwa ngo-1983.

SALA YUNIVESITHI QOKI EKUPHAYONENI

Ngesikhathi ngibhabhathizwa ngasengifundela ukuba ngudokotela kweyinye iyunivesithi ephezulu. Abazali bami babelume langamazinyo ukuthi ngingene lapho. Ngangingaqedisa sibili eyunivesithi kodwa kwasekutshisa enhliziyweni sengifuna ukusebenzela uJehova ngakho konke engilakho, ngingene enkonzweni yesikhathi sonke.

Ubaba wayevele watsho ukuthi ngingavele ngiyekele eyunivesithi ngihle ngiqoqe okungokwami ngiphume ngiphele emzini wakhe. Ngazibuza ukuthi yinto engizayithini yonale! Phela ngangibathanda abazali bami ngingafuni ukubadanisa. Ngangijayele ukuthi nxa sengitshayisile ngingakabuyeli ngekhaya, ngihambahambe egumeni leyunivesithi ebusuku ngikhuleka kuJehova. Ngangimncenga ngisithi: “Jehova, indaba le iyangisinda ngicela ungiphe ukuhlakanipha.” Ngathi sengikhethe ukutshiya eyunivesithi ubaba wathi: ‘Ayigebhe! Angifuni lakukubona emzini wami.’ Ngafonela uWilson ngimtshela ukuthi ngasengixotshiwe ngekhaya. Yena wahle wathi ngibuye ngizohlala laye. Yimi lowana ngingena ebhasini lokuyimitshaqana kwami ngilubangise kuWilson. Ngezwa ngihlaliseka kwangathi ngethulwe umthwalo osindayo. Lapho-ke ngahle ngakwazi ukuthi ngenze into eqondileyo.

Uyazi kwakungathi ngingamila impiko ngiphaphe! Ngasengikhululekile ukusebenzela uJehova. Ngahle ngathi qoki ekuphayoneni ngo-1984.

Ngeminyaka leyana ngiliphayona uJehova wangifundisa okunengi. Okunye engakufundayo yikuthi kumele ngiphikelele ngingaphongukhalala masinyane. Ngelinye ilanga ngangisizwa kungatsho vele ukuthi ngiye ekutshumayeleni. Ngangidondiswa yikuthi ngangizahamba ngedwa ngoba abanye babengenelisi ukuhamba ekutshumayeleni emini. Ngaphonguzihudula lanxa inhliziyo yayingatsho. Ngathi sengitshumayele okwamahora angaba mabili, ngasengisithi kahle ngiyeqoqoda emnyango wokucina. Ngasengidinwe, ngapha lesizungu singenzani! Ngathi ngithi ngiyakhangela ngabona lezulu selithwala selifuna ukuna. Ngasengicabanga ukuzitshayisela kodwa ngaqhubeka ngiqansa amastephisi. Ngathi ngivusa amehlo ngabona nanti ijaha elidabuka ePhilippines. Engqondweni ngazitshela ukuthi, ‘lapha uzidlalisela isikhathi umuntu lo vele kasoze akulalele.’ Kodwa ngasala ngingelankani ngoba indoda le yavuma ukufunda lami iBhayibhili futhi sikhuluma nje, laye usenguFakazi kaJehova.

ENGAKUFUNDA SENGISEBHETHELI EBROOKLYN

Ngathi sengihlale loWilson okweminyaka emibili ngasengibizwa ukuthi ngizosebenza eBhetheli eBrooklyn ngo-1985. Njengoba ngike ngatsho ekuqaliseni, kwathiwa ngiyesebenza lapho okuhlanganiswa khona amabhuku. Ngelinye ilanga ngathi ngibhala amakhava amabhuku ngomtshina, ngayenza inkalakatha yendaba! Ngatshaya ngaphambanisa amakhava amabhuku amanengi, konke nje kwahle kwaba yizibi sokumele kulahlwe. Ngacelwa ukuthi ngichasisele umzalwane owayekhangele umsebenzi ukuthi kwakuhambe njani. Ngachasisa ngaze ngafaka lezizatho ezinengi kodwa kulento eyodwa engayehlulekayo. Umzalwane engangikhuluma laye wabonisana lami kuhlekuhle, wangikhumbuza ukuthi nxa ngiphambanisile okuqakathekileyo yikuxolisa. Mhlalokho ngafunda ukuthi nxa ngiphambanisile kumele ngivume ngixolise kulokuzama ukucatsha ngomunwe.

Okunye engakufundayo yikuthi kuqakathekile ukuncedisa abanye. Abafowethu asebekhulile babekwenza lokho. Ngikhumbula ngelinye ilanga sihlezi endlini yokudlela simelele ukuphiwa ukudla. Sasihlezi lomfowethu uMilton Henschel owayelilunga leQula Elikhokhelayo. Abantu babe banengi mhlalokho, abafowethu labodadewethu abasebenza ekhitshini bedidizela. Mina labangane bami sasilokhe singunguna sisithi ‘laba labo yindaba belokhe bephuza kangaka.’ Khonokho nje umfowethu uHenschel wasukuma, waqalisa ukuncedisana labo benika abantu ukudla. Angisoze ngafa ngakukhohlwa engakufunda mhlalokho ngoba kwangikhumbuza uJesu egezisa abafundi bakhe inyawo.—Joh. 13:​3-5.

“HAMBA UYEFUNDA ISIJAPAN!”

Ngo-1987 ngavakatshela eJapan. Ngayithanda kakhulu indlela abafowethu labodadewethu ababesenza ngayo. Ngabantu abakhutheleyo labathobekileyo. Ngezwa ngifisa kakhulu ukutshumayela labo kodwa uhlupho yikuthi lesiJapan sakhona ngangingasazi. Omunye udade okuthiwa nguMichiko Oda owayeseBhetheli kazange atshone engibhoda wangitshela wathi: “Hamba uyefunda isiJapan!” Angiphozisanga maseko,ngahle ngayasifunda. Kodwa ngangingakwazi ukuthi lokho kwakuzanginceda kakhulu.

Ngemva kwenyanga nje ezimbalwa ngathutha ngayangena lebandla lesiJapan eNew York. Ukufunda isiJapan kwangivulela iminyango eminengi emsebenzini kaJehova. Ngo-1989 ngangena umhlangano wesabelo ngolimi lwesiJapan eLos Angeles eCalifornia. Kwakungokokuqala ukungena ngolimi lolu. Ku-drama esayibukelayo kwakulomunye udade okuthiwa nguMiwako Onami owayeliphayona lesikhathi sonke. Ngathi ngimuthi hlasi kwathi tha enhliziyweni! Ngahle ngathi lowana ngowami lowana.

Satshada ngo-1992 laye wasengena eBhetheli eBrooklyn. UMiwako ulomusa njalo uyakuthanda ukuncedisa abanye. Lami ngiyazama ukubaphatha kuhle abanye njengaye. UMiwako ungenza ngithokoze, uyisipho esivela kuJehova sibili.

OKWENZAKALA SESISEJAPAN

Ngo-1999 savunyelwa ukuthi siyesebenza egatsheni leJapan ukuze sibe seduze lobabazala lomamazala njengoba basebehlala begula.

Imuli yeBhetheli yasamukela kuhle, inhliziyo zethu zachelesa. Kukhona okunye futhi engakufunda sengiseJapan. Abafowethu labodadewethu beJapan babe lomusa besamukela kuhle abanye. Emsebenzini khona angikhulumi, babewutshaya umsebenzi bengadlali. Okunye engakunanzelelayo yikuthi babambene futhi bayancedisana emsebenzini. Abantu beJapan ayisibo labana abokuthi omunye uyabe edonsa yedwa esiyale kodwa bajayele ukusebenza ndawonye bencedisana. Lokho kwangifundisa ukuthi ngisebenze kuhle labanye. Ngananzelela lokuthi khonokho okuncane engikwenzayo enhlanganisweni kaJehova kungenza ukuthi intando yakhe yenzeke.

Engikufunde ngiseBhetheli ngingakufanisa lalokhuyana okwafundwa nguMosi ngeminyaka engu-40 eselusa izimvu. Lami ngingathi ngangithole imfundo ephezulu njengoMosi kodwa yasingenza ngiziphakamise sengibona angani ngazi konke. Kodwa eBhetheli ngafunda ukuthi kumele ngithobeke ngithembe uJehova. Okweminyaka yonke le, uJehova ubengifundisa futhi engiqeqetsha njengoba nje wenza kuMosi.

Kwadlula iminyaka engaba ngu-24 silokhe sinakekela ubabazala lomamazala. Ngezinye izikhathi kwakungalula, kufonwa buthumuthumu sokumele abantu bagijinyiselwe esibhedlela. Umamazala yena kwamqinela sibili okokuthi ekucineni wayengasenelisi lokuhamba. Kwasekunzima ukuthi aye emihlanganweni yebandla lasekutshumayeleni. Wacina esehamba nge-wheelchair. Wayemthanda uJehova futhi waqhubeka ebambelele kuye. Wayesithi nxa ekhuluma ngoJehova uzibonele wedwa ukuthi uyamthanda sibili uNkulunkulu wakhe. Kwangithinta kakhulu ukumbona ekhonza uJehova ethokoza lanxa wayesebuhlungwini.

Ngo-2024 sacelwa ukuthi sisuke eBhetheli siyekuba ngamaphayona aqakathekileyo esihlengeni se-Okinawa. Sasesisebenze eBhetheli okweminyaka edlula 30. Khathesi siyazikholisela ukutshumayela e-Okinawa. Kwesinye isikhathi siyake siyetshumayela lasenkambeni yamasotsha eseduze lalapho esihlala khona. Kunengi esasesikufundile eBhetheli okwenza ukuthi utshintsho lolu lungasithwalisi nzima kangako. Sizama ngazo zonke indlela ukusisebenzisa kuhle isikhathi lokuhlala sikhuthele ekutshumayeleni. UJehova usibusisile sibili ngoba bakhona esesifunde labo iBhayibhili asebengani yizihlobo zethu zegazi. Sesikunanzelele sibili ukuthi kuqakathekile ukuthanda abantu. Simbonga nsuku zonke uJehova ngomsebenzi omuhle kangaka asiphe wona.

NGIZIMISELE UKUQHUBEKA NGIFUNDA

Abangakithi lokhe bengakabi ngoFakazi lanxa nje khathesi bengasangihluphi ngakho. Lanxa kunjalo, sengithole izinkulungwane lezinkulungwane zezihlobo enhlanganisweni kaJehova njengoba nje uJesu wathembisa ukuthi labo abatshiya izihlobo zabo ukuze bamlandele bazakuba phakathi kwemuli enkulu. (Mak. 10:​29, 30) Ngizibonele ngawami sibili amazwi kaJesu egcwaliseka. Banengi kakhulu abafowethu labodadewethu abatshengisa ukuthi bayangithanda, nxa ngingaqala ukubabala vele ngeke ngibaqede.

Lokhe ngilalo ibhuku engaliphiwa ngumfowethu uWilson elithi The Truth That Leads to Eternal Life. Ibhuku leli lihlala lingikhumbuza ukuthi uJehova wangivulela indlela yokuthi ngibemazi. (1 Imilan. 28:9) Ngizimisele ukuqhubeka ngifunda futhi ngithuthuka lokuqhubeka ngincedisa abanye ukuthi balazi iqiniso elingabenza bathole ukuphila okungapheliyo.