Kungani Kuqakathekile Ukuthi Ubhabhathizwe?

1. Kuyini okutshengisa ukuthi ukubhabhathizwa kuqakathekile?

KUYASITHOKOZISA kakhulu ukubona abantu bebhabhathizwa. Lakudala amaKhristu athi ebona abantu bebhabhathizwa ngePhentekhosti lika-33 C.E. athokoza kakhulu. Ngalelolanga umphostoli uPhetro wenza intshumayelo eyayitshengisa ukuthi ukubhabhathizwa kuqakathekile. (Imiseb. 2:​38, 40, 41) Umphostoli uPhawuli wathi imfundiso yokuqala emayelana loKhristu igoqela ‘lemfundiso yobhabhathizo.’ (Heb. 6:​1, 2) Yikho kuqakathekile sibili ukuthi sibekwazi ukuthi ukubhabhathizwa kutshoni.

2. Kungani kumele sizwisise ukuthi ukubhabhathizwa kutshoni?

² Nxa ufuna indlu yakho ingadiliki nxa kusiba lesiphepho kumele uyakhele esisekelweni esiqinileyo, lomuntu ofuna ukubhabhathizwa kumele ayizwisise kuhle indaba le ukuze abe lokholo oluqinileyo. Ngitsho lalabo asebeleminyaka bebhabhathiziwe kumele bahlale becabangisisa ngokuthi ukubhabhathizwa kuqakatheke ngani. Esihlokweni lesi sizaxoxa ngokuthi kutshoni ukubhabhathizwa, besesibona lokuthi amaKhristu abhabhathizwa njani. Sizaphinda sibone ukuthi kutshoni ukubhabhathizwa ebizweni likaBaba, leleNdodana lelomoya ongcwele.

KUTSHONI UKUBHABHATHIZWA?

3. Kutshoni ukubhabhathizwa?

³ Nxa umuntu ebhabhathizwa uyabe etshengisa ukuthi uselazi iqiniso ngoJehova uNkulunkulu langoJesu Khristu. Uyabe esephendukile ezonweni zakhe, watshintsha impilo yakhe ukuze akhonze uJehova. Uyabe esekwazi lokuthi uJehova usebenzisa uJesu ukuze asindise abantu. Umuntu lo uqala ngokuthandaza kuJehova emthembisa ukuthi uzimisele ukwenza intando yakhe lokuba senhlanganisweni yakhe. Nxa umuntu angenza izinto lezi uyabe esengene endleleni eya ekuphileni okungapheliyo.

4. Kungani kumele umuntu obhabhathizwayo acwiliswe emanzini? (Khangela lomfanekiso.)

⁴ Nxa umuntu ebhabhathizwa uyacwiliswaa emanzini abesephuma. Kuyabe kungani umuntu lo uke wafa wasevuswa. (Khangela loKholose 2:12.) Phela nxa umuntu ecwiliswa emanzini kuyabe kutshengisa ukuthi usetshiya indlela abephila ngayo. Nxa ephuma emanzini uyabe etshengisa ukuthi usezimisele ukuphilela ukwenza intando kaNkulunkulu.

5. Ungamlingisela njani uNowa? (U-1 Phetro 3:​18-21)

⁵ Bala u-1 Phetro 3:​18-21. Ukulungiselela ukubhabhathizwa singakufanisa lomsebenzi wokwakha umkhumbi owenziwa nguNowa. Nxa uqalisa ukufunda iBhayibhili kungakhanya angani umsebenzi wakhona mkhulu kakhulu njengokwakha umkhumbi. Kodwa kuqakathekile ukuthi uqhubeke ufunda iBhayibhili lanxa kungakhanya angani kunzima. UJehova watshela uNowa ukuthi awakhe njani umkhumbi futhi kwakuqakathekile ukuthi uNowa alalele ukuze avikeleke ngesikhathi sikaZamcolo. UNowa watshengisa ukuthi ulokholo wakha umkhumbi futhi uJehova waqhubeka emncedisa. Lawe ungenelisa ukwenza intando kaJehova njengoba nje uNowa wenelisa.—Gen. 6:22.

6. Kungani kuqakathekile ukuthi umuntu abhabhathizwe?

⁶ Kuvesi 21, umphostoli uPhetro wathi ukubhabhathizwa ‘kuyasindisa.’ Kodwa lokho akutsho ukuthi ukucwiliswa nje emanzini kwenza umuntu asindiswe kumbe athethelelwe izono. Ligazi likaJesu kuphela elingahlambulula abantu ezonweni zabo. (1 Joh. 1:7) Lanxa kunjalo, kuqakathekile ukuthi umuntu abhabhathizwe ngoba uNkulunkulu uthi yikho okumele sikwenze. Nxa sibhabhathizwa siyabe sicela ukuthi uJehova asinike umzwangedwa ohlanzekileyo. Kuyazicacela ukuthi umuntu kumele abhabhathizwe ukuze asindiswe.

AMAKHRISTU ABHABHATHIZWA NJANI?

7. Yiziphi izimiso ezingasinceda endabeni yokubhabhathizwa?

⁷ IBhayibhili alilandisi izinto ezinenginengi mayelana lokubhabhathizwa kodwa lilezimiso okumele sicabange ngazo. Ngokwesibonelo, amanye amavesi anceda abazabhabhathizwa ukuthi bakhethe kuhle impahla abazazigqoka, amanye anceda labo abayabe bebukele ukuthi bakwazi ukuthi baziphathe njani ngesikhathi abanye bebhabhathizwa. (1 Khor. 14:40; 1 Thim. 2:9) Abafowethu abangabadala yibo abajayele ukubhabhathiza abanye kodwa akumelanga kukhanye angani sesibaqakathekisa kakhulu ngenxa yomsebenzi lo abawenzayo. (1 Khor. 1:​14, 15) UJehova uyababona bonke ababhabhathizwayo kungelani lokuthi babhabhathizelwe phambi kwexuku labantu loba hatshi.—Imiseb. 8:36.

8. Yiphi imibuzo ebuzwa labo abafuna ukubhabhathizwa futhi kungani kuqakathekile ukuthi bayibuzwe? (ImiSebenzi 2:​38-42) (Khangela lomfanekiso.)

⁸ IBhayibhili lithi umuntu kumele avume phambi kwabantu ukuthi ulokholo ukuze asindiswe. (Rom. 10:​9, 10) Lokhu sikwenza ngokukhuthala emsebenzini wokutshumayela kodwa kukhanya kakhulu ngelanga umuntu abhabhathizwa ngalo. Ababhabhathizwayo babuzwa imibuzo le emibili. Owokuqala ngothi: “Usuphendukile yini ezonweni zakho wazinikela kuJehova njalo uyakwamukela yini ukuthi uNkulunkulu usebenzisa uJesu Khristu ukuze asindise abantu?” Umbuzo lo unceda umuntu ukuthi acabangisise ngalokho akwenzileyo ngesikhathi elungiselela ukubhabhathizwa futhi uhambelana lamazwi akhulunywa nguPhetro ngesikhathi ekhuthaza abantu ukuthi baphenduke njalo babhabhathizwe. Umbuzo wesibili ngothi: “Uyakuzwisisa yini ukuthi ukubhabhathizwa kwakho kutshengisa ukuthi usunguFakazi kaJehova lokuthi usulilunga lenhlanganiso yakhe?” Umbuzo lo usikhumbuza ukuthi kumele silalele lokho esikutshelwa yinhlanganiso kaJehova njalo simkhonze sindawonye labafowethu labodadewethu njengalokho okwakusenziwa ngamaKhristu akuqala. (Bala ImiSebenzi 2:​38-42.) Nxa umuntu angaphendula imibuzo yomibili ngo-“yebo” uyabe etshengisa ukuthi usekulungele sibili ukubhabhathizwa.

9. Kuyini okumele sonke sikwenze?

⁹ Kungenzakala ukuthi awuzange wenze izono ezinkulu njalo wawuzama ukuphila ngendlela eqondileyo lanxa wawungakafundi iqiniso ngoNkulunkulu. Kumbe engxenye wakhuliswa ngabazali abangamaKhristu abakuncedisayo ukuthi lawe umthande uJehova. Kambe kuqakathekile ukuthi lawe uphenduke njalo ubhabhathizwe? Ye. Kumele sikhumbule ukuthi sonke silesono esibangela ukuthi siqhelelane loNkulunkulu. (Hubo. 51:5) Kodwa nxa sesifunde okunengi ngoJehova, sicina sikhetha ukuphilela ukwenza intando yakhe. Kuyabe sekumele siphenduke, sitshintshe indlela esiphila ngayo ukuze sithokozise uBaba wethu osezulwini, besesibhabhathizwa.—Imiseb. 3:19.

10. Kungani kumele ubhabhathizwe futhi nxa wake wabhabhathizwa kweyinye isonto?

¹⁰ Pho kuthiwani nxa kuyikuthi wake wabhabhathizwa kweyinye isonto? Kuyabe sekumele ubhabhathizwe futhi yini nxa usufuna ukuba nguFakazi kaJehova? Ye. Yindaba? Phela ngalesosikhathi wawungakalazi iqiniso ngoJehova uNkulunkulu langeNdodana yakhe uJesu. Sekungenzeka sibili ukuthi wathandaza kuNkulunkulu usithi usufuna ukwenza intando yakhe kodwa ngalesosikhathi wawungakazwisisi ukuthi uNkulunkulu ufuna uphile njani. Ngesikhathi umphostoli uPhawuli ese-Efesu watshumayeza abanye abantu ababeke babhabhathizwa. Kodwa njengoba babebhabhathizwe bengakalazi iqiniso ngoJesu kwasekumele babhabhathizwe futhi.b (Imiseb. 19:​1-5) Lalabo abafuna ukubhabhathizwa lamuhla kumele babelolwazi oluqondileyo njalo baphile ngendlela efunwa nguJehova.

“EBIZWENI LIKABABA LELENDODANA LELOMOYA ONGCWELE”

11. Ibala elithi ‘ibizo’ lisetshenziswa njani eBhayibhilini? (UMathewu 28:​18-20)

¹¹ UJesu wathi abafundi bakhe kumele babhabhathizwe “ebizweni likaBaba leleNdodana lelomoya ongcwele.” (Bala uMathewu 28:​18-20.) IBhayibhili lisebenzisa ibala elithi ‘ibizo’ nxa likhuluma ngesikhundla umuntu alaso loba lokho adume ngakho. Yikho nxa umuntu esenza olunye ulutho ngebizo lomunye umuntu kutsho ukuthi uyabe esazi isikhundla salowomuntu. (Khangela loMathewu 10:41) Khathesi asixoxeni ngokuthi kutshoni ukubhabhathizwa ebizweni likaBaba leleNdodana lelomoya ongcwele.

12. Kutshoni ukubhabhathizwa ebizweni likaBaba? (ISambulo 4:11) (Khangela lemifanekiso.)

¹² Ebizweni likaBaba. Lokho kutsho ukuthi siyakwazi ukuthi uJehova nguBaba wethu osezulwini njalo nguye owasinika ukuphila. UnguSomandla njalo wadala zonke izinto. (Bala iSambulo 4:11.) Siyakwazi ukuthi uJehova uyayilalela imithandazo yethu futhi siyalisebenzisa ibizo lakhe nxa sithandaza lalapho sitshela abanye ngaye. (Hubo. 65:2) Ukubhabhathizwa ebizweni likaBaba kutsho lokwazi ukuthi uJehova nguye owasivulela indlela yokuthi sisindiswe esebenzisa uJesu Khristu. (Rom. 5:8.) Lokhu yikho uPhetro akuchasisela abantu ngePhentekhosti. Abantu labo babemazi sibili uJehova kodwa kwakumele bazwisise ukuthi wayezasebenzisa uJesu ukuze abasindise.

13. Kutshoni ukubhabhathizwa ebizweni leNdodana? (Khangela lemifanekiso.)

¹³ Ebizweni leNdodana. Asikuthandabuzi ukuthi uJesu yiNdodana kaNkulunkulu ezelwe yodwa. IBhayibhili lithi uJesu ‘yindlela.’ Okutsho ukuthi nxa sifuna ukuba nga ngabangane bakaJehova kumele sibemazi uJesu Khristu. (Joh. 14:6) UJesu unguMhlengi wethu ngoba wasifela ukuze sithole ukuphila okungapheliyo. Lokhu yikho okwenza sizimisele ukubhabhathizwa futhi siqhubeke simlandela okwempilo yethu yonke. (1 Joh. 2:6) Sikhuthele ekutshumayeleni njengaye. (Luk. 4:43) Sizimisele ukuqhubeka sithembekile lanxa sihlukuluzwa ngenxa yokukhonza uJehova. (2 Thim. 3:12) Nxa silalela abakhokhelayo ebandleni siyabe sitshengisa ukuthi siyamhlonipha uJesu ngoba nguye oyinhloko yebandla.—Efe. 4:​8, 11, 12; 5:23.

14. (a) Kutshoni ukubhabhathizwa ebizweni lomoya ongcwele? (Khangela lemifanekiso.) (b) AmaKhristu agcotshiweyo aphinda abhabhathizwe njani? (Khangela ibhokisi elithi: “Ukubhabhathizwa KwamaKhristu Agcotshiweyo.”)

¹⁴ Ebizweni lomoya ongcwele. Lokhu kutsho ukuthi siyazwisisa ukuthi umoya ongcwele ngamandla kaNkulunkulu. Siyakwazi ukuthi abaphrofethi kanye lalabo ababhala iBhayibhili, babekhokhelwa ngumoya ongcwele yikho sihlala silibala iBhayibhili futhi sikwenza lokho esikufundayo. (2 Phet. 1:​20, 21) Siyalwisa lokungenzi izono ezinkulu ngoba lokhu kungabangela ukuthi uNkulunkulu angasiphi umoya ongcwele futhi siyabe sesivimba lokuthi umoya ongcwele usebenze ebandleni.—Efe. 4:30.

15. Kuyini okumele uzimisele ukukwenza?

¹⁵ Nxa kuyikuthi sewabhabhathizwa hlala uzikhumbuza ukuthi ukubhabhathizwa kutshonic njalo uzimisele ukwenza lokho owakuthembisa uJehova ngesikhathi uzinikela kuye. Nxa kuyikuthi awukabhabhathizwa ke? Kuyini okukuvimba ukuthi ubhabhathizwe? Esihlokweni esilandelayo sizabona ukuthi ungenzani ukuze lawe ngelinye ilanga ubhabhathizwe.