Ungathikazi Ukubhabhathizwa

1. (a) Kungani kuqakathekile ukuthi sibhabhathizwe? (b) Sizaxoxa ngani esihlokweni lesi?

SOWAZINIKELA kuJehova njalo wabhabhathizwa yini? Nxa kunjalo kutsho ukuthi sowatshengisa ukuthi uyafuna ukuthi uJehova akuthethelele njalo uzimisele ukumkhonza ulomzwangedwa ohlanzekileyo. (1 Phet. 3:21) Kunengi kakhulu abangakabhabhathizwa abangakufunda kuwe futhi awusoze wafa wazisola ngesinqumo sakho. Nxa kuyikuthi awukabhabhathizwa asithandabuzi ukuthi lawe uyamthanda uJehova futhi uyafuna ukwenza intando yakhe. Phela wonke umuntu ofuna ukuthethelelwa izono njalo akhonze uJehova elomzwangedwa ohlanzekileyo kumele abhabhathizwe. (Imiseb. 2:​38-40) Kodwa kuyini okungakunceda nxa kuyikuthi uyathikaza kumbe uyesaba ukubhabhathizwa? Esihlokweni lesi sizaxoxa ngokuthi kuyini okwenza abanye abantu bathikaze ukubhabhathizwa. Sizabona lokuthi ukukhumbula ukuthi umhlaba lo obuswa nguSathane ususeduze ukuthi utshabalaliswe kuzakunceda njani. Ngemva kwalokho sizahlola ukuthi kungani kuqakathekile ukuthi ungaphuzi ukubhabhathizwa.

KUYINI OKWENZA ABANYE BATHIKAZE UKUBHABHATHIZWA?

2. Kuyini okwenza abanye bathikaze ukubhabhathizwa?

² Okwenza abanye bathikaze ukubhabhathizwa yikwesaba. Lanxa befuna sibili ukumkhonza uJehova, babona angani ngeke benelise ukumthokozisa. Nxa lawe ungomunye wabo, okuzakunceda yikubala amavesi atshengisa ukuthi uJehova kakhangelelanga ukuthi wenze okungaphezu kwamandla akho, kodwa uthokoziswa yikukubona usenza lokho okwenelisayo. (Hubo. 103:​13, 14; Kol. 3:23) Ungenzani nxa kuyikuthi wesaba ukuthi uzahlukuluzwa ngabanye nxa usukhethe ukukhonza uJehova? Kuyabe kumele uthandaze kuJehova ucele ukuthi akunike isibindi. Omunye umhubi owayethemba uJehova wabhala wathi: “UJehova ulami, angisoze ngesabe. Umuntu angangenzani?”—Hubo. 118:6.

3. Kuyini okunye okwenza abanye bathikaze ukubhabhathizwa? (Khangela lomfanekiso ongaphandle.)

³ Abanye bayathikaza ukubhabhathizwa ngoba bacabanga ukuthi kulutshwana abakwaziyo ngoJehova. Kanti vele umuntu kumele abe lolwazi olunganani ukuze abhabhathizwe? Ake sixoxe ngokunye okwenzakala kudala. Ngesikhathi umphostoli uPhawuli loSila bebotshiwe, uJehova wenza ukuthi kube lokuzamazama komhlaba, wasebakhulula. Ngalobobusuku batshumayeza umlindijele labemuli yakhe. Abantu laba bazwisisa ukuthi isimanga leso sasenziwe nguJehova, basebefunda okunengi ngaye langoJesu Khristu futhi ngemva kwalokho “bahle babhabhathizwa.” (Imiseb. 16:25-33) Nxa kuyikuthi uyamazi uJehova, umthanda ngenhliziyo yonke, usukwazi lokho okufundiswa liBhayibhili, usuphendukile ezonweni zakho futhi uzimisele ukuphila ngendlela efunwa nguJehova kutsho ukuthi usungabhabhathizwa.—Mak. 12:30.

4. Kuyini abanye abakwesabayo? (Khangela lomfanekiso.)

⁴ Abanye bayafuna sibili ukubhabhathizwa kodwa bacabanga ukuthi ukuba nguFakazi yinto abangeke bayenelise. Khona kuqakathekile sibili ukuthi umuntu aqale acabangisise engakenzi isinqumo. (Luk. 14:​27-30) Kodwa abanye basuka bakhathazeke kakhulu ngezinto okuzamele bazitshintshe ukuze bakhonze uJehova. Lokhu yikho okwenzakala komunye udadewethu okuthiwa nguCandace owafunda ngoJehova esesengumntwana kodwa kazange akusebenzise lokho ayekufunda. Wathi esekhulile waqalisa futhi ukufunda iBhayibhili. Uthi: “Ngangikwazi sibili okumele ngikwenze kodwa kwakunzima ukuthi ngitshiye ezinye izinto lanxa ngangikwazi ukuthi azimthokozisi uJehova.” Abanye besaba ukuthi ngelinye ilanga bazakwenza isono esikhulu besebesuswa ebandleni. Manje ungenzani nxa kuyikuthi lawe yikho okwesabayo?

5. Kuyini okunye okunganceda umuntu othikaza ukubhabhathizwa? (UMathewu 13:​44-46)

⁵ Nxa umuntu efuna ukuthenga ulutho oluthile akumelanga akhangele ukuthi uzakhipha malini kuphela. Kodwa kumele acabange langokuthi into yakhona izamnceda njani. Nxa into leyo iqakathekile umuntu kasoze athikaze ukuyithenga kungelani lokuthi uzehlukana lemali enganani. Kunjalo langomuntu ofuna ukubhabhathizwa, kumele acabange ngokuthi ukuba ngumngane kaJehova kuqakatheke kangakanani kulokuzikhathaza ngezinto okumele azitshintshe empilweni. Ake sixoxe ngemizekeliso kaJesu emibili eyicacisa kuhle indaba le. (Bala uMathewu 13:​44-46.) Amadoda asemizekelisweni le asuka ayathengisa yonke into ayelayo ukuze athenge amagugu ayesewatholile. Lawe usulazi iqiniso elimayelana loMbuso kaNkulunkulu futhi lelo ligugu okumele uliqakathekise. Ukucabangisisa ngemizekeliso le eyakhulunywa nguJesu kuzakunceda kakhulu nxa kuyikuthi uyathikaza ukubhabhathizwa. Nansi imibuzo ongazibuza yona: ‘Ngiyaliqakathekisa yini iqiniso esengilifundile? Ubungane bami loJehova ngibubona buligugu yini? Ngiyambonga yini uJehova ngethemba anginike lona? Ngiyabaqakathekisa yini abafowethu labodadewethu? Izimpendulo zemibuzo le zizakunceda ukuthi ubhabhathizwe kumbe ulungise lapho osilela khona.

6. Kuyini okuzakunceda ukuthi ukusebenzise lokho okufundayo?

⁶ Emzekelisweni womlimi, uJesu wachasisa ukuthi abanye abantu babezazizwa sibili izindaba ezinhle kodwa babengasoze bakwenze lokho abakufundayo. Ikanti abanye babezazamukela ngenhliziyo yonke izindaba ezinhle besebesenza lokho abakufundileyo. (Luk. 8:​5-15) Nxa kuyikuthi uzwa kungatsho ukuthi usebenzise lokho okufundayo, ungakhalali. UJehova uyafuna ukukuncedisa ukuze wenelise ukumlalela. Yikho thandaza kuye umcele ukuthi akuncedise ukuthi ulithande iqiniso njalo ukusebenzise lokho okufundayo.—Hez. 18:31; 36:26.

7-8. Kuyini okungabe kubangela abanye abasakhulayo ukuthi bangabhabhathizwa? (Khangela lomfanekiso.)

⁷ Abanye abasakhulayo bayabe bemthanda sibili uJehova kodwa bacina bengasabhabhathizwanga ngenxa yokuyengwa ngabanye. Ngokwesibonelo, abanye ababalisi batshela abantwana ukuthi bangazihluphi ngokulandela imthetho kaNkulunkulu kodwa baziphilele ngendlela abayifunayo. Kodwa nxa ungalalela khonokho abakutshoyo ungazithela emanyaleni. (Hubo. 1:​1, 2; Zaga. 7:​1-5) Zimisele ukulingisela umhubi owatshela uJehova wathi: “Ngilokuqedisisa ukwedlula bonke abangifundisayo ngoba ngiyacabangisisa ngezikhumbuzo zakho.”—Hubo. 119:99.

⁸ Kukhanya angani abanye abazali abangoFakazi yibo abenza abantwababo bacine bethikaza ukubhabhathizwa. Bangabe bebakhuthaza ukuthi baqine ngemfundo lokudinga imisebenzi elemali kulokuthi babakhuthaze ukwenza izinto ezizabanceda ukuthi babe ngabangane bakaJehova. Nxa ungosakhulayo cela abazali bakho bakuncedise ubone izinto ongazenza ukuze usondele kuJehova. Ungaba ngumngane kaJehova kungelani lokuthi uleminyaka emingaki.—Zaga. 20:11.

9. Kuyini okunye okungenza abanye baphuze ukubhabhathizwa?

⁹ Abanye bayaphuza ukubhabhathizwa bemelele ukuthi baze babhabhathizwe langalinye labangane babo. Khona akukubi ukufuna ukubhabhathizwa lomngane wakho kumbe isihlobo sakho. Kodwa yikho yini osekungakuphuzisa ukubhabhathizwa? Okumele uhlale ukukhumbula yikuthi nxa usufuna ukubhabhathizwa uyabe uzinikela kuJehova hatshi komunye umuntu. Akumelanga uzihluphe ngokuthi abanye abantu benzani.—Rom. 14:12.

UKUPHELA SEKUSEDUZE

10. Kuyini okunye okwenza abanye bathikaze ukubhabhathizwa?

¹⁰ Abanye ngabazitshela ukuthi isikhathi sisesekhona, okokubhabhathizwa bazaphela bakubone. Kodwa ukucabanga njalo yikuziyenga. Phela uJesu waxwayisa abafundi bakhe wathi: “Hlalani lizilungiselele ngoba iNdodana yomuntu izakuza ngehora elingalicabangeliyo.”—Luk. 12:40.

11. Kumele siyibone njani imithetho kaJehova? (IHubo 119:160)

¹¹ Okwenza umuntu azinikele kuJehova futhi abhabhathizwe yikuthi uyabe emthanda futhi ezimisele ukumlalela. (Bala iHubo 119:60.) Ukucabangisisa ngalokho okwakhulunywa ngumfundi uJakhobe kuzasinceda ukuthi singabalisi kodwa sizimisele ukwenza intando kaJehova khathesi. Ikusasa alaziwa, yikho nxa usukwazi okuqondileyo kwenze.—Jak. 4:​13-17.

12. Sifundani emzekelisweni kaJesu?

¹² Usawukhumbula yini umzekeliso kaJesu owendoda eyaqhatsha abantu ukuthi basebenze ensimini yayo yamagilebisi? Emzekelisweni lo uJesu wathi zonke izisebenzi zathola imali elinganayo kungelani lokuthi zazisebenze okwesikhathi esinganani. Kanti vele kuyini okwenza ezinye izisebenzi zabuya abanye sebezatshayisa? Ayisikho ukuthi abantu laba babengamavila kodwa babeswele umuntu owayengabaqhatsha. Bathi sebewutholile umsebenzi bahle bayasebenza. (Mat. 20:​1-16) Lathi lamuhla uJesu usinike umsebenzi oqakathekileyo wokutshumayela izindaba ezinhle zoMbuso. Njengoba sesikwazi ukuthi uJesu ufuna izisebenzi kumele sihle singene emsebenzini singaphozisi amaseko.

13. Sifundani kulokho okwenzakala kumkaLothi?

¹³ Abanye ngabazitshela ukuthi bazatshintsha nxa sebebona ukuthi umhlaba omutsha ususeduze. Kodwa kumele ukhumbule ukuthi ungahlala isikhathi eside kakhulu ungabhabhathizwanga kungacina kusiba nzima ukuthi utshintshe. LoJesu wayekwazi lokho, yikho waxwayisa abafundi bakhe wathi: “Khumbulani umkaLothi.” (Luk. 17:​31-35) Lanxa wayekwazi mhlophe ukuthi kwasekuseduze ukuthi uJehova abhubhise amadolobho eSodoma leGomora kukhanya angani kwabanzima ukuthi afulathele inotho yakhe. (Gen. 19:​23-26) Indaba le itshengisa ukuthi khathesi yiso isikhathi sokutshintsha, ithuba lisesekhona. Nxa uJehova angavele athi sekwanele, lelothuba liyabe lingasekho.—Luk. 13:​24, 25.

14. Kuzakunceda ngani ukucabangisisa ngeziphrofetho ezimayelana lensuku zokucina?

¹⁴ Iziphrofetho esizibona zigcwaliseka khathesi zitshengisa ukuthi siphila ensukwini zokucina. Lanxa kungayisizo zonke iziphrofetho ozazibona zigcwaliseka, iqiniso yikuthi izinto lezi ziyenzakala ezindaweni ezitshiyeneyo. Ukucabangisisa ngokugcwaliseka kweziphrofetho lezi kuzakwenza uzimisele ukubhabhathizwa. Umphostoli uPhetro watshela amaKhristu ukuthi ahlale ‘ephapheme’ ngoba ukuphela kwezinto zonke kwasekusondele. (1 Phet. 4:7; amabala angaphansi.) Kukhanya angani lapha uPhetro wayekhuluma ngokubhujiswa kweJerusalema. Njengoba amaKhristu la ayengahlali eJerusalema ayezaphonguzwa ngamahungahunga ukuthi iJerusalema yayisibhujisiwe. (1 Phet. 1:1) Kodwa ukuzwa ukuthi isiphrofetho leso sasesigcwalisekile kwakuzanceda amaKhristu la ukuthi angathandabuzi ukuthi uJehova wayezazigcwalisa lezinye iziphrofetho zakhe. Njengoba lawe ubona iziphrofetho eziseBhayibhilini ezikhuluma ngezinsuku zokucina zigcwaliseka, kumele uhle uzimisele ukubhabhathizwa.

15. Singenzani ukuze sihlale sikhumbula usuku lukaJehova. (U-2 Phetro 3:​10-13)

¹⁵ Encwadini yakhe yesibili umphostoli uPhetro wakhuluma ngalokho esingakwenza ukuze sitshengise ukuthi silulindele usuku lukaJehova. Ngalesosikhathi amaKhristu ayengacabanga ukuthi usuku lolu lukhatshana kakhulu kodwa uPhetro wawatshela ukuthi aqhubeke elulindele futhi elukhumbula. (Bala u-2 Phetro 3:​10-13.) Esikwenza khathesi yikho okuzatshengisa ukuthi silulindele kangakanani usuku lukaJehova. Kumele siziphathe ngendlela etshengisa ukuthi sizinikele kuNkulunkulu. UJehova uzathokoza kakhulu nxa ungazinikela kuye njalo ubhabhathizwe!

UNGAPHOZISI AMASEKO

16. Kumele ulungiselele nini ukubhabhathizwa? (U-2 Khorinte 6:​1, 2) (Khangela lomfanekiso.)

¹⁶ Lesi yiso kanye isikhathi sokulungiselela ukubhabhathizwa. (Bala u-2 Khorinte 6:​1, 2.) Indoda engumTopiya eyatshunyayezwa nguFiliphu yahle yazwisisa ukuthi kwasekumele ibhabhathizwe. Kayizange itshone isithi, ‘Kunengi okusamele ngikufunde, ngizabhabhathizwa ngelinye ilanga. Angithi vele amanzi awapheli.’ Yona yabuza uFiliphu yathi: “Kuyini okungivimbela ukuthi ngibhabhathizwe?” (Imiseb. 8:​26, 27, 35-39) Indoda le yathi sibhabhathiziwe “yaqhubeka ngohambo lwayo ithokoza.” Lawe ungenelisa ukwenza lokho okwenziwa yindoda le.

17. UJehova uzakuncedisa njani?

¹⁷ Nxa kuyikuthi uyathikaza ukubhabhathizwa, hlala ukhumbula ukuthi uJehova uyafuna ukukuncedisa ukuthi ube ngumngane wakhe. (Rom. 2:4) Uzakuncedisa nxa usesaba kumbe nxa ucabanga ukuthi awusoze wenelise ukuphila ngendlela ayifunayo lalapho uhlukuluzwa ngabanye. Ukubhabhathizwa kuzakunceda ukuthi ube lomzwangedwa ohlanzekileyo futhi awusoze uzikhathaze ngezinto owazitshiya emuva. (Flp. 3:​8, 13) Lawe uyabe uzakholisa ukuthola izibusiso ezizatholwa yilabo abazinikele kuJehova njalo babhabhathizwa.—Imiseb. 3:19.