Zibone Ngendlela Eyiyo Inhlupho Zakho

1-2. Kuyini okumele sikwenze ukuze inhlupho zingasiqedi amandla? (Khangela lomfanekiso.)

UJEHOVA uyabathanda kakhulu abantu abamkhonzayo. Lanxa kunjalo iqiniso elikhona yikuthi impilo “igcwele usizi lokuhlupheka.” (Hubo. 90:10.) Abanye bethu bathwele nzima ngoba bahlutshwa yizihlobo ezingafuni ukubabona bekhonza uJehova. Abanye bavalelwe emajele ngenxa yokufundisa abantu ngoJehova. Abanye imizimba ayisavumi basebuhlungwini ngenxa yoguga lokugula, abanye inhliziyo zidabukile ngenxa yokufelwa. Wena kuyini okukuthwalise nzima?

² Kungelani lohlupho ongabe uphakathi kwalo, okungakunceda ukuthi uqinisele yikulubona ngendlela eqondileyo. Kutshoni ukubona inhlupho ngendlela eqondileyo futhi kuqakatheke ngani? Ake sisebenzise umzekeliso: Nxa umuntu etshayela imota kumele abe lelihlo elibukhali ukuze abalekele ingozi. Kungadingeka ukuthi avike kumbe ehlise isiqubu loba kwesinye isikhathi ame kusiya ngokuthi kuyini osekuthutshile. Kodwa ukuze enelise ukukwenza kuhle konke lokho kumele abe ewubona kuhle umgwaqo lakho konke okwenzakalayo. Kunjalo langenhlupho esihlangana lazo, ukuze sikwazi ukuthi senzani ngohlupho ngalunye kumele silubone ngendlela uJehova alubona ngayo. Esihlokweni lesi sizaxoxa ngokuthi uJehova ufuna sizibone njani inhlupho ezisehlelayo langengozi engaba khona nxa silombono ongaqondanga ngenhlupho ezisehlelayo. Sizabona lokuthi kuyini esingakwenza nxa sesithe sehlelwa luhlupho.

KUMELE SIZIBONE NJANI INHLUPHO EZISEHLELAYO?

3. Kuyini okumele sihlale sikwazi?

³ Hlala usazi ukuthi inhlupho azisoze zikukhekheleze. Njengoba singabantu abalesono futhi siphila emhlabeni obuswa nguSathane okukhona yikuthi inhlupho azisoze zisiceze. Okunye okuphinda kungezelele yikuthi siphila ensukwini zokucina yikho nje izinto ziqhubeka zisiba zimbi kusa kwamalanga. Sehlelwa zingozi zemvelo lokunye okunengi okubangelwa ngabantu ababi. (Mat. 24:8; 2 Thim. 3:13) Kwesinye isikhathi sesingazibuza ukuthi yindaba uJehova angahle aziqede khathesi inhlupho ezikhona. Nxa ubengenza njalo bekuzakhanya angani yena loSathane bayancedisana ukubusa umhlaba lo. Okumele sikuvume nje yikuthi okwakhathesi inhlupho zikhona.—Umtshu. 9:12.

4. Kuyini okunye okwenza amaKhristu ahlukuluzwe?

⁴ AmaKhristu aphinda ahlangane lezinye inhlupho. UJesu wabatshela kanengi abafundi bakhe ukuthi babezahlukuluzwa ngenxa yokukholwa kuye. (Mat. 24:9; Joh. 16:2) Yikho ke nxa sesikubona kusenzakala akumelanga kusimangalise. (1 Thes. 3:3, 4) Kulokuthi sivumele inhlupho lezi zisiqede amandla, thina kuyabe kumele siqine kakhulu ngoba zisitshengisa ukuthi sisendleleni eyiyo. Kanti njalo, nxa singaqhubeka siqinisela siyabe sitshengisa ukuthi sisekela uJehova uMbusi wethu. Phela uSathane uthi abantu abamkhonzi ngenhliziyo yonke uJehova. Yikho uhlala ezama ngamandla wonke ukusilethela inhlupho ezitshela ukuthi nxa singahlupheka kuhlekuhle sizakhalala ukukhonza uJehova. (Jobe. 1:9-11) Kodwa nxa ungaqinisela uzamthokozisa uJehova ngoba kuyabe kukhanya ukuthi umthanda ngenhliziyo yonke.—Zaga. 27:11.

5. Sifundani kumTshumayeli 7:13, 14? (Khangela lemifanekiso.)

⁵ UJehova kavimbi zonke inhlupho. UJehova kenzi lutho olubi loba sekutheni njalo ayisuye osilingayo. (Jak. 1:13) Manje uSolomoni wayesitshoni aze athi ‘usuku lobunzima ngumsebenzi kaNkulunkulu.’? (Bala umTshumayeli 7:13, 14.) Lapha wayengatsho ukuthi uNkulunkulu nguye obangela inhlupho, ayekutsho nje yikuthi kwesinye isikhathi uNkulunkulu angekela ezinye izinto zenzakale. Manje sifundani emazwini akhulunywa nguSolomoni? Okokuqala, kumele sikwamukele ukuthi empilweni kuzakuba lezikhathi ezimnandi lezikhathi ezinzima. Yikho nxa izinto zisihambela kuhle asimbongeni uNkulunkulu ngoba zonke izinto ezinhle zivela kuye. Okwesibili, uSolomoni usikhumbuza ukuthi kasikwazi okuzakwenzakala kusasa, singavuka sithokoza kumbe sikhala. Okungasinceda nje yikuthi samukele khonokho okukhona. Phela inhlupho azikhethi, azilakuthi ulungile kumbe awulunganga.

6. Kuyini okungenza uJehova avumele ukuthi sibe phakathi kobunzima? (UHebheru 12:7, 11)

⁶ Nxa sibona inhlupho ngendlela eqondileyo sesingananzelela ukuthi ukuba sebunzimeni kungaba yisikhathi sokuthi uJehova asifundise ukumthemba. UJehova uyakubona konke okwenzakala kithi njalo uyasizwela kakhulu nxa sisebunzimeni. Lanxa singaba sebunzimeni ‘obunjengesigodi esimnyama tshu,’ uJehova uqhubeka esibambe ngesandla esipha amandla okuthi siqinisele. (Hubo. 23:4) Ukuba phakathi kwenhlupho kungasinceda lokuthi sizihlole sibone lapho okumele silungise khona ukuze sithokozise uJehova. (Bala uHebheru 12:7, 11.) Omunye owancedwa yikudlula phakathi kwenhlupho nguJobe. UJehova ayisuye owabangela inhlupho zikaJobe kodwa wazekela zabakhona, wasesebenzisa lesosikhathi ukumfundisa izifundo eziqakathekileyo. Esinye isifundo uJobe asala esibambile yikuthi kumele athobeke. (Jobe. 42:1-6) Lanxa uJehova engavumela ukuthi sibe phakathi kwenhlupho ezinzima, esiqiniseka ngakho yikuthi uyabe ezasincedisa ukuthi sihlale sithembekile kuye, ekucineni abesesipha umvuzo.—Rom. 8:35-39.

7. Kuyini okungakwenza uthokoze lanxa uhlukuluzwa?

⁷ Ungathokoza lanxa uhlukuluzwa. Nxa uhlukuluzwa ngenxa yokuthi uyakhonza ungacabangi ukuthi uJehova usekulahlile. Kahle-kahle vele ukuhlukuluzwa okunjalo kutshengisa ukuthi uyamlalela uJehova futhi yena uzakubusisa. (Mat. 5:10-12) Singahlala sikukhumbula lokhu kungabalula ukuthi lathi sithokoze njengabaphostoli abahlala bethokoza lanxa babehlukuluzwa. (Imiseb. 5:40-42) Ukuthembeka kwethu kunganceda labanye ukuthi bafunde iqiniso ngoJehova, ‘bamkhazimulise.’ (1 Phet. 2:12) UJehova kameleli ukuthi inhlupho ziqale ziphele abesekubusisa kodwa usengakubusisa ulokhe uphakathi kwenhlupho njengalokho akwenza kuJosefa.—Gen. 39:3, 23.

8. Kuyini okunye okungenza sizimisele ukuqinisela kuze kube sekucineni?

⁸ Inhlupho zizaphela. Okwenzakala kuJobe kutshengisa ukuthi inhlupho zethu zizaphela. IBhayibhili lisitshela ukuthi uJehova wambusisa kakhulu uJobe ekucineni kulasekuqaliseni. (Jobe. 42:12) Yikho kumele sikhumbule ukuthi lanxa inhlupho zingabe zisithwalise nzima khathesi, uJehova uthembisa ukuthi uzasibusisa emhlabeni omutsha ngendlela esingakaze siyibone. Kwangathi lokhu kungenza uzimisele ukuqinisela kuze kube sekucineni!—Mat. 24:13.

KUYINGOZI UKUBA LOMBONO ONGAQONDANGA

9. Kungani kuyingozi ukuba lombono ongaqondanga ngenhlupho ezisehlelayo?

⁹ Kumele sinanzelele esikucabangayo ngenhlupho esiphakathi kwazo ngoba nxa singacabanga okungayisikho sesingangezelela inhlupho esivele silazo. Okunye esingasuka sikucabange yikuthi uJehova nguye obangela inhlupho esiphakathi kwazo. UJobe laye wake wacabanga njalo kwasekusenza ukuthi acine ezibona engcono kuloNkulunkulu. (Jobe. 32:2) Omunye futhi owake wasola uJehova ngenhlupho zakhe nguNawomi. (Ruthe. 1:13, 20, 21) Ngabe uJobe loNawomi abazange batshintshe indlela ababecabanga ngayo, babengacina bekhalala ukukhonza uJehova. (Zaga. 19:3) Kodwa uJehova wabancedisa ukuthi bacabange kuhle, babone izinto ngendlela eyiyo wasebabusisa.

10. Kuyini esingasuka sikucabange nxa siphakathi kobunzima?

¹⁰ Lanxa singabe sikwazi ukuthi uJehova ayisuye obangela inhlupho esiphakathi kwazo, kwesinye isikhathi singabona angani kaselandaba lathi. Ukucabanga okunjalo kuyingozi ngoba kungasiqeda amandla. (Zaga. 24:10) Inkosi uDavida lomphrofethi uHabakhukhi bake baba phakathi kwenhlupho ezabenza bacabanga ukuthi uJehova kasayilaleli imithandazo yabo. (Hubo. 10:1; Hab. 1:2) Kodwa okuhle yikuthi kabazange bayekele ukuthandaza futhi uJehova wabaphendula waqhubeka ebancedisa. Lawe qhubeka uthandaza ngoba uJehova kasoze akulahle.—Hubo. 10:17.

11. Kungahamba njani nxa singehluleka ukubona inhlupho ngendlela eqondileyo?

¹¹ Nxa singehluleka ukubona inhlupho ngendlela eqondileyo sesingethuka nxa sezikhona ngoba siyabe sizitshele ukuthi vele akumelanga sithwale nzima. (1 Phet. 4:12) Abafundi bakaJesu abazange bamkholwe ebatshela ukuthi wayezahlukuluzwa futhi abulawe. (Luk. 18:33, 34) Lanxa uJesu wayebachasisele kuhle okwakuzakwenzakala, uPhetro wayebona angani uNkulunkulu ngeke avumele ukuthi into enjalo yenzakale. UJesu wananzelela ukuthi nxa angathatheka ngokwakucatshangwa nguPhetro wayengehluleka ukwenza intando kaJehova yikho wahle wamkhuza. (Mak. 8:31-33) Langemva kokufa kukaJesu abafundi babelokhe bengakuzwisisi okwakwenzakele. Kodwa uJesu kazange akhalale ukubancedisa ngoba wathi esevusiwe, wabachasisela kuhle ukuthi kungani kwakumele ahlupheke. (Luk. 24:25-27, 32, 44-48) Ukuhlala bekhumbula lokho uJesu ayebafundise khona kwakuzabanceda nxa labo sebehlukuluzwa. Lathi kuhle ukuthi sihlale sicabangisisa ngamavesi angasinceda nxa sesiphakathi kobunzima.

12. Ukucabanga okungayisikho ngento eyabe isenzakala kungabangelani?

¹² Kwesinye isikhathi sesingazingezelelela ubuhlungu ngokucabanga okungayisikho ngento eyabe isenzakala. UJesu wake walandisa omunye umzekeliso otshengisa ukuthi lokho kungenzakala sibili. Wakhuluma ngezinye izisebenzi ezazicaphukele umqhatshi wazo zicabanga ukuthi wayeziqilile wazipha umholo omncane. Umqhatshi watshela esinye salezo zisebenzi wathi: “Ndoda, angikonelanga lutho.” (Mat. 20:10-13) Okwacaphula izisebenzi lezi ayisikho ukuthi umqhatshi wazo wayeziqilibezele kodwa yizo nje ezazicabange into engayisiyo. Lalamuhla bakhona abafowethu labodadewethu asebeke baba lemicabango enjalo. Ngokwesibonelo, omunye angabe ecabanga ukuthi kulomsebenzi wenkonzo okumele awuthole kodwa abone qha, besekumdanisa. Kumbe omunye usengezwa kuthiwa umsebenzi abe ewenza sekumele uphiwe omunye abesebona angani kaphathwanga kuhle. Manje kuyini okungasinceda ukuthi sicabange kuhle nxa izinto zingani azisahambi kuhle?

ESINGAKWENZA NXA SESEHLELWE LUHLUPHO

13. Kuyini okungenzakala nxa sisebunzimeni?

¹³ Ungabe uwazi sibili amavesi akhuluma ngobunzima. Engxenye uyake uwasebenzise lokuwasebenzisa ududuza abanye abayabe besebunzimeni. Kodwa nxa sekukuqondile kungaba nzima ukuthi ukubone ngendlela eqondileyo okuyabe kusenzakala. Kwesinye isikhathi singacabanga ukuthi uJehova kayizwa imithandazo yethu kumbe sibone angani nguye osijezisayo. Manje kuyini ongakwenza ukuze ulubone ngendlela eqondileyo uhlupho oyabe uphakathi kwalo?

14. Kuyini ongakucela kuJehova nxa usebunzimeni? (UFiliphi 4:13)

¹⁴ Cela uJehova akuncedise. Tshela uJehova ngenhlupho zakho, umchasisele konke okucabangayo lobuhlungu ongabe ubuzwa. Nxa kukhona ofisa ukuthi akuncedise ngakho kucele, ukuqambe kunjengoba kunjalo ungakhekhelezi. Mcele akuphe umoya wakhe ongcwele ozakupha amandla lokuhlakanipha ukuze wenelise ukuqhubeka uqinisela. Kodwa ungakhohlwa ukuthi uJehova angakuphendula ngendlela ongayikhangelelanga. (Efe. 3:20) Angathuma izingilosi zakhe labafowethu labodadewethu ukuthi bakuncedise. (Hubo. 34:7) Yikho hlala uzimisele ukwamukela loba yikuphi angakuncedisa ngakho. UJehova uhlala ezimisele ukusipha umoya wakhe ongcwele osinceda ukuthi simelane laloba yiluphi uhlupho olungathutsha.—Bala uFiliphi 4:13.

15. Kuyini okuzakunceda nxa usebunzimeni? (Khangela lomfanekiso.)

¹⁵ Hlala usenza izinto ezikusondeza kuJehova. Yenza okwenelisayo lanxa kuyabe kungasalingani lalokho obujayele ukukwenza. Phela nxa uphakathi kobunzima yikho lapho okumele uhlale uzikhumbuza khona kakhulu lokho esikufundiswa nguJehova. (Hubo. 119:143) Libale izikhathi ezinengi iBhayibhili, uchwayisise futhi ucabangisise ngokubalayo. Yenza okwenelisayo ekutshumayeleni, ungene imihlangano futhi uphendule. Nxa uphakathi kohlupho ungazehlukanisi labanye kodwa zama ukuhlala useduze labafowethu labodadewethu.—Zaga. 18:1.

16. Yiphi imicabango engaqondanga ongaba layo nxa uphakathi kwenhlupho futhi ungayiqondisa njani? (U-2 Khorinte 10:4, 5)

¹⁶ Qondisa imicabango yakho. Kwesinye isikhathi nxa siphakathi kwenhlupho singacina sesicabanga izinto ezingayisizo, yikho kungadingeka ukuthi silahle imicabango engayisiyo. (Bala u-2 Khorinte 10:4, 5.) Okungasinceda ukuthi siqondise imicabango yethu, yikucabangisisa ngolwazi oluphathelane loNkulunkulu esiluthola eBhayibhilini lasemabhukwini esiwaphiwa yinhlanganiso. Ake sithi uhlupho ophakathi kwalo selukwenze wacabanga ukuthi uJehova kasakuthandi, okungakunceda yikubala ngalokho okwenzakala kumphostoli uPhawuli. Lanxa wehlelwa zinhlupho ezitshiyeneyo kazange aphele amandla kodwa lezo nhlupho zamqinisekisa ukuthi wenza okufunwa nguJehova. (2 Khor. 11:23-27) Okunye okungathwalisa umuntu nzima yikungakholwa ukuthi uJehova usemthethelele. Nxa ulohlupho olunjalo, okungakunceda yikubhala phansi amavesi atshengisa ukuthi uyathethelela. (Isaya. 43:25) Ziphe isikhathi sokuwabala amavesi lawo ucabangisise ngawo. (Hubo. 119:97) Kukhona yini okukwehleleyo okwenze wazibuza ukuthi uJehova uyabavikela yini abantu bakhe? Nxa kunjalo cabanga ucubungule futhi uchwayisise ngezinto ezikukhumbuza ukuthi kungani uJehova evumela ukuhlupheka lokuthi ubancedisa njani abantu bakhe ukuthi bahlale bethembekile. (Hubo. 91:9-12) Bala langabafowethu labodadewethu abaqhubeka bethembekile kuJehova lanxa bephakathi kobunzima.a

17. Kumele senzeni nxa siphakathi kobunzima?

¹⁷ Nxa izinto zisakuhambela kuhle, impilo imnandi, thokoza futhi umbonge kakhulu uJehova. (Umtshu. 7:14) Kodwa izinto zingathi phendu, ziqalise ukugaya ngomunye umhlathi, qaphela imicabango yakho uqhubeke umthemba uJehova. Ungakhohlwa ukuthi kungaze kube mnyama njani uJehova kasoze ehluleke ukukuncedisa ukuthi uqinisele. (1 Khor. 10:13) Kodwa-ke singabancedisa njani abafowethu labodadewethu nxa sebethe behlelwa zinhlupho? Kasixoxeni ngakho esihlokweni esilandelayo.