AUGUST 24-30, 2026
INGOMA 65 Qhubekela Phambili!
Amaqembu Okutshumayela Asinceda Njani?
“Ngizamdumisa uJehova ngenhliziyo yonke, embuthanweni wabaqotho.”—HUBO. 111:1.
ESIZAKUFUNDA
Sizaxoxa ngokuthi kunceda ngani ukuba seqenjini lokutshumayela.
1-2. Abanye abafowethu labodadewethu bathini ngokuba semaqenjini okutshumayela?
USALIKHUMBULA yini ilanga owatshelwa ngalo ukuthi usungummezeli wezindaba ezinhle? Kumele ukuthi wathokoza kakhulu ngoba wawususemulini yabantu abakhonza uJehova. (Hubo. 148:1, 2, 12, 13) Kungenzakala ukuthi mhlalokho abadala bahle bakutshela ukuthi uzabe ukuliphi iqembu lokutshumayela. Ukuba seqenjini lokuya ekutshumayeleni kuyasinceda ukuthi siwenze kuhle umsebenzi wokutshumayela ngoMbuso “emhlabeni wonke.”—Mat. 24:14.
2 Wena uyakukholisa yini ukuba seqenjini lokutshumayela? Udadewethu okuthiwa nguWendya uthi: “Ukuba seqenjini lokutshumayela kungincede kakhulu. Abafowethu labodadewethu engitshumayela labo bangincedisile ukuthi ngithuthukise indlela engitshumayela lengifundisa ngayo. Bangincedisile ngaqinisa ubungane bami loJehova, labo sebengabangane bami sibili.” Omunye umfowethu okuthiwa nguRich uthi: “Ngilesibusiso esikhulu sokuba ngumbonisi weqembu. Abanye abamemezeli banganceda umfundi weBhayibhili ukuthi athuthuke aze abe nguFakazi kodwa umsebenzi wombonisi weqembu awupheli ngoba kuyabe kumele ancedise umuntu lowo ukuthi ahlale elokholo oluqinileyo.” Udadewethu okuthiwa nguDinah uthi: “Ngiyakukholisa kakhulu ukuba seqenjini lethu lokutshumayela. Siyimuli sibili.”
3. Sizaxoxa ngani esihlokweni lesi?
3 Esihlokweni lesi sizaxoxa ngomsebenzi wombonisi weqembu kanye lomsizi wakhe. Sizabona lokuthi thina singabancedisa njani abanye abaseqenjini lethu. Ngemva kwalokho sizabona ukuthi vele kusinceda ngani ukuba seqenjini lokutshumayela.
UMBONISI WEQEMBU LOMSIZI WAKHE
4. (a) Umbonisi weqembu ulawuphi umsebenzi? (b) Umbonisi weqembu angabancedisa njani abaseqenjini lakhe? (Khangela ibhokisi elithi “Amacebo Anganceda Umbonisi Weqembu.”)
4 Umbonisi weqembu ngumdala okhethwe liqula labadalab ukuthi ancedise abamemezeli abaseqenjini lakhe ukuthi baqhubeke bengabangane bakaJehova. Umsebenzi wakhe ugoqela ukuncedisa ummemezeli ngamunye eqenjini lakhe ukuthi aqine ekukhonzeni. (Zaga. 27:23) Umsebenzi wakhe oqakatheke kakhulu ngowokwelusa. Yikho kumele abekwazi ukuthi izinto zimhambela njani ummemezeli ngamunye oseqenjini lakhe. Nxa engahlala exoxa labamemezeli kuzakuba lula ukuthi abone ukuthi bafuna ukuncediswa ngaphi. (Zaga. 12:25; Isaya. 32:2; Jak. 2:15-17) Omunye umsebenzi wombonisi weqembu ngowokuncedisa ummemezeli ngamunye ukuthi akhuthale ekutshumayeleni. Yena ngokwakhe kumele akhuthale emsebenzini wokutshumayela. Azame ukuya ekutshumayeleni iviki ngayinye. Lokhu kuzamnika isikhathi sokutshumayela labamemezeli abatshiyeneyo, abakhuthaze njalo abaqeqetshe. Nxa kuyikuthi kasoze abekhona ekutshumayeleni uyacela ukuthi umsizi wakhe kumbe omunye ummemezeli ofaneleyo akhokhele iqembu mhlalokho. Okunye okwenziwa ngumbonisi weqembu yikuncedisa abazalwane ababhabhathiziweyo ukuthi bathuthuke ekukhonzeni. (1 Thim. 3:1) Uyabancoma abazalwane laba ngokuhle abakwenzayo abasebanika lamacebo okuthuthukisa lapho abasilela khona ukuze labo ngokuya kwesikhathi babe zinceku ezikhonzayo kumbe babe ngabadala. Iqula labadala kumele licabangisise sibili nxa likhetha umzalwane ukuthi abe ngumbonisi weqembu ngoba lo asomsebenzi wokudlala.
5. Yibuphi obunye ubunzima ababonisi bamaqembu abahlangana labo?
5 Kwezinye izikhathi kungabanzima ukuthi umbonisi weqembu awenze kuhle umsebenzi wakhe. Omunye umfowethu okuthiwa nguJörg, ohlala eGermany ungumbonisi weqembu futhi uleminye imisebenzi ebandleni njengabo bonke abanye abadala, uthi: “Kunzima ukuthi ube ngumbonisi weqembu ngapha uleminye imisebenzi ebandleni. Ngesinye isikhathi kuyadonsa isikhathi ngingazange ngixoxe labo bonke abamemezeli abaseqenjini lami.” Umfowethu ongumdala okuthiwa ngu-Abel, oleminyaka engu-70 ohlala e-Uganda uthi: “Ebandleni lethu abadala lezinceku ezikhonzayo balutshwana. Lokhu kwenza ukuthi kube labamemezeli abanengi eqenjini ngalinye. Ngiyazama sibili ukukhuthaza abafowethu labodadewethu abaseqenjini lami. Kodwa bakhona osekulesikhathi ngacina ukubakhuthaza.” Umdala webandla okuthiwa ngu-Obed, ohlala eSuriname yena uthi: “Lanxa ngikuthanda ukuqeqetsha abanye ngilemisebenzi eminengi ebandleni okuyabe kumele ngiyenze. Yikho ngicina ngiswela isikhathi sokubaqeqetsha. Phela kudinga isikhathi lamandla ukuthi ubaqeqetshe kuhle abanye.” Manje kuyini okunganceda ababonisi bamaqembu abalenhlupho lezi kumbe ezinye ezingahambelana lazo?
6. Kunceda ngani ukuthi amaqembu okutshumayela angabi labantu abanengi?
6 Iqembu ngalinye akumelanga libe labamemezeli abanengi kakhulu. Lokhu kuqakathekile ngoba umbonisi kumele abebazi kuhle bonke abaseqenjini lakhe ukuze enelise ukubancedisa. Manje kungenziwani nxa kuyikuthi ibandla lilabadala abalutshwana? Kulokuthi iqembu libe labamemezeli abanengi, iqula labadala lingakhetha inceku ekhonzayo ukuthi yenze umsebenzi lowu okwesikhatshana. Nxa amaqembu la elabamemezeli abalutshwana kubalula ukuthi umbonisi weqembu abancedise kuhle bonke.
7. Umbonisi weqembu angamqeqetsha njani umsizi wakhe? (U-1 Phetro 5:2) (Khangela lomfanekiso.)
7 Nxa ungumbonisi weqembu ebandleni elilabadala abalutshwana lwisa sibili ukuqeqetsha umsizi wakho ukuze liwunakekele kuhle umhlambi kaNkulunkulu. (Bala u-1 Phetro 5:2.) Nika umsizi wakho imisebenzi etshiyeneyo njengokwenza umhlangano wokuya ekutshumayeleni. Xoxani ngokuthi lingabancedisa njani abamemezeli abaseqenjini lenu ukuze bahlale bengabangane bakaJehova. Ngamunye wenu katshumayele labamemezeli abatshiyeneyo. Sebenzani lonke emsebenzini wokwelusa. Lingakavakatsheli ummemezeli ngamunye qalani lixoxe ngokuthi lizamkhuthaza njani. Nxa selisuka lapho mncome umsizi wakho ngokuhle akwenzileyo. Ungesabi lokumtshela nxa kuyikuthi kulalapho okumele athuthukise khona. Nxa umqeqetsha umsizi wakho uyabe umcedisa ukuthi laye ngelinye ilanga enelise ukwenza kuhle umsebenzi lo wokuba ngumbonisi weqembu. (2 Thim. 2:2) Abanye abangakuncedisa emsebenzini lo ngabanye abamemezeli abaseqenjini lakho. Ngokwesibonelo, amaphayona labanye abamemezeli asebelesikhathi eside betshumayela bangancedisa labo abasanda kuba ngabamemezeli lalabo abangakabi zingcitshi ekutshumayeleni. Bangabancedisa ukuthi benelise ukuqalisa izingxoxo, lokuphindela lokuthi bathuthukise indlela abafundisa ngayo abanye iBhayibhili. Khathesi kasixoxeni ngezinto ezintathu umuntu ngamunye okumele azenze ukuze sonke sikukholise ukuba seqenjini lokutshumayela.
Umbonisi weqembu kumele anike inceku ekhonzayo eseqenjini lakhe imisebenzi etshiyeneyo njengokumcela ukuthi enze umhlangano wokuya ekutshumayeleni. (Khangela indima 7)
KUKHOLISE UKUBA SEQENJINI LAKHO LOKUTSHUMAYELA
8. Ungenzani ukuze utshumayele labantu abaseqenjini lakho? (URoma 1:12)
8 Hlala utshumayela labantu abaseqenjini lakho. Lokhu kuzakunceda ukuthi ukhuthaze abafowenu labodadewenu labo bakukhuthaze. (Bala uRoma 1:12.) Ukutshumayela labanye kungalinceda ikakhulu endaweni ezingaba yingozi futhi kungenza labamemezeli bakhululeke nje ukuxoxa labantu. Nxa kuyikuthi uyasebenza futhi awusitholi isikhathi sokuyatshumayela leqembu, kungaba njani ukuthi uxoxisane lomqhatshi wakho? Mhlawumbe angakuvumela ukuthi usebenze okwamalanga athile ukuze wenelise ukuthola isikhathi sokuyatshumayela labanye. (Neh. 2:4-6) Nxa ungenelisi ukuhlangana labanye abaseqenjini lenu mhlawumbe ngenxa yokugula kumbe ukuluphala, ungesabi ukukhuluma lombonisi weqembu. Usengahlela ukuthi wenelise ukulalela umhlangano wokuya ekutshumayeleni usebenzisa ezempucuko lokuthi utshumayele ngokubhala incwadi kumbe ngefoni. Kuthiwani nxa ungosakhulayo futhi uqine saka kodwa uphuma gqo ekutshumayeleni? Kungakunceda ukucela ukuya ekutshumayeleni lomunye oseqenjini lenu iviki ngayinye. Kuhle ukuzihlola ukuthi kanti vele isikhathi sakho usiqeda usenzani. (Rom. 12:11; Kol. 4:5) Thandaza kuJehova umtshele ukuthi uyafisa sibili ukutshumayela labanye abaseqenjini lenu. Yena uzawuphendula umthandazo wakho ngokukunika “isifiso lamandla okwenza okumthokozisayo.”—Flp. 2:13.
9. Singenzani ukuze abanye bakukholise ukuba seqenjini lethu? (Roma 12:13)
9 Woba lomusa njalo wamukele abanye. Nxa singakwenza lokho abantu abaseqenjini lethu bazabona ukuthi siyabathanda (Bala uRoma 12:13.) Kuyavuma yini ukuthi abantu abaya ekutshumayeleni bahlangane emzini wenu? Kwamanye amabandla amaqembu ayatshintshana ukuphekela kumbe ukukwejisa lomzalwane oyabe evakatshile ezokwenza intshumayelo yangempelaviki. Kwesinye isikhathi umzalwane lo usengehluleka ukukwejisa leqembu leli. Lanxa kunjalo abeqembu leli bangaqhubeka ngabayabe bekuhlelile bahlangane ukuze bakhuthazane. Udadewethu okuthiwa nguSarah oliphayona eliqakathekileyo uthi: “Kuqala ngangisithi nxa nginxuse abantu ngiswele ukuthi ngibambe kuphi ngitshiye kuphi. Kodwa sengafunda ukuthi okuqakatheke kakhulu yikuba lezingxoxo ezimnandi labafowethu labodadewethu kulokuzikhathaza ngokugcwalisa itafula ngezibiliboco.” Nxa silomkhuba wokuhlangana labantu abaseqenjini lethu ukuze sizikwejisele sizakuba yimuli sibili futhi sizaqhubeka sisondela kuJehova.—Neh. 8:10; Imiseb. 20:35.
10. Kuyini esingakwenza ukuze sithuthukise indlela esitshumayela lesifundisa ngayo? (IZaga 1:5; 27:17) (Khangela lomfanekiso.)
10 Cela ukuncediswa. Nxa umuntu angaba yingcitshi ekutshumayeleni lasekufundiseni uzakukholisa kakhulu ukutshumayela labanye abaseqenjini lakhe. Uyafisa yini ukuthuthukisa indlela otshumayela lofundisa ngayo? Nxa kunjalo ungesabi ukucela ukuncediswa ngabanye abaseqenjini lenu, kungaba ngamaphayona loba abanye abafowethu labodadewethu asebelesikhathi eside betshumayela. (Bala uZaga 1:5; 27:17.) Tshela umbonisi weqembu ngongabe uhlele ukukwenza ekutshumayeleni ukuze akuncedise. Ukucela ukuncediswa ngabanye kuyanceda sibili. Udadewethu okuthiwa nguHeather kumthwalisa nzima ukuxoxa labanye ngoba ulenhloni, uthi: “Kwakungithwalisa nzima ukuphindela ebantwini engangike ngababona. Yikho ngacela omunye udadewethu oliphayona ukuthi angincedise. Udade lo ulomusa sibili. Wanginceda ukuthi ngithole umuntu engifunda laye iBhayibhili. Khathesi sengikukholisa ukuya ekutshumayeleni ngoba ngacela ukuncediswa.” Kunengi sibili esingakwenza ukuze sikukholise ukuba seqenjini lethu lokutshumayela.
Nxa iqembu lilabamemezeli abalutshwana kubalula ukuthi sibazi ngcono abanye njalo sitshumayele labo (Khangela indima 10)
KUNCEDA NGANI UKUBA SEQENJINI LOKUTSHUMAYELA?
11-12. Kuyanceda yini ukuba seqenjini lokutshumayela? Nika isibonelo.
11 Kuyasinceda ukuthi sihlale singabangane bakaJehova. Umbonisi weqembu uyazinika isikhathi sokuthi eluse abamemezeli abaseqenjini lakhe. Uba leqiniso lokuthi abafelokazi, izintandane lasebekhulile bayavakatshelwa ukuze bakhuthazwe, baqiniswe njalo bakhunjuzwe ukuthi uJehova uyabathanda. (1 Thes. 2:8; Jak. 1:27) Emaqenjini la siyaqeqetshwa ukuze sithuthukise indlela esitshumayela lesifundisa ngayo. Abafowethu ababhabhathiziweyo bona bayancediswa ukuze benelise ukwenza imisebenzi etshiyeneyo ebandleni.—1 Thim. 3:10
12 Udadewethu esike sakhuluma ngaye okuthiwa nguWendy kwamnceda kakhulu ukuba seqenjini lokutshumayela, uthi: “Kwakunzima ukuthi umama ayehlangana labanye eqenjini ukuze aye ekutshumayeleni ngempelaviki ngoba ubaba wayengafuni ukuthi sibe ngoFakazi kodwa mina wayengivumela ukuthi ngihambe. Eqenjini leli kwakulomunye udade owayesekhulile futhi eliphayona. Sahle saba ngabangane. Sasitshona sitshumayela sonke futhi kunengi angifundisa khona. Okunye engilokhu ngikukhumbula futhi ngikusebenzisa lalamuhla ngamacebo engawaphiwa ngumbonisi weqembu lethu.”
13. Kunceda ngani ukuba labangane emaqenjini ethu? (Khangela lomfanekiso ongaphandle.)
13 Sithola abangane. Nxa sihlala sitshumayela labanye abaseqenjini lethu siyacina sesingabangane. (Flp. 1:27) Abanye abantu balenhloni futhi kubathwalisa nzima ukuba phakathi kwabantu abanengi. Yikho ukuba semaqenjini amancane kuyabanceda ukuthi bakhululeke futhi bathole abangane (2 Khor. 6:13) Abangane esibathola emaqenjini ethu okutshumayela bayasiduduza nxa sifelwe, basincedise nxa sigula, sidanile kumbe siphakathi kwaloba yibuphi ubunzima. (1 Thes. 5:14) Kumele sibe labo sibili abangane abanjalo ngoba ukuhlupheka okukhulu sekuseduze. (Mat. 24:21) Lanxa abangane bethu laba bengeke baziqede zonke inhlupho zethu ukwazi nje ukuthi bayasithanda kuyasinceda ukuthi siqinisele.—Zaga. 17:17.
Odadewethu abaseqenjini elilodwa lokutshumayela basekutshumayeleni (Khangela indima 13)
14. Ukuba seqenjini lokutshumayela kungasinceda njani nxa sesiphakathi kobunzima?
14 Ukuncediswa ngezikhathi ezinzima. Ababonisi bethu bamaqembu basukumela phezulu ukuze basincedise ngezikhathi zobunzima. Zinengi inhlupho esihlangana lazo. Kungaba yimikhuhlane, ingozi zemvelo, ukugula loba ukugulelwa, ukuhlukuluzwa kumbe ukuswela imali. Ebandleni ngalinye, ikhomithi yenkonzo kanye lababonisi bamaqembu bayakwazi okumele bakwenze ukuze bancedise abamemezeli ngezikhathi ezinjalo. Phela abanye abamemezeli kuyabe kumele bancediswe kakhulu ukwedlula abanye. Nxa kungaba lomonakalo umbonisi weqembu uhle athintane labamemezeli abaseqenjini lakhe ukuze abone ukuthi badinga ukuncediswa kukuphi. Bengabe bedinga ukuncediswa ngemithi, ukudla, amanzi okunatha, indawo yokuhlala kumbe ngezigqoko. Abamemezeli abaseqenjini lenu bayakuthanda njalo bazakuncedisa ngezikhathi ezinzima.
15. Yiwuphi umsebenzi esiwenzayo sincediswa zingilosi?
15 Inhlanganiso kaJehova inkulu kakhulu. Ingxenye esezulwini ilezinkulungwane lezinkulungwane zezingilosi ezithembekileyo. Besekusithi ingxenye esemhlabeni yona iqhubeka ikhula ngoba khathesi sesisedlula 9 miliyoni. (Zak. 8:23; Isam. 5:11) Izingilosi zincedisa abantu bakaJehova emhlabeni wonke ukutshumayela izindaba ezinhle zoMbuso kaNkulunkulu. (Isam. 14:6, 7) Kwangathi sonke singenza konke okusemandleni ethu ukuze sikukholise ukuba seqenjini lethu lokutshumayela. Amaqembu la ayasinceda ukuthi simkhonze ngenhliziyo yonke uJehova.—Hubo. 111:1
INGOMA 61 Qhubekani BoFakazi!
a Amanye amabizo atshintshiwe.
b Emabandleni alabadala abalutshwane, iqula labadala lingakhetha inceku ekhonzayo ukuthi yenze umsebenzi lo kuze kube lomdala ongawenza. Inceku ephiwa umsebenzi lo ibizwa ngokuthi yinceku yeqembu ngoba kayikabi ngumbonisi. Kumele isebenze iqondiswa ngabadala bebandla.