Usakhumbula Yini?
Ubuzibala yini izihloko ezisanda kuphuma ku-Nqabayokulinda? Nxa kunjalo, ungenelisa yini ukuphendula imibuzo elandelayo?
Kuyini okwenza sikhazimulise uJehova?
Siyamkhazimulisa ngenxa yokuthi siyamthanda njalo siyamhlonipha kakhulu. Silesifiso sokuthi labanye bamkhazimulise, yikho sibafundisa ngaye.—w25.01, ikhasi 3.
Ungenzani nxa omunye umuntu angakucaphula?
Ungafeli ngaphakathi kodwa kwamukele ukuthi omunye umuntu ukuzwise ubuhlungu. Cela uJehova akuncedise ukuthi ungabambi isikhwili.—w25.02, ikhasi 15-16.
Abafowethu abasakhulayo bangafundani kuMakho?
Waqhubeka ekhuthele emsebenzini kaJehova futhi kazange akhalale lanxa kwakulezinto ezazingamqeda amandla. Wayelabangane abaqinileyo ekukhonzeni okugoqela lomphostoli uPhawuli.—w25.04, ikhasi 27.
UJesu wathandaza wathi: “Sengenze ibizo lakho laziwa.” Wayesitshoni? (Joh. 17:26)
Abafundi bakaJesu babevele belazi ibizo likaNkulunkulu. Lapha uJesu wayesitsho ukuthi wayebatshelile ukuthi uJehova nguNkulunkulu onjani, wabanceda bazwisisa lalokho uJehova ayekwenzile kanye lalokho ayezakwenza.—w25.05, ikhasi 20-21.
Yiziphi izinto esingazaziyo?
Kulezinto esingazaziyo futhi kumele sikwamukele lokho. Ngokwesibonelo, asikwazi ukuthi ukuphela komhlaba lo kuzafika nini. Asikwazi ukuthi elakusasa lisiphatheleni futhi ngeke siyizwisise indlela uJehova asazi ngayo.—w25.06, ikhasi 15-18.
Singenzani ukuze esikufundiswa nguJehova kusincede?
Nansi imibuzo esingazibuza yona: ‘Yiliphi iqiniso eliseBhayibhilini okukhulunywa ngalo endabeni le? Yiwuphi umzekeliso engingawusebenzisa nxa sengifundisa omunye umuntu? Ngubani ongayithanda indaba le futhi ngingamtshela nini?’—w25.07, ikhasi 19.
Indlela uJehova athethelela ngayo uDavida isifundisani?
Lanxa uDavida wenza izono ezinkulu, uJehova wamthethelela ngoba uDavida waphenduka ngenhliziyo yonke. (1 Amakho. 9:4, 5) Nxa uJehova engathethelela umuntu kuyabe kungani umuntu lowo kazange enze isono.—w25.08, ikhasi 17.
Ungenzani nxa kuyikuthi umuntu ofunda laye iBhayibhili kakuzwisisi lokho elixoxa ngakho?
Nxa kulendaba elixoxa ngayo kodwa kukhanya engayizwisisi dlulelani phambili, lizaphinda lixoxe ngayo ngelinye ilanga.—w25.09, ikhasi 24.
IBhayibhili lithi ‘isono silamandla okuyenga.’ (Heb. 3:13) Kutshoni lokhu?
Isono esazalwa silaso yiso esenza senze izinto ezimbi futhi sicine sesithandabuza lokuthi uJehova uyasithanda.—w25.10, ikhasi 16.
Singenzani ukuze sithandaze ngenhliziyo yonke?
(1) Cabangisisa ngokuthi uJehova nguNkulunkulu onjani. (2) Cabanga ngenhlupho ophakathi kwazo khathesi langomuntu okumele umthethelele ubusutshela uJehova ngakho. (3) Akumelanga sijahe ukuqeda ukuthandaza kodwa kumele sizinike isikhathi eseneleyo sokuthulula isifuba kuJehova.—w25.10, ikhasi 19-20.
Singabancedisa njani asebeluphele?
Kumele sibavakatshele kumbe sibafonele. Nxa kuvuma singabaphelekezela esibhedlela. Okunye esingakwenza yikutshumayela labo.—w25.11, ikhasi 6-7.
Abatshadayo kumele benzeni ukuze umtshado wabo uthokozise uJehova?
Kumele balandele umthetho kahulumende endabeni yokubhalisa umtshado. Nxa behlela okuzakwenzakala kumele batshengise ukuthi bafuna ukuthokozisa uJehova hatshi ukuphongulandela abantu bomhlaba. Abazakugqoka ngelanga lomtshado kumele kube lesithunzi. Akumelanga balandele amasiko lemikhuba ezadanisa uJehova. Ukuxoxisana ngamalungiselelo ayabe esenziwa lakho kuyanceda kakhulu.—w25.12, ikhasi 21-24.