Themba INkosi Enkulu UJehova

1. Yiziphi inhlupho ezehlela uJobe?

ENYE INDODA okuthiwa nguJobe eyaphila kudala yafelwa ngabantwabayo bonke, yalahlekelwa yinotho yayo futhi yagula yaze yabangwa lezibi. Konke lokhu kwenza lokuthi abantu bacine bemninela khatshana. Abangane bakhe kabazange bamduduze kodwa bamkhakhatha ngamazwi ahlabayo. Umkakhe laye zamqeda amandla inhlupho lezo waze wacina etshela uJobe ukuthi athuke uNkulunkulu, azifele. (Jobe. 2:9; 15:​4, 5; 19:​1-3) Njengoba umhlaba wawusumhlanekele uJobe, kwakungabalula ukuthi acine engasamthembi uNkulunkulu kumbe akhalale ukumkhonza.

2-3. Kuyini okungenza sithandabuze ukuthi uJehova uyasithanda futhi yiziphi ezinye izifundo esizithola ebhukwini likaJobe?

² Lathi singehlelwa yibunzima obukhulu kakhulu empilweni okokuthi kungacina kusiba nzima ukuthi simthembe uJehova. Phela iBhayibhili lithi siphila ‘ezinsukwini zokucina okunzima kakhulu ukuphila kuzo.’ (2 Thim. 3:1) Nxa inhlupho zingabuya zibhabhulene singaswela lokuthi sibambe ngaphi sicine sesithandabuza lokuthi uJehova uyasithanda.

³ Nxa uyake ufikelwe ngumcabango wokuthi uJehova kasakuthandi, khumbula ukuthi lawo ngamanga aluhlaza tshoko, ungawakholwa. UJobe wazibonela ukuthi uJehova kabalahli abantu bakhe abamkhonza bethembekile. Lawe kumele umthembe uJehova futhi ungathandabuzi ukuthi uzakuncedisa. Yiziphi izifundo esizithola ebhukwini likaJobe ezizakunceda ukuthi umthembe kakhulu uJehova? Esokuqala yikuthi uJehova yiNkosi Enkulu futhi nguNkulunkulu Ophezukonke. Esesibili ngesokuthi uJehova ulamandla, akulanto engamvimba ukwenza akufunayo njalo uyenelisa ukuvikela abantu bakhe.

USATHANE WAMA PHAMBI KUKAJEHOVA

4. Ngobani ababesemhlanganweni okukhulunywa ngawo ebhukwini likaJobe?

⁴ IBhayibhili lithi: “Lafika ilanga lokuthi amadodana kaNkulunkulu weqiniso ame phambi kukaJehova, uSathane laye wangena wama lawo.” (Jobe. 1:6) Le yivesi yokuqala eBhayibhilini okusetshenziswe khona ibizo elithi Sathane. Okwenza abizwe ngebizo leli yikuthi uphikisana loNkulunkulu. UJehova wamekela uSathane waba semhlanganweni lo lanxa wayesehlamukile. Wayevele eseyisitha sikaJehova futhi ezizonda izingilosi labantu abakhonza uJehova bethembekile. Isiphrofetho esikuGenesisi 3:15 sitshengisa ukuthi uSathane wayengaseyilolunga lemuli kaJehova. Kabalwa phakathi kwemuli kaJehova yezingilosi ezithembekileyo.

5. Kuyini esikufundayo kulokho okwenzakala emhlanganweni owawusezulwini?

⁵ UJehova wayefuna sibekwazi ngokwenzakala emhlanganweni lo owawusezulwini yikho wafaka indaba yakhona eBhayibhilini. Amazwi akhulunywa nguSathane atshengisa ukuthi amanga vele yinto zakhe, ulesihluku njalo uyabazonda bonke abakhonza uJehova. (Jobe. 1:9; khangela loSambulo 12:10.) Okunye esikufundayo yikuthi uJehova uhlala ewasebenzisa kuhle amandla akhe lokuthi wahlulela ngendlela eqondileyo. Sifunda lokuthi uJehova ulamandla okuvimba ezinye izinto nxa engakhetha ukwenza njalo.

UJEHOVA ULAMANDLA AMAKHULU

6. UJehova wathini kuSathane? (UJobe 1:​7, 8)

⁶ Bala uJobe 1:​7, 8. UJehova nguye owayephethe intambo emhlanganweni lo. Wabuza uSathane wathi: “Uke wayibona yini inceku yami uJobe?” UJehova wayekwazi mhlophe ukuthi uSathane wayefuna ukuhlasela uJobe ngenxa yokuthembeka kwakhe. Khathesi asiboneni ukuthi uJehova watshengisa njani ukuthi ulamandla.

7. USathane wabasola esithini abantu? (UJobe 1:​10, 11)

⁷ Bala uJobe 1:​10, 11. UJehova nguSomandla njalo nguMbusi wendawo yonke. Ulamandla okwenza loba yini ayifunayo futhi uhlala ewasebenzisa ngendlela eqondileyo. (Jer. 32:17; Dan. 4:35) Kodwa okwakhulunywa nguSathane kwenza kwakhanya angani uJehova kawasebenzisi kuhle amandla akhe njalo uthenga abantu ukuthi bamkhonze. USathane waphinda wenza kwakhanya angani abantu kabamkhonzi ngenhliziyo yonke uJehova kodwa bamkhonzela lokho abanika khona. UJehova wayiphatha njani indaba le?

8-9. UJehova wathini kuSathane futhi kungani watsho njalo? (UJobe 1:12) (Khangela lomfanekiso.)

⁸ Bala uJobe 1:12. UJehova wavumela uSathane ukuthi alinge uJobe. Lokhu kwakuzacacisa ukuthi vele uJobe umkhonzelani uJehova. Umkhonzela ukuthi uyamthanda yini kumbe wenzela ukuthola inzuzo? Kodwa nanku uJehova akutshela uSathane: “Yena [uJobe] ungamthinti!” Zonke izingilosi ezazisemhlanganweni lo zakuzwa konke uJehova akutshela uSathane. USathane wayengelamandla okweqa imingcele ayeyifakelwe nguJehova. Lalamuhla uJehova uyenelisa ukumvimba uSathane ukuthi angenzi ezinye izinto futhi kuyabe kungelanto uSathane angayenza. UJehova wasebenzisa amandla akhe ukuze avikele uJobe futhi lokho kutshengisa ukuthi nguNkulunkulu olothando lowahlulela kuhle.

⁹ USathane wamlinga sibili uJobe kodwa kwakhanya ukuthi uyazehlulekela ngoba uJobe waqhubeka ethembekile. (Jobe. 1:22) Lanxa kunjalo, uSathane kazange akhalale.

10. Kungani uJehova wavumela uSathane ukuthi aphinde alinge uJobe? (UJobe 2:​2-6)

¹⁰ Bala uJobe 2:​2-6. USathane waphinda walinga uJobe. Kukhanya angani wayezitshela ukuthi nxa angamtshaya kahlekahle uJobe ngomkhuhlane uzahle akhalale ukukhonza. UJehova wayezayiphatha njani indaba le? UJehova wavumela uSathane ukuthi atshaye uJobe ngomkhuhlane obuhlungu kodwa wamtshela ukuthi angambulali. USathane wayengasoze ambulale uJobe ngoba uJehova wayethe angakwenzi lokho. Lalapha kuyazikhanyela ukuthi uJehova nguSomandla ngoba akulanto uSathane ayengayenza engaphiwanga imvumo nguJehova.

UJEHOVA WAMBUSISA UJOBE

11. UJehova wambusisa njani uJobe? (UJobe 42:​10-13)

¹¹ Bala uJobe 42:​10-13. UJobe waqhubeka ethembekile kuJehova lanxa uSathane wayelokhe eletha izilingo ezingapheliyo. Yikho uJehova kasazange avume ukuthi uSathane aqhubeke ehlukuluza inceku yakhe. Lalapha akulanto uSathane ayengayenza ngoba uJehova wayesekhethe ukumvikela lokumbusisa uJobe.

12. Nika isibonelo esitshengisa ukuthi uJehova uyabavikela abantu bakhe.

¹² Lakulezinsuku zokucina abantu bakaJehova bazibonele ukuthi uJehova ulamandla okuvikela izinceku zakhe. Ngokwesibonelo, ngo-1945 kulaboFakazi bakaJehova abangu-230 abakhitshwa ngamasotsha enkambeni eseGermany bahamba labo elwandle befuna ukuyababulala. Kodwa uJehova wabavikela oFakazi bonke laba. Abafowethu laba bathi indlela uJehova abavikela ngayo ibakhumbuza indlela uJehova avikela ngayo amaHebheru amathathu ayephoselwe esithandweni somlilo. Akula ngitsho loyedwa kumaHebheru amathathu owaphuma ehaqazwe ngumlilo. LaboFakazi laba baphuma ebunzimeni obukhulu kodwa ukholo lwabo lwaluqinile ngoba uJehova wabavikela. Indlela uJehova abavikela ngayo abafowethu laba abathembekileyo iphinda ifanane laleyo avikela ngayo uDanyeli ngesikhathi ephoselwe emgodini olezilwane. Ubunzima abadlula kubo benza bazimisela ukuqhubeka bekhonza uJehova bethembekile kuze kube nini lanini.—Khangela loDanyeli 3:27; 6:22.

13. Kuyini okungamelanga sikuthandabuze ngenhlupho esihlangana lazo? (Khangela lemifanekiso.)

¹³ Lathi lamuhla singahlangana lenhlupho ezinengi size sibone angathi sisemgodini olezilwane. (1 Phet. 5:​8-10) Inhlupho ezinjalo zingasiqeda amandla, sicine sikhalala ukukhonza uJehova. Ngezikhathi ezinjalo kuyabe sekumele sikhumbule indlela uJehova ancedisa ngayo uJobe. Siyakwazi ukuthi uJehova ulamandla okuqeda inhlupho zethu futhi angaziqeda khathesi nxa engakhetha ukwenza njalo. Kodwa esingakuthandabuziyo yikuthi inhlupho esidlule kuzo sizakhohlwa ngazo emhlabeni omutsha. UJehova uselibekile ilanga lapho azatshabalalisa khona umhlaba lo obuswa nguSathane.

UJEHOVA UYABATHANDA ABANTU BAKHE ABATHEMBEKILEYO

14-15. UJehova ubathembisani abantu bakhe? (UJobe 14:15) (Khangela ongaphandle.)

¹⁴ Bala uJobe 14:15. UBaba wethu osezulwini kasoze loba nini abalahle abantu bakhe abamkhonza bethembekile. Ubathanda okokuthi kabakhohlwa loba sebefile yikho ezabavusa ngelinye ilanga. Kuzabe kuyintokozo yodwa emhlabeni omutsha sesihlangabeza izihlobo labangane abavusiweyo.—Isaya. 65:17.

¹⁵ Lanxa inhlupho zikaJobe zaseziphelile waqhubeka ephila emhlabeni obuswa nguSathane. IBhayibhili lisitshela ukuthi uJehova wamelapha uJobe, wasembusisa kakhulu waze wangezelela lenotho yakhe. Le kwakuyinzwisa nje yendlela uJehova azambusisa ngayo uJobe emhlabeni omutsha. Lokhu kutshengisa ukuthi uJehova ufuna abantu bakhe bahlale bethokoza. Uthembisa ukuthi bonke abamkhonza bethembekile bazayikholisa impilo kuze kube nini lanini. (Isam. 21:​3, 4) UNkulunkulu uzasigcwalisa isithembiso lesi ngoba akulalutho olungamvimba ukuthi enze loba yini ayifunayo. Ukuhlala sikukhumbula lokhu kuzasinceda nxa siphakathi kobunzima.

16. Kuyini okwenza singathandabuzi ukuthi uJehova uzabavusa abafileyo?

¹⁶ Lanxa uJobe wacina efile, uJehova uzamvusa ngoba ulawo amandla okwenza njalo. (Dute. 32:39) UJehova uzabavusa sibili abangane bakhe ngesikhathi sakhe njalo akulamuntu ongakuvimba lokho.—Rom. 8:​38, 39.

MTHEMBE NGENHLIZIYO YONKE UJEHOVA

17. Kuyini uSathane angasoze akwenze kithi?

¹⁷ Esikufunda ebhukwini likaJobe kusinceda ukuthi simthembe kakhulu uJehova. Siyambonga kakhulu uJehova ngoba kasoze avumele ukuthi uSathane asitshabalalise. Kusegcekeni sibili ukuthi uJehova uNkulunkulu nguSomandla ngoba sikhuluma nje kulabantu abedlula 9 miliyoni abamkhonza bethembekile emhlabeni wonke. Akula ngitsho ‘lesikhali esisodwa esilungiselwe abantu bakaJehova esizaphumelela.’ (Isaya. 54:17) Banengi ohulumende abalamandla kanye labakhokheli bezinkolo abaphikisana lomsebenzi wokutshumayela owenziwa ngoFakazi bakaJehova kodwa bayazehlulekela ngoba uJehova uyabalwela abantu bakhe. Akulalutho olungavimba abantu bakaJehova ukuthi bafundise abanye iqiniso ngaye njalo bakuveze egcekeni ukuthi uSathane ulamanga njalo ngumbulali. Ngitsho lokufa asikwesabi ngoba siyakwazi ukuthi uJehova uzasivusa nxa simkhonza sithembekile.—Hos. 13:14.

18. Kungani kungamelanga silesabe elakusasa?

¹⁸ Ukucabangisisa ngalokho okwenzakala empilweni kaJobe kuzasinceda ukuthi simthembe kakhulu uJehova kungelani lokuthi sihlangana laziphi inhlupho. Ngesikhathi sokuhlupheka okukhulu, uSathane labantu bakhe bazacabanga ukuhlasela abantu bakaJehova bezitshela ukuthi kabavikelekanga. Kodwa uJehova uzabavikela abantu bakhe njengoba nje wavikela inceku yakhe uJobe. Akusensuku ngaki ukuthi uJehova aqede konke ukuhlupheka okubangelwe nguSathane. USathane lamadimoni akhe bazabotshwa okweminyaka eyinkulungwane. (Luk. 8:31; Isam. 20:​1-3) Ngemva kwalokho, uSathane labo bonke abamsekelayo bazatshabalaliswa. (Isam. 20:10) Siyabe sesigcwalisekile sibili isiphrofetho esakhulunywa nguJehova.—Gen. 3:15; Rom. 16:20.

19. UJehova usithembisani? (Khangela lomfanekiso.)

¹⁹ Sikulindele ngabomvu sibili ukuphila emhlabeni omutsha sesingaselasono. Sizaswela lokuthi sizifake ngaphi izibusiso esizaziphiwa nguJehova. Phela uthi: “Khangela! Ngenza izinto zonke zibe zintsha.” (Isam. 21:5) Kutshoni khonalokho? Kutsho ukuthi inhlupho zabantu zonke ziyabe seziphelile Njengoba uSathane lamadimoni akhe bayabe bengasekho. Sizalala behle ngoba akula ngitsho lokukodwa okuzabe kusikhathaza. UJehova uzavusa abantu abafileyo, lesono sizabe silokhe sikhitshwa ebantwini kancane kancane. Ekucineni inhloso yakhe izagcwaliseka!

20. Kuyini ozimisele ukukwenza?

²⁰ Njengoba silokhe siphila emhlabeni obuswa nguSathane, iqiniso yikuthi inhlupho kazisoze zisiceze. Kodwa sizimisele ukuhlala sikhonza uJehova lokuqhubeka sisekela ubukhosi bakhe. Sizimisele ukuphila ngendlela etshengisa ukuthi siyamthanda uJehova lokutshengisa ukuthi uSathane ngusomangase. Siyakwazi ukuthi iNkosi yethu enkulu uJehova, izababusisa bonke abaqhubeka bemkhonza bethembekile.