Lungiselela Inhlupho Ezizakwehlela Nxa Usubhabhathiziwe

1-2. Kuyini okuzasinceda ukuthi singawi ekukhonzeni? Nika umzekeliso.

SIKWAZI mhlophe ukuthi njengoba siphila emhlabeni lo obuswa nguSathane inhlupho kazisoze zisikhekheleze. UJesu wakwenza kwacaca ukuthi labo abafuna ukuba ngabalandeli bakhe bazahlangana lenhlupho ezinengi. (Mat. 18:7) Yikho kufanele sihlale sikulindele lokhu ngoba ezinye inhlupho zingabangelwa ngabanye esikhonza labo.

² Lezinsuku izingozi zemvelo zihlala zisenzakala, yikho inhlanganiso kaJehova isikhuthaza ukuthi sihlale silungiselele. Manje singalungiselela njani? Okokuqala esingakwenza yikukhangela ukuthi yiziphi izingozi ezingenzakala lapho esihlala khona. Lokhu kuqakathekile ikakhulu nxa usanda kufika endaweni. Nxa sesibonile ukuthi yiziphi izingozi ezingasehlela kuzakuba lula ukuthi silungiselele ngoba siyabe sesikwazi okumele sikwenze. (Zaga. 21:5) Lokhu kufanana lalokho okumele kwenziwe ngumuntu osefuna ukuba nguFakazi. Kumele abekwazi ukuthi yibuphi ubunzima angahlangana labo nxa esebhabhathiziwe. Ukwazi lokho kuzamnceda ukuthi ahlale elungiselele ukuze angawi nxa esehlangana lobunzima. (Hubo. 17:5) Esihlokweni lesi sizaxoxa ngezinto ezintathu ezijayele ukuhlupha abanye nxa sebebhabhathiziwe. Sizabona lokuthi kuyini okuzasinceda sihlale silungiselele.a

NXA UNGAKHUTSHWA NGOMUNYE EBANDLENI

3. Kuyini okungenzakala ebandleni?

³ Usalikhumbula yini ilanga owaqala ukungena ngalo imihlangano yaboFakazi bakaJehova? Kufanele ukuthi wazibonela ukuthi abantu laba bayathandana futhi bakhonza uJehova ngendlela ayamukelayo. (Joh. 13:35; Kol. 3:12) Omunye udadewethu okuthiwa nguBlancab laye wathaba eqala ukungena imihlangano laboFakazi bakaJehova. Kodwa wathi esebhabhathiziwe kwenzakala okunye ayengakulindelanga. Uthi: “Omunye udadewethu wangikhuba futhi ngananzelela ukuthi wayelomkhuba wokukhuluma kubi ngabanye ebandleni. Ngangingakukhangelelanga lokhu ngoba mina ngangifunde ukuthi oFakazi bakaJehova bayathandana futhi balokuthula.” Abantu bakaJehova bayalwisa sibili ukuthi benze okuqondileyo, kodwa akumelanga sikhohlwe ukuthi balesono. (Efe. 4:​23, 24; 1 Joh. 1:8) Ukhona phakathi kwabantu bakaJehova ozakwenza loba akhulume into ezakuzwisa ubuhlungu. (Jak. 3:8) Kuyadanisa ukuthi abanye bengakhutshwa ngomunye ebandleni bahle bakhalale ukukhonza uJehova.

4. Kuyini okungakunceda ukuthi uthethelele abanye? (U-Efesu 4:32)

⁴ Manje kuyini ongakwenza khathesi ukuze ungakhalali ukukhonza uJehova nxa omunye ebandleni angakukhuba kumbe akuzwise ubuhlungu? Hlala ucabangisisa ngalokho esikutshelwa nguJehova ku-Efesu 4:32. (Bala.) Nxa ulomusa futhi ubazwela abanye uzazama ukubalekela loba yini engadala ingxabano. Hlala uzimisele ukuthethelela loba ngubani ongakuphambanisa. Nxa kukuthwalisa nzima ukuthethelela abanye cabanga ngokuthi umonela kangaki uJehova uphinde uzibuze lokuthi usumcele kangaki ukuthi akuthethelele. (Mat. 6:12) Nxa ungananzelela ukuthi uJehova usekuthethelele kanengi kangakanani kuzabalula ukuthi ubathethelele ngenhliziyo yonke abanye.

5. UZaga 19:11 angakunceda njani? (Khangela lemifanekiso.)

⁵ Bala iZaga 19:11. IBhayibhili lithi ukuzwisisa kuzasinceda ukuthi singavuki ngolaka nxa omunye angasinyathela ikhonzi. Ivesi le incede omunye udadewethu okuthiwa nguRima osanda kubhabhathizwa. Uthi: “Nxa omunye umuntu engangizwisa ubuhlungu ngihle ngikhumbule amazwi akuZaga 19:11. Ngijayele ukuzibuza ukuthi kuyini okungabe kwenze umuntu lo wenza kumbe wakhuluma ngendlela enje. Ngiyazama lokuhamba laye ekutshumayeleni futhi lokhu kuyanginceda ukuthi ngimzwisise ngcono ukuthi ungumuntu onjani.” Nxa lawe ungazinika isikhathi sokuthi ubebazi ngcono abafowenu lodadewenu kuzabalula ukuthi ubathethelele ngenhliziyo yonke nxa bengakuphambanisa.

6. Kuyini okuzasinceda ukuthi sibathande abafowethu labodadewethu?

⁶ Okunye okuzakunceda yikubona okuhle okwenziwa ngabafowenu labodadewenu. (Khangela uZaga 10:12; Rom. 12:10; Flp. 2:​2, 3) Lokhu yikho kanye okwanceda omunye umfowethu okuthiwa nguMark owayesanda kubhabhathizwa. Njengoba wayesetshona labafowethu lodadewethu wacina esenanzelela ukuthi labo bayawenza amaphutha. Manje kuyini okwamnceda ukuthi aqhubeke ekhonza uJehova njalo ebathanda abanye ebandleni? Uthi: “Ngiyalwisa ukubona okuhle okwenziwa ngabafowethu labodadewethu. Khonokho kuyanginceda ukuthi ngingabazondeli nxa kungaba lezinto ezincane abaziphambanisayo. Iqiniso yikuthi abafowethu labodadewethu bayazama ukwenza okuthokozisa uJehova lanxa bewenza amaphutha. Batshiyene sibili labantu bomhlaba lo.” Nxa lawe ungaqhubeka ubona okuhle okwenziwa ngabafowenu labodadewenu uzaqhubeka ubathanda.

NXA USUKHUMBULA OWAKUTSHIYA EMUVA

7. Kuyini okungenza umuntu acine esekhumbula izinto azitshiyayo?

⁷ Kumele ukuthi wathokoza kakhulu ngesikhathi uzinikela kuJehova ngoba wawusuwufulathele umhlaba kaSathane. Kodwa kungenzakala yini ukuthi umuntu aphinde acabange ngokubuyela emhlabeni kaSathane? Ye! Khonokho kungenzakala ikakhulu nxa umuntu esephakathi kobunzima akade engabukhangelelanga. (Khangela amaNani 11:​4-6.) Ngokwesibonelo, abanye abafowethu labodadewethu batshiya imisebenzi ezwayo ngoba basebebona ukuthi isibaphambanisa ekukhonzeni. Abanye batshiya imikhuba engamthokozisiyo uJehova. Ikanti abanye balahlwa ngabangane babo ngoba basebekhethe ukukhonza uJehova. Abanye ngabathi nxa bengehlelwa yibunzima besebebona kungcono ukuthi babuyele empilweni yabo yakudala. Ubona angani uJehova angezwa njani nxa usubuyelela izinto lezo owawusuzilahlile? Kuyini okungakunceda ukuthi ungabuyeli emuva?

8. Ufundani ku-Abrahama loSara?

⁸ IBhayibhili lisitshela ngabanye abantu okwakungabalula ukuthi babuyelele izinto ababezitshiye emuva. Ngokwesibonelo, u-Abrahama loSara batshiya idolobho le-Uri elalivikelekile bayahlala ematendeni. (Heb. 11:​8, 9) Kumele ukuthi babeke bakhumbule ukuthi impilo yayimnandi njani besahlala e-Uri. Kodwa “aluba babehlala bekhumbula” indawo ababesuke kuyo lokuthi impilo yabo yayimnandi njani ngalezonsuku babezacina bebuyela. Manje kuyini okwabancedayo? Yikuhlala becabanga ngalokho uJehova ayebathembise khona.—Heb. 11:​15, 16.

9. UPhawuli wazisola yini ngesinqumo asenzayo? (UFiliphi 3:​7, 8, 13)

⁹ Zinengi izinto ezatshintshwa ngumphostoli uPhawuli empilweni yakhe ukuze akhonze uJehova. Phela wayewazi kuhle umthetho wamaJuda ngoba wayefundiswe nguGamaliyeli, umfundisi owayehlonitshwa kakhulu. (Imiseb. 22:3) Aluba uPhawuli waqhubekela phambili ngemfundo wayezakuba ngumuntu odumileyo ekholweni lwesiJuda. (Gal. 1:​13, 14) Kodwa uPhawuli wathi esefunde ngoJesu watshiya konke. Kambe ukuthi impilo yakhe esengumKhristu yayihlala itshelela yini? Ngitsho lakancane! Phela wayeke etshaywe, abotshwe futhi abantu bakibo babemzonda. (2 Khor. 11:​23-26) Aluba wazikhathaza kakhulu ngenhlupho ezazimehlela wayezazisola ngokuba ngumKhristu, acine ecabanga ukuthi impilo ayeyiphila kuqala yayingcono. Kodwa yena kenzanga njalo. Wayehlala ecabanga ngesibusiso esikhulu sokuba ngumlandeli kaKhristu lezinye izibusiso ayezazithola. Wayekwazi mhlophe ukuthi loba yini ayeyitshiyile ukuze akhonze uJehova yayingaqakathekanga.—Bala uFiliphi 3:​7, 8, 13.

10. Kuyini okumele uhlale ukukhumbula? (UMakho 10:​29, 30) (Khangela lemifanekiso.)

¹⁰ Manje wena ungamlimgisela njani uPhawuli? Nxa usucabanga ngezinto owazitshintshayo empilweni yakho ukuze ube ngumKhristu kumele uhle ucabange lokuthi kuyini okwakwenza watshintsha. (Umtshu. 7:10) Kulokuzihlupha ngalokho owakutshiya emuva, cabanga ngezibusiso olazo khathesi. Esinye isibusiso esikhulu olaso yikuba ngumngane kaJehova uNkulunkulu. (Zaga. 3:32) Khathesi usulabafowenu labodadewenu abakuthandayo abasemhlabeni wonke. (Bala uMakho 10:​29, 30.) Cabanga nje ngekusasa elihle uJehova akuthembisa lona! (Isaya. 65:​21-23) Ukuhlala ukhumbula ngezibusiso zonke lezi kuzakunceda ungabuyeli ezintweni owazitshiyayo.

11. Okwenzakala kuRosemary kukufundisani?

¹¹ Udadewethu okuthiwa nguRosemary wabhabhathizwa esesiyabamba iminyaka engu-50. Manje kuyini okwamnceda ukuthi angabuyeli ezintweni ayezenza engakafundi ngoJehova? Uthi: “Zazidlula nzima insuku zeKhisimusi ngoba yinto engasengilesikhathi eside ngiyikholisa lemuli yami. Phela ngensuku lezo wawuthola abantwabami labazukulu bethe gwaqa bevula izipho engangiyabe ngibathengele zona.” Manje kuyini okwanceda udadewethu ukuthi angahawukeli ukudlala iKhisimusi? Uqhubeka esithi: “Khathesi kangisameleli u-25 December ukuthi ngize ngihlangane lezihlobo zami kanye labantwabami kodwa sesikwenza nje ngitsho laphakathi kwesikhathi. Ngiyabanika izipho engiyabe ngibathengele zona ngiphinde ngibakhumbuze ukuthi ngiyabathanda kakhulu.” Udadewethu lo waphinda wahlangana lobunye ubunzima ngoba wathi esanda kuba nguFakazi abangane bakhe bamfulathela. Lokhu kwakusenza abe lesizungu.c Manje kuyini okwamncedayo? Yikuya ekutshumayeleni labodadewethu abatshiyeneyo. Uthi: “Lokhu kwanginceda ngathola abangane abangithandayo labalendaba lami.” Okwenzakala kudadewethu lo kukufundisani? Isizungu ungaba laso sibili, uzikhumbule zonke izinto owawuzenza ungakabi nguFakazi kodwa okungakunceda yikukhumbula ukuthi kunengi ongakwenza khathesi okuzakwenza uthokoze. (Flp. 4:​8, 9) Ungakhohlwa lokuthi indlela uJehova akubusisa ngayo yedlula khatshana loba yini owayitshiyayo ukuze umkhonze.

NXA ABANYE BANGATSHIYA UJEHOVA

12. Kuyini okungenzakala ebandleni okungakudanisa?

¹² Kufanele ukuthi wathokoza kakhulu ngesikhathi usiba nguFakazi ngoba wawusuphila ngendlela ethokozisa uJehova. (Isaya. 65:14) Lanxa kunjalo kumele uhlale ukhumbula ukuthi sonke silesono. Yikho akumelanga kukwethuse ukuzwa ukuthi kulomunye owenze isono esikhulu wasesuswa ebandleni. (1 Khor. 5:13) Lokhu kwake kwenzakala komunye udadewethu okuthiwa nguSamar. Uthi: “Ngisanda kubhabhathizwa omunye umdala ebandleni wenza isono esikhulu wasesuswa. Ngasala ngingelankani ngoba ngangingakholwa ukuthi umdala angonela uJehova aphinde azwise lebandla ubuhlungu.” Asithandabuzi ukuthi abafowethu labodadewethu bayamthanda uJehova njalo bayafuna ukumthokozisa. (1 Khor. 13:4, 7) Kodwa kuyadanisa ukuthi umnyaka ngamunye bakhona abamtshiyayo. Lokhu kungakudanisa kakhulu nxa kuyikuthi lowomuntu yisihlobo, ngumngane loba ngomunye umuntu obumhlonipha kakhulu.

13. Singenzani ukuze singabhazalali ekukhonzeni nxa omunye umuntu angatshiya uJehova?

¹³ Kuyini ongakwenza khathesi ukuze ungabhazalali ekukhonzeni nxa umuntu omthandayo esetshiye uJehova? Yenza konke okwenelisayo ukuze uqinise ubungane bakho loJehova. (Jak. 4:8) Kumele uhlale ukhumbula ukuthi wazinikela kuJehova hatshi komunye umuntu. Siyakukholisa sibili ukukhonza uJehova silabafowethu labodadewethu kanye lezimuli zethu kodwa umuntu ngamunye kumele ahlale ethandaza njalo ebala iBhayibhili ukuze aqinise ukholo lwakhe.—Hubo. 1:2; 62:8.

14. Sifundani kulokho okwenziwa ngumphostoli uPhetro? (UJohane 6:​66-68)

¹⁴ Kunengi esingakufunda kulokho okwakhulunywa nguPhetro ngesikhathi abanye sebekhalele ukulandela uJesu. Kungenzekala ukuthi uPhetro laye wayengakuzwisisi lokho okwakukhulunywe nguJesu. Lanxa kunjalo yena akazange akhalale ukulandela uJesu. (Bala uJohane 6:​66-68) UPhetro kazange alingisele abantu ababengelakholo kodwa wanamathela kulokho uJesu ayemfundise khona. Lawe ungathatheki ngezinto ezenziwa ngabanye abantu ubusutshiya inhlanganiso le ekufundise ngoJehova. Ligagadlele lingakuphunyuki iqiniso osulifundile njalo uhlale uthembekile kuJehova. Udadewethu okuthiwa nguSamar esike sakhuluma ngaye uthi: “Ngihlala ngizikhumbuza ukuthi ukuphambanisa komuntu oyedwa akutsho ukuthi wonke umuntu enhlanganisweni unjalo futhi lokho akutshintshi ukuthi uJehova unguNkulunkulu weqiniso.”

15. Sifundani kulokho okwenzakala ku-Emily?

¹⁵ Ake sixoxe ngokunye okwenzakala komunye udadewethu okuthiwa ngu-Emily. Eleviki nje ebhabhathiziwe, unina wasuswa ebandleni njalo watshiya lemuli yakhe. U-Emily uthi: “Ngangingakaze ngiphuphe ngitsho langaliphi ilanga ukuthi umama wayengavuka efulathele uJehova. Into le yangizwisa ubuhlungu kakhulu. Ngiyamkhanuka umama.” Manje kuyini okuncede u-Emily? Uthi: “Ubaba uyangithanda kakhulu njalo wenza konke akwenelisayo ukuze angincedise. Ngiyababonga kakhulu abafowethu labodadewethu abasebandleni ngoba bayangithanda. Bayimuli sibili kimi. Wonke umuntu ulenhlupho ahlangana lazo, yikho kuqakathekile ukuthi siqinisane njalo sikhuthazane.” (1 Phet. 5:9) Khathesi yisikhathi sokuthi uqinise ubungane bakho labafowenu lodadewenu ngoba yibo abazakunceda nxa izinto sezinzima.

16. Kuyini okungamelanga sikukhohlwe? (Khangela lomfanekiso.)

¹⁶ IBhayibhili lithi uJehova uyabalaya labo abathandayo. (Heb. 12:6) Ngakho ufuna bonke abasusiweyo baphenduke ebandleni. (2 Phet. 3:9) Lawe nxa ulesihlobo kumbe umngane owatshiya ukukhonza uJehova ungathandabuzi ukuthi abadala bazamncedisa aphinde aphenduke kuJehova.—2 Thim. 2:​24, 25.

17. Kuyini okungamelanga ukuthandabuze?

¹⁷ Esihlokweni lesi sixoxe ngobunye ubunzima ongahlangana labo nxa usubhabhathiziwe. Kodwa akumelanga wesabe ngoba kunengi ongakwenza khathesi ukuze uhlale uthembekile kuJehova. Sikhuluma nje, vele uJehova uyakuncedisa njalo uzahlala ekwenza lokhu. (1 Phet. 5:10) Uzahlala ekunika amandla okuthi uqinisele kuloba yibuphi ubunzima ozahlangana labo. Nxa ungavuma ukuthi uJehova akuncedise akulalutho oluzakwenza ubhazalale ekukhonzeni!—Hubo. 119:165; Rom. 8:​38, 39.